កាលពីថ្ងៃអង្គារ ប្រព័ន្ធផ្សព្វផ្សាយរដ្ឋរបស់កូរ៉េខាងជើង បានសរសើរប្រទេសសិង្ហបុរី នៅពេលដែលពួកគេបានផ្សាយអំពីដំណើរទស្សនកិច្ចរបស់លោកគីមជុងអ៊ុន ទៅកាន់កន្លែងទាក់ទាញទេសចរណ៍កំពូលៗរបស់ប្រទេសនេះ។
ពីរបីម៉ោងមុនពេលកិច្ចប្រជុំកំពូលជាប្រវត្តិសាស្ត្ររបស់គាត់ជាមួយលោក ដូណាល់ ត្រាំ, លោក គីម បានឆ្លៀតពេលពីការត្រៀមខ្លួនដើម្បីដើរលំហែនៅតាមមាត់ទឹក។
គាត់ត្រូវបានអមដំណើរដោយរដ្ឋមន្ត្រីក្រសួងការបរទេសនិងអប់រំរបស់ប្រទេសសិង្ហបុរីហើយត្រូវបានហ៊ុំព័ទ្ធដោយក្រុមមន្ត្រីខណៈពេលដែលប៉ូលិសបានព្យាយាមរារាំងអ្នកកាសែត។
ប៉ុន្តែរូបភាពរបស់មេដឹកនាំវ័យក្មេងរូបនេះត្រូវបានគ្រប់គ្រងនិងរៀបចំដោយប្រុងប្រយ័ត្ននៅក្នុងប្រទេសកូរ៉េខាងជើងហើយប្រព័ន្ធផ្សព្វផ្សាយដែលធ្វើដំណើរមកពីទីក្រុងព្យុងយ៉ាងគឺបានចូលយ៉ាងជិតជាមួយមេដឹកនាំរបស់ពួកគេ។
មិនមានរូបភាពតិចជាង១៤សន្លឹកទេនៃដំណើរទស្សនកិច្ចរបស់គាត់ទៅកាន់សណ្ឋាគារ កាស៊ីណូនិងមជ្ឈមណ្ឌលសន្និបាត Marina Bay Sands (MBS) ហើយទិដ្ឋភាពផ្សេងទៀតត្រូវបានបោះពុម្ពនៅលើទំព័រមុខនៃកាសែត Rodong Sinmun ។
វាបានបង្ហាញពីគាត់ញញឹមនៅលើទីតាំង Sky Park របស់ MBS ។ កាសែតបានបន្ថែមថា គាត់ “បានរៀនសូត្រអំពីការអភិវឌ្ឍសង្គមនិងសេដ្ឋកិច្ចនៃប្រទេសសិង្ហបុរី”។
រូបភាពផ្សេងទៀតបានបង្ហាញពីអ្នកឈរមើលបានថតរូបលោកគីមដែលបានធ្វើដំណើរតែពីរលើកប៉ុណ្ណោះចេញពីឧបទ្វីបកូរ៉េដែលកាលពីលើកមុនគាត់បានទៅប្រទេសចិន។
កាសែតនេះបានបន្ថែមថា ដោយសរសើរបរិស្ថានស្អាតនិងស្រស់បំព្រងរបស់ប្រទេសសិង្ហបុរី, លោកគីមបានប្តេជ្ញា “រៀនសូត្រពីចំណេះដឹងនិងបទពិសោធន៏ល្អៗរបស់ប្រទេសសិង្ហបុរីក្នុងវិស័យផ្សេងៗនាពេលអនាគត”៕ AFP
Source: Kampuchea Thmey Daily
0 Comments