សម្ពោធ​ដាក់​ឲ្យ​ប្រើប្រាស់​ជា​ផ្លូវការ ​​ស្ថានីយ​ចេញ​ចូល​អ្នកដំណើរ​នៅ​ព្រលានយន្តហោះ​អន្តរជាតិ​កងកេង

ព្រះសីហនុ ៖ ស្ថានីយ​ច្រកចេញ​ចូលក្នុង​អាកាសយានដ្ឋាន​អន្តរជាតិ​កងកេង​ខេត្ត​ព្រះសីហនុ បាន​បើក​សម្ពោធ​ដាក់​ឲ្យ​ដំណើរការ ដោយមាន​ការចូលរួម​ជា​អធិបតី​ពី លោក ម៉ៅ ហាស់វណ្ណាល់ រដ្ឋលេខាធិការ នៃ​រដ្ឋលេខាធិការដ្ឋាន​អាកាសចរ​ណ៍​ស៊ី​វិល និង​លោក យន្ត មីន អភិបាល នៃ​គណៈ​អភិបាលខេត្ត​ព្រះសីហនុ រួម​ទាំង​មន្ត្រី​ប្រតិភូ​អមដំណើរ​ជាច្រើន​នាក់​ផ្សេងទៀត​។



ពិធី​សម្ពោធ​កាត់​ខ្សែបូ​ដាក់​ឲ្យ​ប្រើប្រាស់​ជា​ផ្លូវការ​ស្ថានីយ​ចេញ ចូល​អ្នកដំណើរ​នៅ​ព្រលានយន្តហោះ​អន្តរជាតិ​កងកេង​នេះ បាន​ធ្វើ​ឡើង​នៅ​ព្រឹក​ថ្ងៃទី ២៧ ខែ​មិថុនា ឆ្នាំ​២០១៨ មាន​ទីតាំង​ស្ថិតនៅ​ឃុំ​រាម ស្រុក​ព្រៃនប់ ខេត្ត​ព្រះសីហនុ។



មាន​ប្រសា​ស​ន៍​នៅក្នុង​ពិធី​បើក​សម្ពោធ​នេះ​ដែរ លោក ម៉ៅ ហាសវណ្ណាល់ រដ្ឋលេខាធិការ នៃ​រដ្ឋលេខាធិការដ្ឋាន​អាកាសចរណ៍​ស៊ីវិល បាន​ថ្លែង​ថា ក្នុង​រយៈពេល​ដែល​យើង​សាងសង់​អគារ​ចេញ ចូល​អ្នកដំណើរ​នៅ​ស្ថានីយ​យន្តហោះ​កងកេង នេះ​បាន​ប្រើ​ពេល​វេលា​អស់​ជាង​មួយឆ្នាំ ទើប​ការដ្ឋាន​សំណង់​មួយ​នេះ​បាន​សង់​រួចរាល់​ជា​ស្ថាពរ។ ​​អគារ​ថ្មី​នេះ​អាច​ទទួល​អ្នក ធ្វើដំណើរ​ក្នុង​មួយឆ្នាំ បាន​មួយ​លាន​នាក់ ដោយឡែក​អាគារ​ចាស់​របស់​យើង មានលទ្ធភាព​ទទួលភ្ញៀវ​បានតែ ២០​ម៉ឺន​នាក់ ក្នុង​មួយឆ្នាំ​ប៉ុណ្ណោះ។



លោក ម៉ៅ ហាសវណ្ណាល់ បាន​ឲ្យ​ដឹង​ទៀត​ថា ដោយសារតែ​មើលឃើញ​សក្ដានុពល​ភ្ញៀវទេសចរ​មក​កម្សាន្ត​ខេត្ត​ព្រះសីហនុ​មានការ​កើនឡើង​ជា​បន្តបន្ទាប់ ទើប​យើង​បាន​ចរចា​ជាមួយ​ក្រុមហ៊ុន​វិនិយោគ​សាងសង់​នូវ​អគារ​ថ្មី​របស់​យើង ដែលមាន​សោភ័ណភាព បរិស្ថាន​អាច​ទទួល​អ្នកដំណើរ​បាន ១​លាន​នាក់ ក្នុង​មួយឆ្នាំ។



លោក ហាសវណ្ណាល់ បាន​ឲ្យ​ដឹង​ទៀត​ថា សព្វថ្ងៃ​នេះ​ ព្រលានយន្តហោះ​អន្តរជាតិ​កងកេង មាន​ផ្លូវ​រត់​ប្រវែង ២.៥០០​ម៉ែត្រ ដែល​ចំនួន​នេះ​មិនទាន់​អាច​ឆ្លើយតប​តាម​តម្រូវការ​យន្តហោះ​ប្រភេទ​ធំ ចុះចត​និង​ហោះហើរ​បាន​នោះ​ទេ ដូច្នេះ​សព្វថ្ងៃ​យើង​ទទួល​បាន​ត្រឹមតែ​យន្តហោះ​ប្រភេទ Air bus 321 និង​បូ​អ៊ីង ៧៥៧ ក៏ប៉ុន្តែ​តម្រូវការ​ឲ្យ​យន្តហោះ ហោះ​ផ្លូវ​ឆ្ងាយ​ប្រភេទ​យន្តហោះ​ធំ មិនទាន់​អាច​ចុះចត​បាន។ យើង​បានធ្វើ​ការពិភាក្សា​ជាមួយ​ក្រុមហ៊ុន​វិនិយោគ Cambodia air port សម្រេច​កសាង​ស្ថានីយ​ចេញចូល​អ្នក ដំណើរ​អន្តរជាតិ​កងកេង​នេះ និង​បន្ទាប់​ពី​នោះ​យើង​នឹង​ពង្រីក​ព្រលានយន្តហោះ​ជា​ពីរ​ដំណាក់កាល ដំណាក់កាល​ទី​១ យើង​ពង្រីក​បន្ថែម​ផ្លូវ​ហោះហើរ​ប្រវែង ៣០០​ម៉ែត្រ​បន្ថែម​ទៀត អាច​ឲ្យ​យន្តហោះ​ប្រភេទ​ហោះ​ផ្លូវ​ឆ្ងាយ ហោះហើរ​ចុះចត​បាន។ នៅ​ដើមឆ្នាំ​២០១៩ ខាងមុខនេះ យើង​នឹង​ពង្រីក​ព្រលាន​ប្រវែង ៣០០​ម៉ែត្រ ក្នុង​គម្រោង នឹង​ត្រូវ​បញ្ចប់​ជា​ស្ថាពរ​នៅ​ចុងឆ្នាំ​២០១៩ អាច​ទទួលយក​យន្តហោះ​ប្រភេទ​ធុង​ធំ​ចុះចត​បាន ដំណាក់កាល​ទី​២ យើង​នឹង​មាន​គម្រោង ពង្រីក​ផ្លូវ​ហោះហើរ​ប្រវែង ៥០០​ម៉ែត្រ​ប​ន្ថែម​ទៀត ដែល​មាន​ផ្លូវ​ហោះ​ហើរ​រហូតដល់ ៣,៣០០​ម៉ែត្រ អាច​ឲ្យ​យន្តហោះ​ប្រភេទ​ធុន​ធំ ប្រភេទ​យក្ស នេះ​តាម​ការ​គ្រោងទុក យើង​នឹងធ្វើ​ការអភិវឌ្ឍ​ជា​បន្តបន្ទាប់​ទៀត ក៏ប៉ុន្តែ​នៅ​ចំពោះមុខ​ក្នុង​ឆ្នាំ​២០១៩​ខាងមុខនេះ ក្រុមហ៊ុន​នឹង​សាងសង់​ពង្រីក​ផ្លូវ​ហោះហើរ​បាន​ចប់​ជា​ស្ថាពរ​នៅ​ជំហាន​ទី​១។



នៅក្នុង​អាកាសយានដ្ឋាន​ខេត្ត​ព្រះសីហនុ គឺ​មាន​ភ្ញៀវ​តាម​រដូវកាល រដូវ Low season និង High season រដូវ Low season មាន​ពី ៧ ទៅ ១០​ជើង ក្នុង​មួយថ្ងៃ ដោយឡែក​រដូវ High season មាន​រហូត​ទៅដល់ ១៥​ជើង​ក្នុង​មួយថ្ងៃ ដូច្នេះ​ព្រលានយន្តហោះ​អន្តរជាតិ​កងកេង មាន​ការវិវឌ្ឍ​លឿន ដែល​មាន​សេវា​ហោះហើរ​នៅ ក្នុង​តំបន់​មកពី​ប្រទេស​ចិន វៀតណាម និង​ក្នុងស្រុក​៕

      

Source: Kampuchea Thmey Daily