ភ្នំពេញ ៖ ដីភក់ និងសំរាមនៅប្រឡាយស្ទឹងមានជ័យ មានបរិមាណប្រមាណ៤៦.២០០ម៉ែត្រគូប ដែលត្រូវកាយចេញ មុនចាក់ដីបំពេញ ដើម្បីពុះឡូត៍ចែកជូនប្រជាពលរដ្ឋ ដែលរស់នៅលើប្រឡាយនេះ។
លោកសំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានអោយដឹងកាលពីល្ងាចថ្ងៃទី១១ ខែមិថុនានេះថា តាមគម្រោង ការជីកកាយបរិមាណដីភក់ សំរាម ដែលត្រូវកាយ និងដឹកជញ្ជូន ចេញពីប្រឡាយស្ទឹងមានជ័យមានចំនួន ៤៦.២០០ម៉ែត្រគូបលើប្រវែងប្រឡាយ១៣៩៨ម៉ែត្រ ដោយចាប់ពីស្ពានអាកាសស្ទឹងមានជ័យ ដល់ប្រឡាយដើមស្លើង។
លោកថា យើងនឹងធ្វើឡើងចំនួន៤ដំណាក់កាល ដោយមកដល់ពេលនេះយើងកាយប្រឡាយស្ទឹងមានជ័យបាន៣០ភាគរយ ដែលកន្លែងខ្លះទទឹងប្រឡាយមាន១៥ម៉ែត្រ២០ម៉ែត្រ ៣០ម៉ែត្រទៅ៥០ម៉ែត្រដោយកន្លែងតូចធំ និងមានប្រជាពលរដ្ឋរស់នៅចំនួន៥៧៤គ្រួសារ។
លោកសាំ ពិសិដ្ឋ ក៏បានបញ្ជាក់ថា ប្រឡាយស្ទឹងមានជ័យ យើងនឹងប្រើប្រាស់ពេលវេលាប្រមាណ
៣ខែ ក្នុងកាយសំរាម និងភក់ចេញ ហើយចាក់ខ្សាច់និងដីចូល ដើម្បីបែងចែកដីឡូត៍ជូនប្រជាពលរដ្ឋនៅតំបន់នេះ។
គួរបញ្ជាក់ថា នៅតំបន់ស្ទឹងមានជ័យ រដ្ឋបាលរាជធានី បាននិងកំពុងស្ថាបនាប្រឡាយស្ទឹងមានជ័យមានប្រវែង១៣៩៨ម៉ែត្រ ដោយចាក់បេតុងបុកស៊ីផាយ ទទឹង៨ម៉ែត្រ ហើយគម្រោងនេះ ត្រូវបានបែងចែកជា៤ដំណាក់កាល។ ក្នុងនោះដំណាក់កាលទី១ មានប្រវែង៣២៦ម៉ែត្រ សងខាងប្រឡាយសរុបប្រវែង៦៥២ម៉ែត្រ ហើយក្នុងជំហានទី១នេះ រដ្ឋបាលរាជធានីបានសម្រេចចាប់ឆ្នោតប្រគល់ដីជូនប្រជាពលរដ្ឋដែលរស់នៅលើប្រឡាយនេះ១៥២គ្រួសាររួចហើយដែរ កាលពីប៉ុន្មានថ្ងៃមុននេះ។
ប្រឡាយស្ទឹងមានជ័យដែលរដ្ឋបាលរាជធានីភ្នំពេញបាននិងកំពុងធ្វើការអភិវឌ្ឍនេះឆ្លងកាត់ខណ្ឌចំនួន២ គឺខណ្ឌមានជ័យនិងខណ្ឌសែន សុខ ដែលមានប្រជាពលរដ្ឋរស់នៅនិងរងផលប៉ះពាល់ប្រឡាយនេះចំនួន៥៦២គ្រួសារ ហើយប្រជាពលរដ្ឋទាំងអស់នេះនឹងទទួលបានដីទំហំ៤គុណនឹង៦ម៉ែត្រជាកម្មសិទ្ធិស្របច្បាប់នៅហ្នឹងកន្លែងតែម្តង។
ប្រឡាយស្ទឹងមានជ័យ បានដើរតួយ៉ាងសំខាន់ ក្នុងការនាំទឹកទម្លាក់ចូលទៅបឹងទំពុន។ ជាគម្រោងតួប្រឡាយស្ទឹងមានជ័យមានទំហំ៨ម៉ែត្រចិញ្ចើម២ ម៉ែត្រ សាងសង់ផ្លូវបេតុងទទឹង៦ម៉ែត្រ ផ្លូវមុខផ្ទះ៥ម៉ែត្រ ដីនៅសល់មុខផ្ទះ១ម៉ែត្រកន្លះនិងក្រោយផ្ទះកន្លះម៉ែត្រ៕
Source: Kampuchea Thmey Daily
0 Comments