ភ្នំពេញ ៖ បច្ចុប្បន្ន សាលារាជធានីភ្នំពេញកំពុងយកចិត្តទុកដាក់ពីបញ្ហា ការកកស្ទះចរាចរណ៍និងរៀបចំសណ្ដាប់ធ្នាប់នៅតាមបណ្ដាមហាវិថីតូចធំ និង ផ្លូវតូចៗមួយចំនួនធំក្នុងមូលដ្ឋាន ទាំង ១២ខណ្ឌ តែផ្ទុយទៅវិញ អាជ្ញាធរខណ្ឌទួលគោក ដែលមាន លោក ឯក ឃុនឌឿនអភិបាល នៃគណៈអភិបាលខណ្ឌទួលគោក មិនបានយកចិត្តទុកដាក់នៅបញ្ហាសណ្ដាប់ធ្នាប់ និងបទបញ្ជា របស់ លោក ឃួង ស្រេង អភិបាល នៃគណៈអភិបាលរាជធានីភ្នំពេញ ឡើយ បែរជាបណ្ដែតបណ្ដោយឲ្យ អាជីវក ដាក់តាំងលក់ ផ្លែឈើពេញរបង ម៉ុងឌីយ៉ាល់ និងចតរ៉ឺម៉កពេញនឹងដោយមិនគិតពីការធ្វើដំណើររបស់បងប្អូនប្រជាពលរដ្ឋឆ្លងកាត់ទៅមកដែលកកស្ទះចរាចរណ៍ ជារៀងរាល់ថ្ងៃឡើយ។
ជាក់ស្ដែង នៅតាមបណ្ដោយផ្លូវលេខ២៣០ នៅចំណុចជុំវិញផ្សារនាគមាស ស្ថិតនៅមូលដ្ឋានសង្កាត់ផ្សារដើមគរ ខណ្ឌទួលគោក អាជីវកយកផ្លូវ លើសពី១ភាគ៣ និងនាំគ្នាយករបង ម៉ុង ឌីយ៉ាល់ ធ្វើជាកន្លែងលក់និងចតរ៉ឺម៉កពេញផ្លូវតែម្ដង អាជ្ញាធរមិនបានចុះរៀបចំឲ្យមានសណ្ដាប់ធ្នាប់ឡើយ ដែលបង្កឲ្យបងប្អូនប្រជាពលរដ្ឋ ធ្វើដំណើរឆ្លងកាត់បណ្ដោយផ្លូវនេះ កកស្ទះចរាចរណ៍ទាំងព្រឹក ទាំងល្ងាចតែម្ដង។
អ្នកធ្វើដំណើរតាមបណ្ដោយផ្លូវនេះ សំណូមពរដល់អាជ្ញាធរមានសមត្ថកិច្ចជួយយកចិត្តទុកដាក់ចំពោះបញ្ហានេះផង ដែលក្រុមអាជីវករបានយកចិញ្ចើមផ្លូវដាក់តាំងលក់ពេញផ្លូវបានបង្កឲ្យមានការកកស្ទះចរាចរណ៍ជាខ្លាំង ជារៀងរាល់ថ្ងៃជាក់ស្ដែង នៅតាមបណ្ដោយផ្លូវលេខ ២៣០នេះតែម្ដង។
ប្រជាពលរដ្ឋបានសូមពរឲ្យលោក ឯក ឃុនឌឿន អភិបាលខណ្ឌទួលគោក ជួយយកចិត្តទុកដាក់ផ្លូវនេះផង ព្រោះអីស្ទះពិបាកធ្វើដំណើរឆ្លងកាត់ទៅមកណាស់៕
Source: Kampuchea Thmey Daily
0 Comments