ភ្នំពេញ ៖ យុវជនម្នាក់ បន្ទាប់ពីផឹកស៊ីស្រវឹង បានបើករថយន្តលឿនជ្រុលបុកបង្គោលភ្លើងបំភ្លឺផ្លូវបាក់អស់មួយដើមរាបស្មើដល់ដី បណ្តាលអោយដាច់ភ្លើងជាង១០បង្គោល ហើយរថយន្តដាច់កាឡេបែកកង់ធ្លាយធុងទឹកដេកស្ងៀមនៅនឹងកន្លែង ត្រូវសមត្ថកិច្ចឃាត់បានតៃកុងភ្លាមៗកាលពីវេលាម៉ោង១០និង៣០នាទីយប់ថ្ងៃទី៣១ ខែឧសភា ឆ្នាំ២០១៨ នៅតាមបណ្តោយផ្លូវទំនប់កប់ស្រូវទល់មុខរោងចក្រស្បែកជើងស្ថិតនៅភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ។
រថយន្តបង្កម៉ាកតូយ៉ូតា VIGOពណ៌ទឹកប្រាក់ពាក់ស្លាកលេខAT16 . 2,0015បើកបរដោយយុវជនម្នាក់មិនប្រាប់ឈ្មោះ ធ្វើដំណើរក្នុងទិសដៅពីត្បូងទៅជើងក្នុងស្ថានភាពស្រវឹង។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញរថយន្តបង្កម៉ាកVIGO ពណ៌ ទឹកប្រាក់ខាងលើ បើកបរក្នុងទិសដៅពីត្បូងទៅជើងក្នុងល្បឿនលឿន និងរេពេញផ្លូវ លុះបើកមកដល់ចំណុចកើតហេតុ ស្រាប់តែ រថយន្តបង្កបានរេចង្កូតទៅផ្នែកខាងឆ្វេង ហើយឡើងលើខឿនពុះចែកទ្រូងផ្លូវជ្រុលទៅបុកបង្គោលភ្លើងបំភ្លឺផ្លូវនៅកណ្ដាលទ្រូងផ្លូវពេញទំហឹងបណ្តាលអោយបាក់ដាច់រំលំរាបស្មើដល់ដី និងបណ្តាលអោយដាច់ភ្លើងងងឹតឈឹងជាង១០បង្គោល តែសំណាងល្អវិញ ដោយសារមិនបង្កឲ្យគ្រោះថ្នាក់ដល់ អ្នកដទៃឡើយ។
ទោះយ៉ាងណា រថយន្តបង្ក បានដាច់កាឡេបែកកង់បែកធុងទឹក រងការខូចខាតយ៉ាងធ្ងន់ធ្ងរបើកគេចមិនរួច កុំអីបាត់ឈឹងទៅហើយ។
ប្រភពបានបន្តទៀតថា ខណៈពេលគ្រោះថ្នាក់ភ្លាមៗ កម្លាំងនគរបាលដែលកំពុងល្បាតបានឃើញហេតុការណ៍នេះ ក៏បានឃាត់តៃកុងរថយន្តភ្លាមៗផងដែរ ហើយប្រគល់អោយ កម្លាំងនគរបាលប៉ុស្តិ៍ត្រពាំងក្រសាំងដើម្បីទុកអោយជំនាញនៃផ្នែកចរាចរណ៍ក្រុងមកទទួលយកទៅដោះស្រាយគ្នានៅពេលក្រោយទុកឲ្យតៃកុងស្វាងស្រាសិនទើបនិយាយគ្នាបាន៕
Source: Kampuchea Thmey Daily
0 Comments