ពិព័រណ៍​អឺរ៉ុប ​គ្រោង​នឹង​បើក​នៅ​ចុងខែ​មិថុនា​ នៅ​មជ្ឈមណ្ឌល​កោះ​ពេជ្រ

ភ្នំពេញ ៖ ​មជ្ឈមណ្ឌល​ពិព័រណ៍​កោះ​ពេជ្រ នឹង​ក្លាយជា​ទីតាំង​ពិព័រណ៍​អឺរ៉ុប​(EuroFair) ដំបូង​គេ​បង្អស់​គ្រោង​នឹង​រៀបចំ​នៅ​ថ្ងៃទី​២៩ ខែមិថុនា ដល់​ថ្ងៃទី​១ ខែកក្កដា ឆ្នាំ​២០១៨​ដោយ សភាពាណិជ្ជកម្ម​អឺរ៉ុប​នៅ​កម្ពុជា ឧបត្ថម្ភ​ដោយ ក្រុមហ៊ុន Cambodia Airports និង​ទទួល​ការ​គាំទ្រ​ពី​គណៈប្រតិភូ​សហភាព​អឺរ៉ុប​ប្រចាំ​កម្ពុជា ព្រមទាំង​មានការ​ចូលរួម​ពី​សភាពាណិជ្ជកម្ម​ជាតិ​នៃ​បណ្ដា​ប្រទេស​នៅ​អឺរ៉ុប​និង​សមាគម​ធុរកិច្ច​ចំនួន​ប្រាំ​នៅ​កម្ពុជា​ផងដែរ​។

លោក Arnaud Darc ប្រធាន​សភា​ពាណិជ្ជកម្ម​អឺរ៉ុប​នៅ​កម្ពុជា​បាន​ប្រាប់​ឲ្យ​ដឹង​ថា ​” វា​ជា​កិត្តិយស​ដ៏​ធំធេង​មួយ​សម្រាប់​យើង​ក្នុង​ការរៀបចំ​ពិព័រណ៍​អឺរ៉ុប (EuroFair) ដំបូង​គេ​បង្អស់​មួយ​នេះ​នៅ​ប្រទេស​កម្ពុជា។ នេះ​ជា​ពិព័រណ៍​ពាណិជ្ជកម្ម​លើកទីមួយ​ដែល​ដាក់​តាំង​ផលិតផល​ល្បីៗ​និង​សេវាកម្ម​ល្អៗ​មកពី​អឺរ៉ុប ជូន​អ្នកប្រើប្រាស់ និង​សហគ្រិន​ខ្មែរ​ឲ្យ​បាន​ស្គាល់​។ ព្រឹត្តិការណ៍​ដូចជា ពិព័រណ៍​អឺរ៉ុប (EuroFair) នេះ ពិតជា​ជួយ​បង្កើត​ចំណង​ដ៏​ល្អ​រវាង អឺរ៉ុប​និង​កម្ពុជា ហើយក៏​ផ្តល់​នូវ​ឱកាស​ពិសេស​ដើម្បី​រៀនសូត្រ កសាង​ទំនាក់ទំនង និង​ពង្រីក​ខ្សែបណ្ដាញ បង្កើត​មិត្ត​ភក្តិ ស្គាល់​អតិថិជន និង​កសាង​ដៃគូ​អាជីវកម្ម​ផង​ដែរ​។ ពិព័រណ៍​អឺរ៉ុប (EuroFair) នឹង​ក្លាយជា​ព្រឹត្តិការណ៍ និង​ពិព័រណ៍​ដំបូង​គេ​នៅ​ប្រទេស​កម្ពុជា ជួយ​ជំរុញ​ប​ណ្ដូ​រ​ពាណិជ្ជកម្ម​រវាង​កម្ពុ​ជា​និង​អឺរ៉ុប​។

រហូតមកដល់​ពេលនេះ មាន​ប្រមាណ​ជា​៤០​ក្រុមហ៊ុន មកពី​អឺរ៉ុប​បាន​ចុះឈ្មោះ​ចូលរួម​តាំងពិព័រណ៍​ផលិតផល​របស់​ខ្លួន ហើយ​យើង​សង្ឃឹមថា មាន​ក្រុមហ៊ុន​ផ្សេងទៀត​នឹង​មក​ចូលរួម​ផងដែរ​។ ក្រុមហ៊ុន​ដែល​បាន​ចុះឈ្មោះ​ហើយ នឹង​តាំង​ផលិតផល​យានយន្ត គ្រឿង​សង្ហា​រឹម ទំនិញប្រើប្រាស់ គ្រឿង​ម៉ាស៊ីន បរិក្ខារ​ពេទ្យ ឱសថ សេវាកម្ម​ហិរញ្ញវត្ថុ ចំណីអាហារ ភេសជ្ជៈ និង​ផលិតផល​ជាច្រើន​មុខ​ផ្សេងទៀត​។ ម៉ាក​ល្បីៗ ជាច្រើន​ដូចជា BMW, Bosch, Eurasia Concept, Daas & Chemicals, Mercedes, Porsche, Thalias, Hops និង Wuerth ក៏មាន​វត្តមាន​ដែរ ជាមួយនឹង​ការផ្តល់ជូន​នូវ​កម្មវិធី​បញ្ចុះតម្លៃ​ពិសេសៗ និង​សកម្មភាព​កម្សាន្ត​ជាច្រើន ជូន​អ្នកចូលរួម​ទស្សនា​។ ទីតាំង​អាហារដ្ឋាន​មួយ​នឹងត្រូវ​រៀបចំឡើង​ដើម្បី​ផ្តល់​អាហារ​និង​ភេសជ្ជៈ​បែប​អឺរ៉ុប​ឆ្ងាញ់​ពិសារ​ជូន​អ្នកទស្សនា​ផងដែរ​។

លោក Aurelio Flacco ប្រធាន​របស់​សភាពាណិជ្ជកម្ម​អ៊ីតាលី ទើប​ត្រូវ​បាន​បង្កើត​ថ្មី និង​ជា​សមាជិកសភា​ពាណិជ្ជកម្ម​អឺរ៉ុប​នៅ​កម្ពុជា បាន​មានប្រសាសន៍ថា នេះ​គឺជា​លើកទីមួយ​ហើយ​សម្រាប់​កម្ពុជា និង​ជា​ឱកាស​ដ៏​អស្ចារ្យ​មួយ​សម្រាប់​សហគមន៍​ធុរកិច្ច​ក្នុងស្រុក ដែល​អាច​ស្វែងយល់​បន្ថែម​អំពី​គុណភាព​នៃ​ទំនិញ និង សេវាកម្ម​ដែល​ក្រុមហ៊ុន​អឺរ៉ុប​យកមក​បង្ហាញជូន​។ លោក​បាន​បន្តថា “​យើង​នាំ​ផលិតផល​អ៊ីតាលី​ដ៏​ល្អ​បំផុត​ដូចជា គ្រឿង​សង្ហា​រឹម និង ផលិតផល​ប្រណីតៗ សម្រាប់​តុបតែង​ក្នុង​គេហដ្ឋាន​មាន​គុណភាព​ខ្ពស់ ដែល​ពុំ​ធ្លាប់​មាន​ពីមុនមក​នៅ​កម្ពុជា ដើម្បី​ផ្គត់ផ្គង់​វិស័យ​សំណង់​ដែល​កំពុង​រីក​លូតលាស់ នេះ​គឺជា​អ្វី​ដែល​យើង​នឹង​បង្ហាញជូន​ក្នុង​ពិព័រណ៍​នេះ​”​។

កម្មវិធី​នេះ​នឹង​បើក​ឲ្យ​មហាជន​ចូល​ទស្សនា​ដោយ​សេរី​។ ពិធី​សម្ពោធ​បើក​ជា​ផ្លូវការ ក្រោម​អធិបតីភាព​របស់ លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម នឹង​ប្រព្រឹត្តិ​ទៅ​នៅ​ថ្ងៃទី​២៩ ខែមិថុនា វេលា​ម៉ោង​៩​ព្រឹក នៅ​កោះ​ពេជ្រ អគារ K និង L៕​

Source: Kampuchea Thmey Daily