លោក ហ៊ុន ម៉ា​ណែ​ត ​ជួប​សម្តែង​ការគួរសម​ជាមួយ ឯកឧត្តម ហ្គោ ចុក​តុង​ អតីត​នាយករដ្ឋមន្ត្រី​នៃ​សាធារណរដ្ឋ​សិង្ហ​បុរី

សិង្ហ​បុរី​ ​៖ ​នៅ​រសៀល ថ្ងៃទី​០៨ ខែមិថុនា ឆ្នាំ​២០១៨ ដែលជា​ថ្ងៃទី​២ នៃ​ដំណើរ​ទស្សនកិច្ច​សិក្សា​ផ្លាស់ប្តូរ​បទពិសោធន៍ “​លី​ក្វាន់​យូរ​” លោក ហ៊ុន ម៉ា​ណែ​ត បាន​ជួប​សម្តែង​ការគួរសម​ជាមួយ ឯកឧត្តម ហ្គោ ចុក​តុង (Emeritus Senior Minister Goh Chok Tong) អតីត​នាយករដ្ឋមន្ត្រី​នៃ​សាធារណរដ្ឋ​សិង្ហ​បុរី​។​

​ក្នុងជំនួប​នោះ ឯកឧត្តម អតីត​នាយករដ្ឋមន្ត្រី បាន​រំលឹក​អំពី​ការងារ​មួយចំនួន​ជាមួយ​ប្រទេស​កម្ពុជា​ក្នុង​ដំណាក់កាល​​ ដែល​ឯកឧត្តម កាន់​តំណែង​ជា​នាយករដ្ឋមន្ត្រី ហើយ​ជាពិសេស​ឯកឧត្តម បាន​រំលឹក​អនុស្សាវរីយ៍​ដ៏​ល្អ​ជាមួយ​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​។ ឯកឧត្តម បាន​សង្កត់ធ្ងន់​ថា មានតែ​ស្ថិរភាព និង​សន្តិភាព ទើប​ធ្វើឱ្យ​ប្រទេស​មានការ​អភិវឌ្ឍ ហើយ​ឯកឧត្តម សង្ឃឹមថា​ប្រទេស​កម្ពុជា នឹង​បន្ត​ការអភិវឌ្ឍ​ទៅមុខ​កាន់តែ​លឿន​នាពេល​អនាគត​។

លោក ហ៊ុន ម៉ា​ណែ​ត បាន​ថ្លែងអំណរគុណ​ដល់​សាធារណរដ្ឋ​សិង្ហ​បុរី ដែលជា​និច្ចកាល​ជា​ដៃគូ​ចែករំលែក​បទពិសោធន៍ និង​សហប្រតិបត្តិការ​ដ៏​ល្អ​របស់​ប្រទេស​កម្ពុជា និង​សង្ឃឹមថា​ប្រទេស​ទាំងពីរ​នឹង​បន្ត​រក្សា​ទំនាក់ទំនង​ល្អ​តទៅទៀត​នាពេល​អនាគត​។​

​សូមបញ្ជាក់ថា ឧ​ត្ត​ម​សេនីយ៍​ឯក ហ៊ុន ម៉ា​ណែ​ត នាយរង​សេនាធិការ​ចំរុះ និង​ជា​មេបញ្ជាការរង​កងទ័ព​ជើងគោក​នៃ​កងយោធពល​ខេមរភូមិន្ទ នឹងធ្វើ​ទស្សនកិច្ច​នៅ​ប្រទេស​សិង្ហបូរី ក្នុង​កម្មវិធី​ទស្សនកិច្ច​សិក្សា​ផ្លាស់ប្តូរ​បទ ពិសោធន៍ “​លី​ក្វាន់​យូរ​” លើក​ទី ៦៤ រយៈពេល​៤​ថ្ងៃ​គឺ​ចាប់ពី​ថ្ងៃទី​៧ ដល់​ថ្ងៃទី​១០ ខែមិថុនា ឆ្នាំ​២០១៨​។ នៅក្នុង​កឡុង​ពេល​ទស្សនកិច្ច​នេះ ឧ​ត្ត​ម​សេនីយ៍​ឯក ហ៊ុន ម៉ា​ណែ​ត នឹង​ជួប​ជាមួយ​ថ្នាក់ដឹកនាំ រួមមាន ឯកឧត្តម លី សៀន​ឡុង (Lee Hsien Loong) នាយករដ្ឋមន្ត្រី​នៃ​ប្រទេស​សិង្ហបូរី ឯកឧត្តម ហ្គោ ចុក​តុង (Emeritus Senior Minister Goh Chok Tong) អតីត​នាយករដ្ឋមន្ត្រី​ប្រទេស​សិង្ហបូរី និង​ឯកឧត្តម​បណ្ឌិត អ៊ឹង អេង (Dr Ng Eng Hen) រដ្ឋមន្ត្រី​ការពារជាតិ​សិង្ហបូរី និង​ឥស្សរជន​សំខាន់ៗ​នៃ​សាធារណរដ្ឋ​សិង្ហ​បុរី​ផងដែរ៕



Source: Kampuchea Thmey Daily