កំពង់ធំ ៖ ថវិកាមួយចំនួនសម្រាប់កសាងស្លាកសម្គាល់នៅខាងមុខផ្នូរសពយុទ្ធជនពលីចំនួន១០៤ស្លាក នៅវិមានយុទ្ធជនពលី ដើម្បីជាតិមាតុភូមិស្ថិតនៅក្នុងកំពង់ធំ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន និង សម្តេចកិត្តិព្រឹទ្ធិបណ្ឌិត តាមរយៈលោក ហ៊ុន ម៉ាណែត នាយរងសេនាធិការចម្រុះនៃកងយោធពលខេមរភូមិន្ទ និងជាមេបញ្ជាការរងកងទ័ពជើងគោក ត្រូវបានប្រគល់ជូនតំបន់ប្រតិបត្តិការសឹករងកំពង់ធំនៅថ្ងៃទី០១ ខែមិថុនា ឆ្នាំ២០១៨។
លោកឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានមានប្រសាសន៍ថា នេះគឺជាគិតគូរយកចិត្តទុកដាក់ចំពោះកិត្តិយស និងការដឹងគុណចំពោះការធ្វើពលីកម្មដ៏មានតម្លៃរបស់អតីតយុទ្ធជនដើម្បីបុព្វហេតុជាតិមាតុភូមិ និងប្រជាជន។ ជាមួយគ្នានោះ លោកបានថ្លែងអំណរគុណយ៉ាងជ្រាលជ្រៅចំពោះប្រមុខរាជរដ្ឋាភិបាល ដែលបានយកចិត្តទុកដាក់ចំពោះកងទ័ព អតីតយុទ្ធជន យុទ្ធជនពលី និង គ្រួសារកងទ័ពតាមរយៈការលើកកម្ពស់កម្រិតជីវភាពនិងកិត្តិយសរបស់កងទ័ព អតីតយុទ្ធជន យុទ្ធជនពលី និងគ្រួសារកងទ័ព ហើយក៏បានគោរពថ្លែងអំណរគុណយ៉ាងជ្រាលជ្រៅចំពោះសម្តេចតេជោ និងសម្តេចកិត្តិព្រឹទ្ធិបណ្ឌិត តាមរយៈលោក ហ៊ុន ម៉ាណែត ដែលជានិច្ចកាលតែងតែយកចិត្តទុក្ខដាក់លើវិស័យការពារជាតិតាមរយៈការគិតគូយកចិត្តទុកដាក់ចំពោះការហ្វឹកហ្វឺន ការកសាងអង្គភាពទ័ព និងការស្នាក់នៅហូបចុករបស់កងទ័ព គ្រួសារកងទ័ព និងក្នុងអង្គភាពដែលកន្លងមកសម្តេចបានផ្តល់នូវ ស៊ីម៉ងត៍ ដែក គ្រឿងសម្ភារៈបរិក្ខារពេទ្យ មី អង្ករ និងគ្រឿងឧបភោគបរិភោគជាច្រើនទៀត។
សូមបញ្ជាក់ថា ប្រធានសមាគមអតីតយុទ្ធជនខេត្តកំពង់ធំ និងក្រុមការងារទាំងអស់ ដែលបានយកចិត្តទុកដាក់ធ្វើសកម្មភាពការងារសមាគមអតីតយុទ្ធជនក្នុងខេត្តកំពង់ធំយ៉ាងសកម្មប្រកបដោយទឹកចិត្ត និងគុណតម្លៃខ្ពស់តាមរយៈការចុះស្វែងយល់ពីសុខទុក្ខ ជីវភាពរស់នៅរបស់អ៊ំពូមីងអតីតយុទ្ធជន ចុះជួបសំណេះសំណាល សាកសួសុខទុក្ខ និងប្រគល់ជូននូវគ្រឿងឧបភោគ បរិភោគ យកចិត្តទុកដាក់សម្របសម្រួលការព្យាបាល និងជាពិសេសបានចុះជួយកសាងផ្ទះជូនអ៊ំពូមីងអតីតយុទ្ធជន ដែលមានជីវភាពខ្វះខាត ដែលទាំងនេះគឺជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា និងថ្នាក់ដឹកនាំសមាគមអតីតយុទ្ធជនកម្ពុជា ព្រមទាំងសប្បុរសជនដទៃទៀត។ នេះសបញ្ជាក់ឱ្យឃើញថា ជាការគោរពដឹងគុណ និងការលើកតម្កើងទាំងកិត្តិយស និងជីវភាពរបស់អ៊ំពូមីងអតីតយុទ្ធជន ដែលបានលះបង់សាច់ស្រស់ឈាមស្រស់ លះបង់គ្រួសារចូលរួមក្នុងបុព្វហេតុសង្គ្រោះ និងការពារជាតិ មាតុភូមិឱ្យរួចផុតចេញពីភ្លើងសង្គ្រាម ហើយមានឱកាសថ្មី ទទួលបានសុខសន្តិភាព ស្ថិរភាព ការអភិវឌ្ឍរីកចម្រើន និងការរស់បានសុខសាន្ត និងសម្បូរសប្បាយរីករាយ របស់ប្រជាពលរដ្ឋដូចសព្វថ្ងៃនេះ។
ការប្រគល់អំណោយដើម្បីកសាងស្លាកសម្គាល់នៅខាងមុខផ្នូរសពយុទ្ធជនពលី បានធ្វើឡើងបន្ទាប់ពីលោក ហ៊ុន ម៉ាណែត អគ្គលេខាធិការរងសមាគមអតីតយុទ្ធជនបានអញ្ជើញគោរពវិញ្ញាណក្ខន្ធយុទ្ធជនពាក់លីក្នុងឱកាស ដែលលោកហ៊ុន ម៉ាណែត អញ្ជើញក្នុងពិធីសំណេះសំណាលជាមួយអតីតយុទ្ធជននៅខេត្តកំពង់ធំកាលពីថ្ងៃទី១៦ ខែឧសភា ឆ្នាំ២០១៨ កន្លងទៅនេះ៕
Source: Kampuchea Thmey Daily
0 Comments