ស្ទឹងត្រែង ៖ នៅក្នុងពិធីចែកប័ណ្ណកម្មសិទ្ធិដីធ្លី ចំនួន១៤៣២ប័ណ្ណជូនប្រជាពលរដ្ឋនៅភូមិថ្មលាត ក្នុងសង្កាត់ស្រះឫស្សី និងនៅភូមិត្រពាំងព្រីង-ភូមិកណ្ដាល សង្កាត់-ក្រុងខេត្តស្ទឹងត្រែង នៅព្រឹកថ្ងៃទី១២ ខែមិថុនានេះ លោកម៉ុមសារឿន អភិបាលខេត្ត មានប្រសាសន៍ថា ៖ បងប្អូនប្រជាពលរដ្ឋ ដែលបានទទួលប័ណ្ណកម្មសិទ្ធិទាំងអស់ត្រូវរួមគ្នា ថែរក្សា ប័ណ្ណនេះ ទុកដាក់ឱ្យបានត្រឹមត្រូវព្រោះវាមានតម្លៃសម្រាប់គ្រួសារយើង និងកូនចៅទៅអនាគត។
លោកម៉ុម សារឿន អភិបាលខេត្តស្ទឹងត្រែងបានបញ្ជាក់ថា ៖ ការទទួលបានប័ណ្ណកម្មសិទ្ធិនេះពិតជាបានបង្ហាញឱ្យឃើញពីការយកចិត្តទុកដាក់របស់ប្រមុខរាជរដ្ឋាភិបាល ព្រោះប៉ុន្មានសង្គមមកហើយ ប្រជាពលរដ្ឋយើងរស់នៅមិនដែលមានប័ណ្ណកម្មសិទ្ធិដីធ្លីនេះទេ។
លោកសាយ កុសល់ អភិបាលក្រុងមានប្រសាសន៍ថា ៖ នេះជាការងារដ៏ប្រសើរបំផុត និងធ្វើឱ្យប្រជាពលរដ្ឋចៀសវាងបានពីទំនាស់ដីធ្លី មានព្រំប្រទល់ត្រឹមត្រូវ និងអាចឱ្យកូនចៅជំនាន់ក្រោយៗងាយស្រួលថែរក្សាបន្ថែមទៀត។
លោកឈួរ ស្រុន តំណាងឱ្យប្រជាពលរដ្ឋនៅក្រុងស្ទឹងត្រែងមកទទួលប័ណ្ណ បានបញ្ជាក់ថា ៖ការទទួលបានប័ណ្ណកម្មសិទ្ធិនេះ ធ្វើឲ្យប្រជាពលរដ្ឋនៅខេត្តស្ទឹងត្រែង សាទរយ៉ាងក្រៃលែង ព្រោះប័ណ្ណកម្មសិទ្ធិរបស់ប្រជាពលរដ្ឋនៅតាមគ្រួសារនីមួយៗ អាចយកទៅដាក់បញ្ចាំនៅធនាគារបានយកទុនមកប្រកបរបររកស៊ីដោះស្រាយជីវភាពប្រចាំថ្ងៃបានស្របច្បាប់៕
Source: Kampuchea Thmey Daily
0 Comments