បាត់ដំបង ៖ យុវជនម្នាក់ ដែលគេស្គាល់ថា ជាមនុស្សស្លូត និងឧស្សាហ៍ក្នុងការងារស្រែ ចម្ការ ត្រូវបានគេប្រទះឃើញធ្វើអត្តឃាត ដោយបានចង កសម្លាប់ខ្លួននៅនឹងខ្ទមស្រែរបស់ខ្លួន ដែលបញ្ហានេះត្រូវបានប្រភពជាច្រើនកំពុងមានការងឿងឆ្ងល់។
នៅថ្ងៃទី១១ ខែមិថុនា ឆ្នាំ២០១៨ វេលាម៉ោង៩ព្រឹក មានការភ្ញាក់ផ្អើលមួយបានកើតឡើង ដោយសារតែមានប្រជាកសិករ បានប្រទះឃើញសពយុវជនម្នាក់បានចង កសម្លាប់ខ្លួននៅនឹងខ្ទមស្រែ ត្រង់ចំណុច ភូមិអូរតាគី ឃុំអូរតាគី ស្រុកថ្មគោលខេត្តបាត់ដំបង។
ជនរងគ្រោះមានឈ្មោះ ឈៀង សុផល ភេទប្រុស អាយុ២៩ឆ្នាំ រស់នៅត្រង់ចំណុចកើតហេតុខាងលើ ដែលគេបានយកខ្សែអង្រឹងចង ក ទៅនឹងដើមអាកាស្យា ( ដើមប្រេងខ្យល់ ) ដោយសមត្ថកិច្ចជំនាញ បានសនិដ្ឋានជំហានដំបូងថា ជនរងគ្រោះអាចសម្លាប់ខ្លួននៅវេលាម៉ោងប្រមាណ១១យប់ ថ្ងៃទី១០ ដោយសារជនរងគ្រោះមានវិបត្តិផ្លូវចិត្ត។
ប្រជាពលរដ្ឋជាច្រើនដែលរស់នៅក្នុងតំបន់នេះ បានលើកឡើងថា ជនរងគ្រោះទើបនឹងត្រឡប់មកពីធ្វើការនៅឯប្រទេសថៃប្រមាណជាង២ខែ នេះ ដោយគេគឺជាមនុស្សឧស្សាហ៍ក្នុងការងារស្រែ ចម្ការណាស់ ហើយក៏មិនដែលឮថាមានទំនាស់ជាមួយអ្នកណាដែរ ដោយគ្រាន់តែមានម្ដងម្កាល គឺគេត្រូវបានឪពុកស្តីបន្ទោសអោយ ខណៈដែលឪពុកស្រវឹងតែប៉ុណ្ណោះ បច្ចុប្បន្នសព ត្រូវបានកម្លាំងសមត្ថកិច្ចជំនាញ ធ្វើការប្រគល់ទៅអោយក្រុមគ្រួសាររៀបចំធ្វើបុណ្យតាមប្រពៃណីហើយ៕
Source: Kampuchea Thmey Daily
0 Comments