បន្ទាយមានជ័យ ៖ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបានមានប្រសាសន៍ប្រាប់អ្នកយកព័ត៌មានក្នុងពិធីបំពាក់ឋានន្តរសក្តិដល់មន្ត្រី៤រូបថ្នាក់វរសេនីយ៍ឯក ចំនួន២រូបនិងថ្នាក់វរសេនីយ៍ទោចំនួន២រូប និង ធ្វើការផ្សព្វផ្សាយសភាពការណ៍ថ្មីថា ថ្ងៃបោះឆ្នោតជិតចូលមកដល់កម្លាំងកងរាជអាវុធហត្ថទូទាំងខេត្តចុះត្រួតពិនិត្យកម្លាំងទ័ព គ្រឿងបំពាក់ និងមធ្យោបាយ ដើម្បីត្រៀមចូលរួមការពារសន្តិសុខ រក្សាសណ្តាប់ធ្នាប់ ក្នុងយុទ្ធនាការឃោសនាបោះឆ្នោត និងបោះឆ្នោតជ្រើសតាំងតំណាងរាស្ត្រនាពេលខាងមុខដើម្បីការពារសន្តិសុខជូនពួកគាត់។
កិច្ចប្រជុំនេះមានអ្នកចូលរួមមកពីបណ្តាមន្ទីរ ការិយាល័យ មូលដ្ឋានក្រុងស្រុក ស្នាក់ការសន្តិសុខ និងនាយនាយរងអាវុធហត្ថ ចំនួន ១៤៣នាក់ នៅព្រឹក ថ្ងែទី៣១ ខែឧសភា ឆ្នាំ២០១៨នៅសាលប្រជុំទីបញ្ជាការកងរាជអាវុធហត្ថខេត្ត។
លោកឧត្តមសេនីយ៍ត្រី បោន ប៊ិន មានប្រសាសន៍ថាបញ្ជាក់ទៀតថា ដោយបានការយកចិត្តទុកដាក់ពីសំណាក់លោក នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេសលោកបានឲ្យកម្លាំងអាវុធហត្ថទាំងអស់ត្រូវយកចិត្តទុកដាក់ខ្ពស់ និងណែនាំត្រូវប្រឹងប្រែងកសាងខ្លួន បង្កើនសមត្ថភាព ហ្វឹកហ្វឺនរៀនសូត្រ ក្នុងកិច្ចបំពេញតួនាទីភារកិច្ច ប្រកបដោយឆន្ទៈស្មោះត្រង់។
ក្នុងកិច្ចប្រជុំនោះដែរ លោកឧត្តមសេនីយ៍ត្រី បោន ប៊ិន បានផ្សព្វផ្សាយខ្លឹមសារ ៧ចំណុច របស់លោកនាយឧត្តមសេនីយ៍ សៅ សុខា ១កិច្ចការពារ ថែរក្សាសន្តិសុខសណ្តាប់ក្នុងដំណើរការបោះឆ្នោតខាងមុខ ដើម្បីធានាឲ្យការបោះឆ្នោតប្រព្រឹត្តទៅប្រកបដោយតម្លាភាព សេរី និងយុត្តិធម៌ គ្មានអំពើហិង្សា ២ក្តាប់ព័ត៌មាន និងទប់ស្កាត់ការញុះញង់មិនឲ្យប្រជាពលរដ្ឋទៅចូលរួមបោះឆ្នោត ៣ការងារប្រតិបត្តិការ ចាត់ចែងបែងចែកការងារតាមតួនាទីភារកិច្ច ចាត់តាំងប្រចាំការ ប្រចាំបញ្ជា ត្រៀមកម្លាំងអន្តរាគមន៍ ២៤លើ២៤ម៉ោង ការគ្រប់គ្រងកម្លាំង ប្រើប្រាស់កម្លាំងចុះប្រតិបត្តិការ និងការប្រើប្រាស់មធ្យោបាយទាក់ទងផ្សេងៗ ៤ការងារមន្ត្រីនគរបាលយុត្តិធម៌ ទប់ស្កាត់បង្ក្រាបរាល់មុខសញ្ញាបទល្មើសដែលកើតមានឡើងក្នុងភូមិសាស្ត្រ ៥ការងារហ្វឹកហ្វឺន និងអប់រំចិត្តសាស្ត្រ ៦ការងារកសាងអង្គភាព សាងសង់ទីកន្លែងស្នាក់នៅ កន្លែងធ្វើការងារ ហូបចុក ស្លៀកពាក់ ហាត់ប្រាណ និងកីឡា ៧ត្រួតពិនិត្យមធ្យោបាយ គ្រឿងបំពាក់ ការបំពាក់អាវុធត្រូវត្រួតពិនិត្យឲ្យបានហ្មត់ចត់។
នៅបញ្ចប់កម្មពិធីលោកឧត្តមសេនីយ៍ត្រី បោន ប៊ិន បានរំលឹកដល់អាវុធហត្ថគ្រប់រូប ត្រូវជួយជំរុញសាច់ញាតិ និងអ្នកជិតខាងឲ្យទៅចូលរួមបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ ខាងមុខឲ្យបានគ្រប់ៗគ្នាផងដែរ៕
Source: Kampuchea Thmey Daily
0 Comments