ភ្នំពេញ ៖ ដោយមើលឃើញពីទុក្ខលំបាកនិងក្តីអាណិតអាសូរដល់ពិធីការិនីវីជេ អា លីយ៉ា លោកខៀវ កាញារិទ្ធ រដ្ឋមន្ត្រីក្រសួងព័ត៌មាន បានសម្រេចចំណាយថវិកាផ្ទាល់ខ្លួនចំនួន១លានរៀលដើម្បីឧបត្ថម្ភ និងសម្រាលដល់ថ្លៃព្យាបាលជូនដល់តារាស្រីវីជេ អា លីយ៉ា ធ្លាក់ខ្លួនឈឺធ្ងន់កំពុងសម្រាកនៅមន្ទីរពេទ្យ។
បើតាមរយៈការឲ្យដឹងពីលោក អ៊ឹម ជីវ៉ា បានលើកឡើងថា ខ្ញុំបាទបាននាំយកនូវថវិកាផ្ទាល់របស់ឯកឧត្តម ខៀវ កាញារិទ្ធ រដ្ឋមន្ត្រីក្រសួងពត៌មាននិងលោកជំទាវ ទេព រង្ស៊ី ចំនួន១,០០០ ០ ០០រៀល(១លានរៀល)ឧបត្ថម្ភដល់សិល្បការិនីVj អាលីយ៉ា ដែលកំពុងសង្គ្រោះបន្ទាន់ នៅមន្ទីរពេទ្យកាល់ម៉ែតដោយសារជំងឺសួតធ្ងន់ធ្ងរ។
លោក អ៊ឹម ជីវ៉ា ក៏បានពាំនាំនូវរបស់សាសន៍របស់ឯកឧត្តមខៀវ កាញារីទ្ធ ដោយបានលើកឡើងទៀតថា លោករដ្ឋមន្ត្រីក៏បានផ្តាំផ្ញើសួសុខទុក្ខចំពោះសិល្បការិនីរូបនេះកុំឲ្យបាក់ទឹកចិត្ត ត្រូវខិតខំសម្រាកព្យាបាលតាមការណែនាំរបស់វេជ្ជបណ្ឌិតនៃមន្ទីរពេទ្យកាល់ម៉ែត និងជូនពរដល់Vj អា លីយ៉ា ឲ្យឆាប់ជាសះស្បើយពីជំងឺទៀតផង។
តារាសម្តែងរូបសង្ហាលោក អ៊ឹម ជីវ៉ា បន្ថែមថា នេះគឺជាការយកទឹកចិត្តទុក្ខដាក់ដ៏ថ្លៃថ្លាបំផុត របស់លោករដ្ឋមន្ត្រីនិងលោកជំទាវ ដែលបានជួយឧបត្ថម្ភដល់សិល្បករក្រីក្រខ្វះខាតនិងកំពុងមានជំងឺ ហើយនេះក៏មិនមែនជាលើកទី១ឡើយរបស់ឯកឧត្តមនិងលោកជំទាវដែលជួយដល់សិល្បករសិល្បការិនីជួបទុក្ខលំបាក។
សូមបញ្ជាក់ថា តារាស្រីវីជេ អា លីយ៉ា ថ្មីៗបានធ្លាក់ខ្លួនឈឺធ្ងន់ត្រូវបានដឹកចូលសង្គ្រោះបន្ទាន់នៅមន្ទីរពេទ្យក្រោយពេលទទួលរងនូវអំពើហិង្សាវាយដុំពីសំណាក់បុរសម្នាក់មានរយៈពេល២ឆ្នាំដែលគិតមកដល់ពេលនេះនាងនៅមិនទាន់បានទាមទារបានយុត្តិធម៌នៅឡើយ។ វីជេ អា លីយ៉ា កន្លងមកធ្លាប់ទទួលបានការគាំទ្រ និង មានប្រជាប្រិយភាពមិនចាញ់តារាស្រីរួមជំនាន់ឯទៀតនោះទេ៕
Source: Kampuchea Thmey Daily
0 Comments