រថយន្តហ៊ីយ៉ាន់ដាយ បើកឆ្លងផ្លូវ ហ្វ្រាំងមិនស៊ី បុករថយន្ត២គ្រឿងខូចខាតយ៉ាងដំណំ

ភ្នំពេញ ៖ រថយន្តដឹកដីខ្សាច់ម៉ាកហ៊ីយ៉ាន់ដាយបើកឆ្លងផ្លូវជាន់ហ្វ្រាំងមិនស៊ី បុករថយន្ត២គ្រឿងខូចខាតយ៉ាងដំណំសំណាងល្អ មិនមានអ្នករបួស។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១០ព្រឹកថ្ងៃទី១ខែមិថុនា ឆ្នាំ២០១៨ នៅចំណុចផ្លូវជាតិលេខ៦អា កែងផ្លូវបេតុងភូមិគៀនឃ្លាំង សង្កាត់ជ្រោយចង្វារខណ្ឌជ្រោយចង្វារ រាជធានីភ្នំពេញ។

រថយន្តបង្កម៉ាកហ៊ីយ៉ាន់ដាយពណ៌សពាក់ស្លាកលេខភ្នំពេញ3C 7831។ រថយន្តរងគ្រោះទី១ម៉ាកម៉ាស្តាពណ៌ទឹកប្រាក់ពាក់ស្លាកលេខភ្នំពេញ2AA 5849។ រថយន្តរងគ្រោះទី២ម៉ាកកាមរីពណ៌ស្លែពាក់ស្លាកលេខភ្នំពេញ2B 1841ជារថយន្តរបស់សាលាបង្រៀនបើកបរដៃចំណាប់ អ្នកបើករថយន្តទាំង៣គ្រឿងមិនត្រូវបានស្គាល់ឈ្មោះនោះទេ ហើយក៏មិនមានអ្នកណាម្នាក់រងរបួសនោះទេ។

ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុមានរថយន្តពីរគ្រឿងបើកមុខក្រោយគ្នាតាមបណ្តោយផ្លូវបេតុងពីលិចទៅកើត ដោយរថយន្តកាមរីបើកមុខរថយន្តហ៊ីយ៉ាន់ដាយបើកក្រោយ ខណៈមកដល់ចំណុចកើតហេតុខាងលើរថយន្តកាមរីបានឆ្លងផុតមុនស្របពេលនោះក៏មានរថយន្តរងគ្រោះម៉ាកម៉ាស្តាបើកក្នុងទិសដៅពីជើងទៅត្បូងតាមផ្លូវជាតិកេខ៦អា រថយន្តបង្កជាន់ហ្វ្រាំងមិនស៊ី ក៏ជ្រុលចង្កូតទៅបុករថយន្តម៉ាស្តាចំហៀងខាងស្តាំពេញទំហឹង រួចរថយន្តបង្កក៏ជ្រុលទៅរថយន្តកាមរីរបស់សាលាបង្រៀនបើកដៃចំណាប់បណ្តាលឲ្យរងការខូចខាតទាំង២គ្រឿងយ៉ាងដំណំ ចំណែកអ្នកបើករថយន្តទាំង៣នាក់មិនរងរបួសនោះទេ។

ក្រោយពេលកើតហេតុ ម្ចាស់រថយន្តទាំងបីគ្រឿង បានសម្របសម្រួលគ្នានៅកន្លែងកើតហេតុ ដោយភាគីខាងរថយន្តបង្កចេញថ្លៃជួសជុលរថយន្តរងគ្រោះទាំង២គ្រឿងដើម្បីបញ្ចប់រឿង៕