ភ្នំពេញ ៖ ឯកឧត្ដម ទេព ងន អនុប្រធានទី២ព្រឹទ្ធសភា នៃព្រះរាជាណាចក្រកម្ពុជា កាលពីរសៀលថ្ងៃចន្ទ ១៣រោច ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១១ ខែមិថុនា ឆ្នាំ២០១៨ បានអនុញ្ញាតឲ្យគណៈប្រតិភូសភាប្រឹក្សានយោបាយប្រជាជនចិន ដឹកនាំដោយឯកឧត្តម Shang Fulin សមាជិកគណៈកម្មាធិការអចិន្ត្រៃយ៍ និងជាប្រធានគណៈកម្មាធិការកិច្ចការសេដ្ឋកិច្ច នៃសភាប្រឹក្សានយោបាយប្រជាជនចិន ចូលជួបសម្តែងការគួរសម និងសវនាការនៅវិមានព្រឹទ្ធសភា ក្នុងឱកាសដែលឯកឧត្តមដឹកនាំគណៈប្រតិភូមកបំពេញទស្សនកិច្ចនៅព្រះរាជាណាចក្រកម្ពុជា។
ក្នុងឱកាសសម្តែងការគួរសមនេះ ឯកឧត្តម Shang Fulin បានថ្លែងអំណរគុណចំពោះឯកឧត្តមអនុប្រធានទី២ព្រឹទ្ធសភា ដែលបានចំណាយពេលដ៏មានតម្លៃទទួលជួបគណៈប្រតិភូរបស់ឯកឧត្តមនាពេលនេះ។ ដំណើរទស្សនកិច្ចនេះ គឺដើម្បីសិក្សា និងស្វែងយល់អំពីតំបន់ឧស្សាហកម្ម និងតំបន់សេដ្ឋកិច្ចពិសេសរបស់ប្រទេសកម្ពុជា ដើម្បីជួយជំរុញតំបន់ទាំងនេះក្នុងការអភិវឌ្ឍប្រទេសកម្ពុជា។
ឯកឧត្តមបានវាយតម្លៃខ្ពស់ចំពោះទំនាក់ទំនងមិត្តភាព និងកិច្ចសហប្រតិបត្តិការជាប្រពៃណីរវាងប្រទេសទាំងពីរ ដែលមានតាំងពីរយូរលង់ណាស់មកហើយ។ រហូតដល់ពេលបច្ចុប្បន្ននេះ ទំនាក់ទំនង និងកិច្ចសហប្រតិបត្តិការប្រទេសទាំងពីរ កាន់តែត្រូវបានពង្រឹងបន្ថែមទៀត តាមរយៈការផ្លាស់ប្តូរទស្សនកិច្ចរបស់ថ្នាក់ដឹកនាំជាន់ខ្ពស់ នៃប្រទេសទាំងពីរ។ ឯកឧត្តម បានសម្តែងនូវការអបអរសាទរ និងវាយតម្លៃខ្ពស់ផងដែរចំពោះការរីកចម្រើនសេដ្ឋកិច្ចរបស់ កម្ពុជា ដែលរក្សាបានក្នុងរង្វង់ ៧%ក្នុងមួយឆ្នាំ ហើយប្រទេសកម្ពុជា និងប្រទេសចិន បានបំពេញឱ្យគ្នា ទៅវិញទៅមកលើផ្នែកសេដ្ឋកិច្ចនេះ។ ជាមួយគ្នានេះ ឯកឧត្តមប្រធានគណៈប្រតិភូ បានជម្រាបអំពីការកកើត និងការរៀបចំប្រព្រឹត្តទៅនៃសភាក្រុមប្រឹក្សានយោបាយប្រជាជនចិន។
នៅក្នុងឱកាសនោះ ឯកឧត្តម ទេព ងន បានសម្តែងនូវសេចក្តីរីករាយ និងសូមស្វាគមន៍ ដ៏កក់ក្តៅចំពោះដំណើរទស្សនកិច្ចរបស់ឯកឧត្តម និងគណៈប្រតិភូនៅព្រះរាជាណាចក្រកម្ពុជា។ ទស្សនកិច្ចរបស់គណៈប្រតិភូនាពេលនេះបានរួមចំណែកដ៏សំខាន់ក្នុងការបន្តពង្រឹងពង្រីកចំណងមិត្តភាព សាមគ្គី- ភាព និងកិច្ចសហប្រតិបត្តិការដ៏ល្អរវាងប្រជាជន និងប្រទេសទាំងពីរ។ ចំណងមិត្តភាព សាមគ្គីភាព និងកិច្ចសហប្រតិបត្តិការជាប្រពៃណីនេះ បានកសាងឡើងមានរយៈពេល ៦០ឆ្នាំ ដោយករុណាព្រះបាទ សម្តេចព្រះ នរោត្តម សីហនុ “ព្រះបរមរតនកោដ្ឋ” ជាមួយលោកប្រធាន ម៉ៅ សេទុង និងលោក នាយករដ្ឋមន្ត្រី ជូ អេនឡាយ ព្រមទាំងថ្នាក់ដឹកនាំចិនជំនាន់មុន។ ឯកឧត្តមអនុប្រធានទី២ព្រឹទ្ធសភា បានជម្រាបជូនគណៈប្រតិភូថា ទស្សនកិច្ចរបស់គណៈប្រតិភូនាឱកាសនេះ ស្របពេលដែលប្រទេសទាំងពីរ ប្រារព្ធខួបលើកទី៦០ (១៩៥៨-២០១៨) ថ្ងៃបង្កើតទំនាក់ទំនងការទូត រវាងព្រះរាជាណាចក្រកម្ពុជា ជាមួយនឹងសាធារណរដ្ឋប្រជាមានិតចិន។ បច្ចុប្បន្ននេះ ទំនាក់ទំនង និងកិច្ចសហប្រតិបត្តិការនៃប្រទេសទាំងពីរ បានឈានដល់កម្រិតភាពជាដៃគូ យុទ្ធសាស្ត្រគ្រប់ជ្រុងជ្រោយ។ ក្នុងនាមប្រជាជនកម្ពុជា ឯកឧត្តមអនុប្រធានទី២ព្រឹទ្ធសភា បានថ្លែងអំណរគុណដ៏ជ្រាលជ្រៅ បំផុតចំពោះវិភាគទានដ៏ធំធេងរបស់រដ្ឋាភិបាល និងប្រជាជនចិន ក្នុងការរួមចំណែកយ៉ាងសកម្ម ក្នុងការស្តារ និងអភិវឌ្ឍន៍ប្រទេសកម្ពុជា។ ជំនួយរដ្ឋាភិបាលចិន ការចូលរួមចំណែករបស់វិស័យឯកជនចិន និង អ្នកទេសចរចិន បានជួយអភិវឌ្ឍន៍ប្រទេសកម្ពុជា និងបានផ្លាស់ប្តូរជីវភាពរស់នៅរបស់ប្រជាជនកម្ពុជាជាលំដាប់។ បើគ្មានការគាំទ្រដោយសប្បុរស និងដោយគ្មានលក្ខខណ្ឌពីប្រទេសចិនទេនោះ កិច្ចដំណើរការ នៃការអភិវឌ្ឍសង្គម-សេដ្ឋកិច្ចរបស់ព្រះរាជាណាចក្រកម្ពុជាក្នុងរយៈពេល ២ទសវត្សរ៍ចុងក្រោយនេះ ក៏ មិនអាចមានជោគជ័យដូចថ្ងៃនេះដែរ ហេតុនេះការរីកចម្រើនរបស់ព្រះរាជាណាចក្រកម្ពុជា ទាំងពេល បច្ចុប្បន្ន និងពេលអនាគត គឺមិនអាចកាត់ផ្តាច់បាន ពីការឧបត្ថម្ភគាំទ្រពីសាធារណរដ្ឋប្រជាមានិតចិន បានឡើយ។ ឯកឧត្តមអនុប្រធានទី២ព្រឹទ្ធសភា បានថ្លែងអំណរគុណដ៏ជ្រាលជ្រៅបំផុតចំពោះ ជំនួយចាំបាច់ដ៏ថ្លៃថ្លារបស់រដ្ឋាភិបាល និងសភាប្រឹក្សានយោបាយប្រជាជនចិន ដែលបានជួយឧបត្ថម្ភ គាំទ្រជាបន្តបន្ទាប់ដល់ព្រឹទ្ធសភា ចាប់តាំងពីនីតិកាលទី១ រហូតមកដល់បច្ចុប្បន្ន ដែលមានទឹកប្រាក់សរុបជាង ១៦លានដុល្លារអាមេរិក។ ព្រឹទ្ធសភាបានប្រើប្រាស់ ជំនួយរបស់មិត្តចិនដោយ ការទទួលខុស ត្រូវខ្ពស់ និងមានប្រសិទ្ធភាពពិតប្រាកដ៕
Source: Kampuchea Thmey Daily
0 Comments