បន្ទាយមានជ័យ ៖ នៅព្រឹកថ្ងៃទី១១ ខែមិថុនា ឆ្នាំ២០១៧នេះ នៅតារាងបាល់ទាត់សាកលវិទ្យាល័យមានជ័យ ស្ថិតក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យបានបិទការប្រកួតកីឡាបាល់ទាត់ពានរង្វាន់ជើងឯកសាកលវិទ្យាល័យមានជ័យប្រចាំឆ្នាំ២០១៨។
ពិធីនេះមានការចូលរួម លោកសួន បវរ អភិបាលខេត្តបន្ទាយមានជ័យ លោកសំ ងាសាកលវិទ្យាល័យធិការនៃសាកលវិទ្យាល័យមានជ័យ គ្រប់មន្ទីរអង្គភាព លោកគ្រូ និងអ្នកគ្រូ និស្សិត ជាច្រើននាក់ក៏បានចូលរួមផងដែរ។
ក្នុងនោះលោកសំ ងា បានមានប្រសាសន៍ថា ការប្រកួតកីឡាបាល់ទាត់ពានរង្វាន់ជើងឯកសាកលវិទ្យាល័យមានជ័យប្រចាំឆ្នាំ២០១៨នេះ គឺការប្រកួតឈរលើស្មារតីកីឡានាំមកសុខភាព កីឡានាំមកនូវសាមគ្គី កីឡានាំមកនូវភាពវ៉ៃឆ្លាតហើយឆ្នាំ២០១៨នេះ សាកលវិទ្យាល័យមានជ័យមានក្រុមកីបាល់ទាត់ចូលរួមប្រកួតចំនួន៥ក្រុម មានចំនួន៨០នាក់ ដែលបានជ្រើសរើសពីមហាវិទ្យាល័យ៥ចូលរួមប្រកួតមាន ក្រុមមហាវិទ្យាល័យមនុស្សសាស្ត្រនិងភាសា ២ មហាវិទ្យាល័យកសិកម្មនិងកែច្នៃអាហារ ៣មហាវិទ្យាល័យសិល្បៈមនុស្សវិទ្យា ៤មហាវិទ្យាល័យវិទ្យាសាស្ត្របច្ចេកទេសវិទ្យា ៥មហាវិទ្យាល័យសិល្បៈមនុស្សវិទ្យាសាស្ត្រនិងភាសាដើម្បីដណ្តើមពានរង្វាន់សាកលវិទ្យាល័យមានជ័យឆ្នាំ២០១៨នេះ។
លោកសំ ងា បានបញ្ជាក់ទៀតថា ការប្រកួតនេះចាប់ផ្តើមពីថ្ងៃទី២៧ ខែឧសភា និងបញ្ចប់នៅថ្ងៃទី១០ខែមិថុនាឆ្នាំ២០១៨។ លោកសំ ងា បានបញ្ជាក់ទៀតថា ឆ្លងតាមការប្រកួតដែលមានរយៈពេល១៤ថ្ងៃនេះ យ៉ាងស្វិតស្វាញនេះជ័យលាភីលេខ១បានទៅលើក្រុមមហាវិទ្យាល័យកសិកម្មនិងច្នៃអាហារ លេខ២បានទៅលើក្រុមមហាវិទ្យាល័យវិទ្យាសាស្ត្រ និង បច្ចេកវិជ្ជាលេខ៣បានទៅលើក្រុមមហាវិទ្យាល័យគ្រឿងយន្តកសិកម្ម។
ក្នុងនោះដែរ លោកសួន បវរ បានមានប្រសាសន៍ទៅកាន់ក្រុមកីឡាបាល់ទាត់ទាំងអស់ថាការបើកប្រកួតបាល់ទាត់ដណ្តើមពានរង្វាន់ជើងឯកសាកលវិទ្យាល័យមានជ័យប្រចាំឆ្នាំ២០១៨នោះគឺដើម្បីលើកកំពស់ការយកចិត្តទុកដាក់ទៅលើវិស័យកីឡាគ្រប់ប្រភេទរបស់ខេត្តបន្ទាយមានជ័យ ក៏ដូចក្នុងន័យបង្ហាញពីស្មារតីស្នេហា និង លើកស្ទួយវិស័យកីឡាឲ្យបានកាន់តែរស់រវើកនិងរីកចម្រើនបន្ទាប់ពីបាត់បង់ក្នុងទសវត្សន៍ទី៧០សម័យខ្មែរក្រហមឆ្នាំ១៩៧៥ដល់ឆ្នាំ១៩៧៩។ លោកសួនបវរបានបញ្ជាក់ទៀតថា ការប្រកួតបាល់ទាត់ដណ្តើមពានរង្វាន់នោះការប្រកួតចាញ់ឈ្នះវាមានសារៈសំខាន់ណាស់សម្រាប់ការប្រកួត ប៉ុន្តែស្មារតីស្រឡាញ់រាប់អានគ្នាជាបងប្អូននិងសាមគ្គីភាពរវាងកីឡាករនិងកីឡាករ រវាងក្រុមមួយនិងក្រុមមួយកាន់តែមានសារៈសំខាន់ថែមទៀត ព្រោះវិស័យកីឡាកន្លងមកបានរួមចំណែកយ៉ាងខ្លាំង សម្រាប់សន្តិភាពលើលោក។
ហើយសព្វថ្ងៃនេះលោកសួនបវរកំពុងបំផុស ប្រធានមន្ទីរ កងរាជអាវុធហត្ថ អង្គភាព ក្រុមហ៊ុន អាជីវករ និង សិស្សានុសិស្ស យុវជន យុវនារីនៅតាមមូលដ្ឋាន ព្រោះកម្លាំងយុវជននិងយុវនារីជាចលករនិងជាសសរទ្រូងរបស់ប្រទេសជាតិធ្វើយ៉ាងណាឲ្យយុវជននិងយុវនារីចូលលេងកីឡាគ្រប់ប្រភេទឲ្យបានច្រើននិងសកម្មផងជៀសវាងពីការជួញដូរមនុស្ស ការជួញដូរគ្រឿងញៀន និងការប្រើប្រាស់គ្រឿងញៀន អបាយមុខផ្សេងៗ ក្មេងទំនើងជាដើម។
លោក សួន បវរ បានបញ្ជាក់ទៀតថា សព្វថ្ងៃនេះសម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃប្រទេសកម្ពុជាកំពុងយកចិត្តទុកដាក់នឹងលើកទឹកចិត្តដល់វិស័យកីឡាយ៉ាងខ្លាំងក្លាបំផុតកត្តាទាំងអស់នេះហើយ បានឆ្លុះបញ្ចាំងឲ្យឃើញពីការយកចិត្តទុកដាក់ខ្ពស់ក្នុងការអភិវឌ្ឍលើវិស័យកីឡាយ៉ាងខ្លាំងរបស់សម្តេចតេជោហ៊ុន សែន ដើម្បីត្រៀមខ្លួនជាម្ចាស់ផ្ទះក្នុងការប្រកួតស៊ីហ្គេមឆ្នាំ២០២៣ខាងមុខនេះ។
នៅទីបញ្ចប់លោកសួន បវរ បានធ្វើការជួយឧបត្ថម្ភដល់ក្រុមកីឡាទាំង៥ក្រុមក្នុង១ក្រុម៤០ម៉ឺនរៀល សម្រាប់អាជ្ញាកណ្តាល៣នាក់ ក្នុង១នាក់បាន១០ម៉ឺនរៀលនិងក្រុមកីឡាជាតិ១លានរៀលទៀតផង៕
Source: Kampuchea Thmey Daily
0 Comments