កំពង់ចាម ៖ កម្លាំងប៉ុស្តិ៍នគរបាលសង្កាត់សំបួរមាស បានចាប់ខ្លួនជនសង្ស័យម្នាក់ ពីបទប្រើអំពើហិង្សាដោយចេតនា បណ្តាលអោយជនរងគ្រោះ រងរបួសជាទម្ងន់ ក្នុងខណៈដែលជនសង្ស័យស្រវឹងស្រា ជិះម៉ូតូទៅបុក រ៉ឺម៉ក ដែលចតចោលនៅមុខផ្ទះ។
ប៉ូលិសបានអោយដឹងថា នៅថ្ងៃទី១១ ខែមិថុនា ឆ្នាំ២០១៨ វេលាម៉ោង១៤និង៣០នាទី ប៉ុស្ដិ៍នគរបាលសំបួរមាស បានទទួលព័ត៌មានពីប្រជាពលរដ្ឋថា មានករណីហិង្សា នៅចំណុចភូមិតាណេង សង្កាត់សំបួរមាស។
ប្រភពដដែលបានបន្តថា ក្រោយទទួលបានព័ត៌មានភ្លាម កម្លាំងប៉ុស្តិ៍ សំបួរមាស សហការជាមួយកម្លាំងជំនាញព្រហ្មទណ្ឌក្រុង ចុះដល់កន្លែងកើតហេតុ និងធ្វើការឃាត់ខ្លួនជនសង្ស័យ ឈ្មោះសូត ហ៊ីម ភេទប្រុស អាយុ៥២ឆ្នាំ នៅភូមិតាណេង សង្កាត់សំបួរមាស ក្រុងកំពង់ចាម ដែលបានធ្វើសកម្មភាព យកពូថៅវាយទៅលើជនរងគ្រោះឈ្មោះ សុខ ចាន់ហ៊ី ភេទស្រី អាយុ៥០ឆ្នាំ មានទីលំនៅ ភូមិតាណេង សង្កាត់សំបួរមាស ក្រុងកំពង់ចាម បណ្ដាលអោយរងរបួសចំក្បាល ពោះ និងឆ្អឹងខ្នង។
ប្រភពព័ត៌មានពីកន្លែងកើតហេតុ បានអោយដឹងថា មុនពេលមានអំពើ ហិង្សានេះកើតទ្បើង គេឃើញ ឈ្មោះ សូត ហ៊ីម ស្ថិតក្នុងសភាពស្រវឹងស្រា ហើយជិះម៉ូតូទៅបុករ៉ឺម៉កទុកចោល នៅមុខផ្ទះជនរងគ្រោះ រួច ហើយឈ្មោះ សូត ហ៊ីម រករឿងវាយម្ចាស់ផ្ទះតែម្តង។
ប៉ូលិសបានបញ្ជាក់ថា បច្ចុប្បន្ន ជនសង្ស័យត្រូវបានឃាត់ខ្លួននៅអធិការដ្ឋាននគរបាលក្រុងកំពង់ចាម ដើម្បីសាកសួរ និងកសាងសំណុំរឿងតាមនីតិវិធី៕
Source: Kampuchea Thmey Daily
0 Comments