ភ្នំពេញ ៖ លោក នុត ពុធដារ៉ា ជំនួយការសម្តេចតេជោ នាយករដ្ឋមន្ត្រី និងជាអភិបាលខណ្ឌដង្កោ កាលពីព្រឹកថ្ងៃព្រហស្បតិ៍ ០២រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣១ ខែឧសភា ឆ្នាំ២០១៨ បានចុះជួបសំណេះសំណាលសួរសុខទុក្ខ និងស្វែងយល់ពីសំណើ សំណូមពរ និងតម្រូវការនានារបស់បងប្អូនប្រជាពលរដ្ឋ រស់នៅភូមិសំបួរ ភូមិខ្វា និងភូមិថ្មី សង្កាត់ដង្កោ ខណ្ឌដង្កោ ដើម្បីយកមកដោះស្រាយជូនបានទាន់ពេលវេលា។
ក្នុងឱកាសនោះ លោកអភិបាល ក៏បានផ្តាំផ្ញើការសាកសួរសុខទុក្ខបងប្អូនទាំងអស់ពីសំណាក់សម្តេចតេជោ និងសម្តេចកិត្តិព្រឹទ្ធបណ្ឌិត ដែលជានិច្ចកាលសម្តេចទាំងទ្វេរតែងបានគិតគូរពីការលំបាករបស់បងប្អូនប្រជាពលរដ្ឋទាំងអស់នៅមូលដ្ឋាន។
លោក នុត ពុធដារ៉ា ក៏បានលើកឡើងអំពីការអភិវឌ្ឍន៍រីកចម្រើនឥតឈប់ឈរពីមួយថ្ងៃទៅមួយថ្ងៃ របស់ប្រទេសជាតិ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានខិតខំរំដោះប្រទេសជាតិពីភ្លើងសង្គ្រាមឲ្យមានសុខសន្តិភាពពេញបរិបូរណ៍ និងមានការអភិវឌ្ឍលើគ្រប់វិស័យ ធ្វើឲ្យបងប្អូនប្រជាពលរដ្ឋមានជីវភាពរស់នៅធូរធារ។
បងប្អូនប្រជាពលរដ្ឋទាំងអស់ បានធ្វើការថ្លែងអំណរគុណដល់ថ្នាក់ដឹកនាំគ្រប់លំដាប់ថ្នាក់ និងបានប្តេជ្ញាចិត្តគាំទ្រសម្តេចតេជោ ហ៊ុន សែន ជានាយករដ្ឋមន្ត្រីសម្រាប់អាណត្តិក្រោយៗទៀត ដើម្បីបន្តថែរក្សាសុខសន្តិភាព និងការអភិវឌ្ឍន៍បន្តទៀត៕
Source: Kampuchea Thmey Daily
0 Comments