បាត់ដំបង ៖ ជនសង្ស័យម្នាក់ ដែលជាមុខសញ្ញាប្លន់ប្រដាប់អាវុធ នាពេលកន្លងមក ត្រូវបានកម្លាំងជំនាញផ្នែកអនុវត្តដីកា សហការជាមួយកម្លាំងអធិការដ្ឋានចុះបង្ក្រាប និងចាប់ខ្លួនដើម្បីបញ្ជូនទៅកាន់តុលាការ បន្ទាប់ពីជនសង្ស័យរូបនេះបានធ្វើសកម្មភាពប្លន់រួចហើយបានរត់គេចខ្លួនទៅសំងំសុខនៅឯប្រទេសថៃ អស់រយៈពេលជិត១០ឆ្នាំ។
បើតាមរបាយការណ៍របស់លោកវរសេនីយ៍ត្រី កង សុផាណ្ណា នាយរងការិយាល័យព្រហ្មទណ្ឌកម្រិតធ្ងន់ បានបញ្ជាក់ថា បន្ទាប់ពីទទួលបានព័ត៌មានស្តីពីការវិលត្រឡប់របស់ជនសង្ស័យដែលបានគេចខ្លួនទៅនៅប្រទេសថៃជិត១០ឆ្នាំរួចមក នៅថ្ងៃទី១១ ខែមិថុនា ឆ្នាំ២០១៨ វេលាម៉ោង១១និង១០នាទី កម្លាំងរបស់លោក បានចុះទៅកាន់ផ្ទះជនល្មើស នៅចំណុចក្រុមទី១០ ភូមិស្វាយជ្រុំ ឃុំអូរដំបង២ ស្រុកសង្កែ ខេត្តបាត់ដំបង ដើម្បីអនុវត្តដីកាបង្គាប់អោយចាប់ខ្លួន លេខ៣៤៥ ដ ច ខ ចុះថ្ងៃទី ៥ ខែមិថុនា ២០០៩ របស់ចៅក្រមស៊ើបសួរ នៅ យ៉ារ័ត្ន នៃសាលាដំបូងខេត្តបាត់ដំបង។
នៅក្នុងដីកានេះដែរ តុលាការ បានបញ្ជាអោយអនុវត្តទៅលើឈ្មោះ ធឿន វណ្ណថា ហៅ ខុង ភេទប្រុស កើតឆ្នាំ១៩៩០ មានទីលំនៅ ត្រង់ភូមិ ឃុំ ខាងលើ ដោយបាន ចោទប្រកាន់ ពីបទ(ប្លន់) ប្រព្រឹត្តនៅភូមិអូរដំបង ឃុំអូរដំបង២ ស្រុកសង្កែ ខេត្តបាត់ដំបង កាលពីថ្ងៃទី១៨ ខែធ្នូ ឆ្នាំ២០០៨ រួចរត់គេចខ្លួនទៅនៅប្រទេសថៃ។ ក្រោយអនុវត្តបានកម្លាំងជំនាញ បានបញ្ជូនជនសង្ស័យមកកាន់ការិយាល័យ ដើម្បីចាត់ការបន្តទៅកាន់សាលាដំបូងខេត្ត៕
Source: Kampuchea Thmey Daily
0 Comments