ភ្នំពេញ ៖ លោកជំទាវកិត្តិសង្គហបណ្ឌិតម៉ែន សំអន ឧបនាយករដ្ឋមន្ត្រី បានប្រគល់រថយន្តសង្គ្រោះ៣គ្រឿងជូនមន្ទីរសុខាភិបាល ខេត្តស្វាយរៀង២គ្រឿង និងរាជធានីភ្នំពេញ១គ្រឿង ដើម្បីបម្រើសាធារណៈ ជួយសង្គ្រោះអាយុជីវិតមនុស្ស នៅពេលបងប្អូនជួបឧបទ្ទវហេតុផ្សេងៗ។
ពិធីប្រគល់ និងទទួលនេះ បានប្រព្រឹត្ដទៅ កាលពីរសៀលថ្ងៃទី១១ ខែមិថុនា ឆ្នាំ២០១៨ នៅទីស្តីការក្រសួង។
លោកជំទាវកិត្តិសង្គហបណ្ឌិតម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានទទួល រថយន្តពេទ្យសង្គ្រោះបន្ទាន់ចំនួន៣គ្រឿង ពីលោកដាតូ ស្រ៊ីអាឡាម ឡឹម នាយកក្រុមហ៊ុនអេសវី អីនធឺណាស្យូណាស់(SV INTER NATIONAL) ប្រទេសឡាវ ។ បន្ទាប់ពីទទួលបានរថយន្តពេទ្យសង្គ្រោះបន្ទាន់៣គ្រឿងនេះ ភ្លាមលោកជំទាវកិត្តិសង្គហបណ្ឌិតម៉ែន សំអន ឧបនាយករដ្ឋមន្ត្រី បានប្រគល់បន្តទៅឲ្យមន្ទីរសុខាភិបាលខេត្តស្វាយរៀង២គ្រឿង និងមន្ទីរសុខាភិបាលរាជធានីភ្នំពេញចំនួន១គ្រឿង សម្រាប់ប្រើប្រាស់ផ្នែកសេវាសុខាភិបាល ជូនប្រជាពលរដ្ឋ ជួយសង្គ្រោះអាយុជីវិតមនុស្ស។
លោកជំទាវ ម៉ែន សំអន បានអគុណ ដល់សប្បុរសជន ដែលបានគិតគូរយកចិត្ដទុកដាក់ ជួយសម្របសម្រួល ផ្នែកសុខាភិបាល ដល់ប្រជាជនកម្ពុជា ដើម្បីបម្រើសេវាសុភាពសាធារណៈ ជួយសង្គ្រោះអាយុជីវិតមនុស្សនៅពេលបងប្អូនជួបឧបទ្ទវហេតុផ្សេងៗ។ ជាក់ស្ដែងសប្បុរសជនប្រទេសឡាវ បានផ្ដល់រថយន្ដសង្គ្រោះចំនួន៣គ្រឿង ជូនមក មន្ទីរសុខាភិបាល នៅខេត្ដស្វាយរៀង និងរាជធានីភ្នំពេញ៕
Source: Kampuchea Thmey Daily
0 Comments