ណាហ្គា​វើ​លដ៍​ តំណាង​ប្រទេស​កម្ពុជា ​បាន​ឈ្នះ​ពានរង្វាន់​ការងារ​សង្គម​ឆ្នើម

ភ្នំពេញ ​៖​ ណាហ្គា​វើ​លដ៍​កាលពី​ថ្ងៃទី ៧ ខែមិថុនា ២០១៨​ បាន​ឈ្នះ​ពានរង្វាន់ “​ឧត្តមភាព​ការងារ​សង្គម​ទូទៅ​ល្អ​ដាច់​គេ​តំណាង​ប្រទេស​កម្ពុជា​” ពី​កម្មវិធី​ប្រគល់​រង្វាន់​ការងារ​សង្គម​សកល​ប្រចាំឆ្នាំ ២០១៨ លើក​ទី ១០ ដែលជា​កម្មវិធី​ប្រគល់​រង្វាន់​ការងារ​សង្គម​ល្បី​បំផុត​មួយ​ក្នុង​ទ្វីបអាស៊ី​ដែល​បាន​ធ្វើឡើង​ក្នុង​ពេល​ថ្មីៗ​នេះ ​ក្នុង​ទីក្រុង Lombok ក្នុង​ប្រទេស​ឥណ្ឌូនេស៊ី។

ឆ្នាំនេះ គឺជា​ឆ្នាំ​ទី ១០ ដែល​កម្មវិធី​ប្រគល់​រង្វាន់​ការងារ​សង្គម​សកល​នេះ​ ទទួលស្គាល់ និង​ផ្តល់រង្វាន់​ដល់​ក្រុមហ៊ុន​ណា​ដែល​មាន​កម្មវិធី​ការងារ​សង្គម​ឆ្នើម​ដាច់​គេ ការ​បន្ត​ការងារ​សង្គម និង​ការ​ផ្តល់​ផលប្រយោជន៍​ដល់​អ្នក និង​សហគមន៍​ដែល​ជួប​ការ​លំបាក ព្រមទាំង​អភិរក្ស​បរិស្ថាន​ ខណៈ​កំពុង​ប្រកប​អាជីវកម្ម​របស់ខ្លួន។



លោក Pern Chen នាយក​គ្រប់គ្រង​ក្រុមហ៊ុន​ណាហ្គា​វើ​លដ៍ បាន​មានប្រសាសន៍​ថា «​យើង​មាន​កិត្តិយស​ ដែល​បាន​ទទួល​ពានរង្វាន់​នេះ ដែល​វា​គឺជា​ស្នាដៃ​ឆ្នើម​មួយទៀត​នៃ​ការ​បន្ត​ការ​ប្តេជ្ញាចិត្ត​របស់​យើង​ក្នុង​ការ​ជួយឧបត្ថម្ភ​គាំទ្រ​ដល់​សហគមន៍ និង​ជួយ​លើកកម្ពស់​ជីវភាព​រស់​នៅ​របស់​សហគមន៍។ យើង​ជឿជាក់​ថា គន្លឹះ​ដើម្បី​ទទួល​បាន​ឧត្តមភាព​ការងារ​សង្គម គឺ​ត្រូវ​អភិវឌ្ឍ​យុទ្ធសាស្ត្រ​ប្រកបដោយ​និរន្តរភាព ពោល​គឺ​យកចិត្តទុកដាក់​ទៅលើ​សហគមន៍ បុគ្គលិក ម្ចាស់​ភាគហ៊ុន និង​ប្រទេស​កម្ពុជា​ទាំងមូល»។

រៀបចំ​ដោយ​ក្រុមហ៊ុន Pinnacle Group International ពានរង្វាន់​ការងារ​សង្គម​សកល​នេះ បាន​ក្លាយជា​ស្តង់ដារ​កំពូល​រួម​មួយ​នៅក្នុង​ចំណោម​សហគមន៍​ជាច្រើន។ ក្នុងចំណោម​ក្រុមហ៊ុន​ជាង ៣០០ មាន​ក្រុមហ៊ុន​ចំនួន ៦០ ប៉ុណ្ណោះ​ដែល​បាន​ឈ្នះ​ពានរង្វាន់​លំដាប់​កំពូល​នេះ​ក្នុង​ប្រភេទ​ពាន​១០ ផ្សេងៗ​គ្នា។

អ្នក​ដែល​ប្រគល់​ពានរង្វាន់ គឺ​អ្នកស្រី Kurleni Ukar ដែលជា​នាយករង​នៃ​នាយកដ្ឋាន​ឧស្សាហកម្ម និង​បញ្ញត្ត​នៃ​ក្រសួងទេសចរណ៍​នៃ​សាធារណរដ្ឋ​ឥណ្ឌូនេស៊ី។

ពានរង្វាន់​នេះ គឺ​ទទួលស្គាល់​ការខិតខំ​ប្រឹងប្រែង​រប​ស់​ណាហ្គា​វើ​លដ៍​ដែល​បាន​អនុវត្ត​យុទ្ធសាស្ត្រ​ស្នូល​របស់​ក្រុមហ៊ុន​ក្នុងការ​ចូលរួម​អភិវឌ្ឍ​សេដ្ឋកិច្ច​ប្រកបដោយ​និរន្តរភាព និង​កសាង​ប្រទេស​កម្ពុជា។ កម្មវិធី​ការងារ​សង្គម​របស់​ណា​ហ្គា​វើ​លដ៍ ផ្តោតលើ​សសរស្ដម្ភ​ធំៗ​ចំនួន ៤ គឺ អភិវឌ្ឍ​វិស័យ​អប់រំ ចុះ​ជួយ​តាម​សហគមន៍ អភិវឌ្ឍ​វិស័យ​កីឡា និង​អភិរក្ស​បរិស្ថាន។

ក្រុមការងារ​សង្គម​ណា​ហ្គា​វើ​លដ៍​បេះដូង​សប្បុរស​ ដែល​បាន​បង្កើតឡើង​ក្នុង​ឆ្នាំ ២០១៤ ដោយ​បុគ្គលិក​ស្ម័គ្រចិត្ត​ណាហ្គា​វើ​លដ៍ បាន​ចូលរួម​ធ្វើ​ឲ្យ​បរិយាកាស​សិក្សា​កាន់តែ​ប្រសើរ​ឡើង និង​បាន​ឧបត្ថម្ភ​សម្ភារៈ​សិក្សា​ដល់​សិស្សានុសិស្ស​ជាង ១៥២.០០០ នាក់​នៅតាម​សាលារៀន​ជាង ១០០ នៅតាម​បណ្តា​ខេត្ត​ក្នុងប្រទេស​កម្ពុជា។ លើសពីនេះទៅទៀត ណាហ្គា​វើ​លដ៍ បាន​បង្កើត​មជ្ឈមណ្ឌល​បណ្តុះបណ្តាល Naga Academy ក្នុង​ឆ្នាំ ២០១២ ដើម្បី​ផ្តល់​ការបណ្តុះបណ្តាល​ជំនាញ​សណ្ឋាគារ និង​បដិសណ្ឋារកិច្ច​ដែល​កន្លងមក មជ្ឈមណ្ឌល​នេះ បានផ្តល់​ផលប្រយោជន៍​ដល់​យុវជន​-​យុវនារី​កម្ពុ​ជាជាង ២.៥០០ នាក់។

កម្មវិធី​ការងារ​សង្គម​ដែល​កំពុង​បន្ត​ផ្សេងទៀត រួមមាន​ការ​លើកកម្ពស់​ការ​យល់ដឹង​ស្តីអំពី​សុវត្ថិភាព​អគ្គិភ័យ​ដល់​សិស្សានុសិស្ស ផ្តល់ឱកាស​ដល់​យុវជន​កម្ពុជា​តាមរយៈ​ក្លឹប​បាល់ទាត់​ណាហ្គា​វើ​លដ៍ និង​អភិវឌ្ឍ​វិស័យ​កីឡា​ជាតិ​តាមរយៈ​ការ​សហការ​ជាមួយ​គណៈកម្មាធិការ​ជាតិ​អូឡាំពិក​កម្ពុជា​ក៏ដូចជា​លើកកម្ពស់​ការយល់ដឹង​ស្តីអំពី​បរិស្ថាន​តាមរយៈ​យុទ្ធនាការ ៣ R (​កាត់បន្ថយ ប្រើប្រាស់​ឡើងវិញ និង​កែច្នៃ​ឡើងវិញ​) ។

គួរ​បញ្ជាក់ថា​ចាប់តាំងពី​បង្កើតឡើង​អស់​រយៈពេល​ជាង ២៣ ឆ្នាំ​កន្លងទៅនេះ ណាហ្គា​វើ​លដ៍​បាន និង​កំពុង​ចូលរួម​អភិវឌ្ឍ​សេដ្ឋកិច្ចសង្គម​នៃ​ប្រទេស​កម្ពុជា​ប្រកបដោយ​ភាព​វិជ្ជមាន​។ ក្នុង​ខែមីនា ឆ្នាំ ២០១៤ ក្រុមការងារ​ណាហ្គា​វើ​លដ៍​បេះដូង​សប្បុរស ត្រូវបាន​បង្កើតឡើង​ដោយ​បុគ្គលិក​ណាហ្គា​វើ​លដ៍​ដែល​ចង់​ស្ម័គ្រចិត្ត​ចុះជួយ​សង្គម​ជា​ប្រជាពលរដ្ឋ​គំរូ​។ គំនិត​ផ្តួចផ្តើម​នេះ ដោយមាន​ការគាំទ្រ​រប​ស់​ក្រុមហ៊ុន​ណាហ្គា​វើ​លដ៍ មាន​គោលបំណង​ជួយ​អភិវឌ្ឍ និង​លើកកម្ពស់​វិស័យ​អប់រំ អភិវឌ្ឍ​សហគមន៍ លើកកម្ពស់​វិស័យ​កីឡា និង​ថែរក្សា​បរិស្ថាន​នៅក្នុង​ប្រទេស​កម្ពុជា​។ បច្ចុប្បន្ន មាន​ប្រជាជន​កម្ពុ​ជាជាង ១៤៦.០០០ នាក់​បានទទួល​ផលប្រយោជន៍​ពី​គំនិត​ផ្តួចផ្តើម​នេះ​៕​

​

Source: Kampuchea Thmey Daily