គណៈកម្មការប្រកួតបាល់ទាត់ជាតិកម្ពុជា (CNCC) បានជូនដំណឹងដល់ភាគីនិងក្លិបពាក់ព័ន្ធកាលពីថ្ងៃច័ន្ទ ទី១១ មិថុនា ដើមសប្ដាហ៍នេះថា ការចុះបញ្ជីឈ្មោះកីឡាករសម្រាប់ការប្រកួតពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១២ (Hun Sen Cup) វគ្គជម្រុះថ្នាក់ជាតិ ឆ្នាំ២០១៨ នឹងបិទនៅថ្ងៃទី២៩ ខែមិថុនា ខាងមុខ។
លោក ឆាំង ពិសិដ្ឋ លេខាប្រតិបត្តិ CNCC លើកឡើងប្រាប់ថា ក្រុម និង ក្លិបនីមួយៗ អាចចុះបញ្ជីកីឡាករច្រើនបំផុតចំនួន៣០រូប។ ពានរង្វាន់សម្ដេចតេជោ ហ៊ុន សែន ថ្នាក់ជាតិ រដូវកាល២០១៨ នឹងចាប់ផ្ដើមវគ្គ១៦ក្រុមនៅថ្ងៃទី១១ ខែកក្កដា ដោយមានចំនួនពីរជើង។
យោងតាមសេចក្តីជូនដំណឹងរបស់ CNCC ពានរង្វាន់សម្តេចតេជោ ឆ្នាំនេះនឹងរៀបចំចំនួន២វគ្គដោយវគ្គទី១ ហៅថាវគ្គជម្រុះថ្នាក់ខេត្ត និងវគ្គទី២ហៅថាវគ្គជម្រុះថ្នាក់ជាតិ ដែលការប្រកួតចាប់ពីថ្ងៃទី៧ ខែមីនា រហូតដល់ថ្ងៃទី៦ខែតុលា ឆ្នាំ២០១៨។ ចំពោះវគ្គជម្រុះតាមថ្នាក់ខេត្តបែងចែក ការប្រកួតជា២វគ្គខុសគ្នាទៀតគឺវគ្គជម្រុះតាមពូល (វគ្គជម្រុះបឋម) និងជម្រុះចុងក្រោយ។
វគ្គជម្រុះតាមពូលថ្នាក់ខេត្តមានទាំងអស់២៧ក្រុមបែងចែកជា៥ពូល ជាលទ្ធផលក្រុមល្អជាងគេ ពីលេខ១ដល់លេខ៣ បូកទាំងក្រុមលេខ៤ល្អបំផុតក្នុងចំណោមពូលទាំង៥មានឈ្មោះឡើងទៅវគ្គ១៦ក្រុមចុងក្រោយ។ ចំណែកវគ្គជម្រុះជុំចុងក្រោយ យកក្រុមទាំង១៦ចាប់គូគ្នាប្រកួតជាបន្តបន្ទាប់ រហូតដល់វគ្គផ្ដាច់ព្រ័ត្រ។ ក្រុមដែលឡើងដល់វគ្គពាក់កណ្ដាលផ្ដាច់ព្រ័ត្រ (៤ក្រុមខ្លាំងជាងគេ) មានឈ្មោះឡើងទៅប្រកួតដណ្តើមជើងឯកថ្នាក់ជាតិ (យុវជនសាលាបាល់ទាត់ជាតិឈ្នះជើងឯក)។ ចំណែកក្រុមខ្លាំងជាងគេទាំង៤មាន U18សាលាបាល់ទាត់ជាតិ គីរីវង់អែហ្វស៊ី កំពត និងកោះកុង។
ចំណែកការប្រកួតជើងឯកថ្នាក់ជាតិវិញ មានក្រុមចំនួន១២ជាសមាជិកពានរង្វាន់លីគកំពូលកម្ពុជានៅរង់ចាំបូកជាមួយក្រុមចំនួន៤ខ្លាំងជាងគេ មកពីការប្រកួតជម្រុះជើងឯកថ្នាក់ខេត្ត។ ដោយចាប់ឆ្នោតរើសគួប្រកួតប្តូរទឹកដីគ្នា (ចំនួន២លើក) ក្នុងវគ្គ៨ក្រុមចុងក្រោយរហូតដល់វគ្គផ្ដាច់ព្រ័ត្រតែម្តង។ យ៉ាងណាក្តីវគ្គពាក់កណ្ដាលផ្ដាច់ព្រ័ត្រនិងវគ្គផ្ដាច់ព្រ័ត្រធ្វើឡើងនៅពហុកីឡដ្ឋានជាតិក្នុងរាជធានីភ្នំពេញ ទាំងក្នុងវគ្គជម្រុះជើងឯកថ្នាក់ខេត្តនិងវគ្គជម្រុះជើងឯកថ្នាក់ជាតិក្នុងពានរង្វាន់នេះ។
គិតត្រឹមពេលនេះកម្មវិធីប្រកួតថ្នាក់ជាតិ វគ្គ១៦ក្រុមចុងក្រោយ ត្រូវបាន CNCC ចាប់ឆ្នោតជ្រើសរើសគូរួចហើយដែលមានដូចជា ស្វាយរៀង ជួបក្រុមវិសាខា ហើយក្រុមខេត្តកោះកុង ប៉ះក្រុមយុវជនសាលាបាល់ទាត់ជាតិបាទី ខណៈក្រុមសូលទីឡូអង្គរ ជួបក្រុមអង្គរថាយហ្គឺរ ហើយក្រុមអគ្គីសនីកម្ពុជា ប៉ះក្រុមភ្នំពេញក្រោន ក្រុមណាហ្គាវើល ជួបក្រុមកំពត ស្របពេលក្រសួងការពារជាតិ ជួបអាស៊ីអឺរ៉ុប ហើយក្រុមអគ្គស្នងការដ្ឋាននគរបាលជាតិ ប៉ះក្រុមគីរីវង់អែហ្វស៊ី និងក្រុមវេស្ទើនភ្នំពេញ ប៉ះក្រុមបឹងកេត។ វគ្គនេះធ្វើឡើងចំនួន២ជើង ដោយជើងទី១ ធ្វើឡើងនៅថ្ងៃទី១១ កក្កដា និងជើងទី២ ធ្វើឡើង១៨ កក្កដា ខាងមុខ៕
Source: Kampuchea Thmey Daily
0 Comments