មានទីតាំងជាច្រើនកន្លែងបានរៀបចំកម្មវិធីអបអរ«ទិវាសិទ្ធិកុមារអន្តរជាតិ»នៅថ្ងៃសុក្រ ទី១ ខែមិថុនា ឆ្នាំ២០១៨ ខណៈក៏មានទីតាំងជាច្រើនកន្លែងដែរ ដែលរៀបចំការចែករំលែកបាល់ទាត់ ដល់កុមារក្នុងប្រទេសកម្ពុជា ស្របចំថ្ងៃនេះដែរ។
ជាក់ស្តែងក្លិបភ្នំពេញក្រោន បានរៀបចំកម្មវិធីបាល់ទាត់កម្សាន្តនៅលើទីលានហ្វឹកហាត់នៃកីឡដ្ឋាន RSN ដើម្បីអបអរសាទរទិវាសិទ្ធិកុមារអន្តរជាតិប្រកបដោយបរិយាកាសសប្បាយរីករាយដោយមានវត្តមានចូលរួមរបស់កុមារាកុមារីប្រមាណជាជាង ២០០នាក់ក្រោមការដឹកនាំរបស់ក្រុមគ្រូបង្វឹក ក៏ដូចជាកីឡាករ កីឡាការិនីនៃក្រុមថ្នាលយុវជន និងក្រុមបាល់ទាត់នារីភ្នំពេញក្រោនផងដែរ។
ព្រឹត្តិការណ៍នេះបានប្រព្រឹត្តទៅពេញមួយព្រឹក ដោយក្រុមកុមារទាំងអស់បានបែងចែកជាក្រុមផ្សេងៗគ្នា រួចនាំគ្នាប្រកួតមិត្តភាពទៅវិញទៅមកដើម្បីស្វែងរកក្រុមជ័យលាភីទាំង៣ ដែលនឹងត្រូវទទួលបានរង្វាន់អនុស្សាវរីយ៍ពីក្លឹបនោះ។
កញ្ញា ឈឿន នីផា គ្រូបង្វឹកក្រុមថ្នាលយុវជនអាយុក្រោម ១៥ឆ្នាំដែលជាសមាជិកគណៈកម្មាការរៀបចំកម្មវិធីបានឲ្យដឹងថា ព្រឹត្តិការណ៍នេះត្រូវបានបង្កើតឡើងក្នុងគោលបំណងលើកទឹកចិត្តឲ្យកុមារទទួលបាននូវអត្ថប្រយោជន៍ពីកីឡាបាល់ទាត់ទាំងចំពោះសុខភាព ក៏ដូចជាជៀសផុតពីការចំណាយពេលលើសកម្មភាពមិនល្អនានាដែលអាចជះឥទ្ធិពលអាក្រក់ដល់អនាគតរបស់ពួកគេ ឬចំពោះសង្គមជាតិជាដើម។
ចំណែកក្រុមយុវជនអាយុក្រោម១៥ឆ្នាំ ចំនួន២៥នាក់ នៃសាលាតម្រង់ទិសបាល់ទាត់ខេត្តព្រះវិហារ បានចែករំលែកជំនាញមូលដ្ឋានគ្រឹះបាល់ទាត់ ដល់កុមារអាយុពី៨ដល់១២ឆ្នាំប្រមាណ១០០នាក់ ក្នុងទិវាកុមារអន្តរជាតិ នាកីឡដ្ឋានខេត្តព្រះវិហារ។ គ្រូបង្គោលក្រុមយុវជនអាយុក្រោម១៥ឆ្នាំ ដែលជាអ្នកផ្ដួចផ្ដើមកម្មវិធី លោក យឹម អមរិន្ទសួគ៌ា ពន្យល់ពីគោលបំណងកម្មវិធីយ៉ាងដូច្នេះ «ដោយមើលឃើញថា ក្មេងក្នុងអាយុ៨ដល់១២ឆ្នាំ ត្រូវបានគេចាត់ទុកថា ជាអាយុមាសក្នុងកីឡាបាល់ទាត់ មានន័យថា ជាពេលវេលាដ៏ត្រឹមត្រូវ ដើម្បីបណ្ដុះជំនាញមូលដ្ឋានគ្រឹះបាល់ទាត់ ហេតុនេះខ្ញុំក៏សម្រេចរៀបចំវាឡើង។ យើងឃើញហើយ បរទេសគេបង្វឹកក្មេងតាំងពីអាយុប៉ុណ្ណឹង ពេលគេចូលដល់អាយុ១២-១៣ គេផ្ដើមឈានដល់ការហ្វឹកហាត់ជំនាញកម្រិតខ្ពស់តែម្ដង មិនខាតពេលចាប់ផ្ដើមពីដំបូង»។
ចំណែកអង្គការសលត៍ ដែលមានមូលដ្ឋាននៅខេត្តបាត់ដំបង វិញបានធ្វើកម្មវិធីចែករំលែកបាល់ទាត់ជាមួយក្មេងមកពីសហគមន៍ ៣ កន្លែង ចំនួនក្មេង១៥០នាក់ ដោយរៀបចំកម្មវិធីសប្បាយៗជាច្រើនដោយប្រើប្រាស់បាល់ទាត់ជាឧបករណ៍ រួមជាមួយនឹង ការចែកចាយនូវចំណេះដឹងផ្សេងៗ ស្ដីពី សិទ្ធិកុមារ។ អង្គការដែលផ្តោតលើបាល់ទាត់នេះបានប្រើពាក្យស្លោកថា "ផ្ដល់សេចក្ដីស្រលាញ់ដល់ក្មេង។ នោះអ្នកនឹងទទួលបានផលល្អត្រឡប់មកវិញ"៕
Source: Kampuchea Thmey Daily
0 Comments