ប្រមុខ​ទីភ្នាក់ងារ​ការពារ​គ្រោះមហន្តរាយ​របស់​ហ្គា​តេ​ម៉ា​ឡា​រង​ពាក្យបណ្តឹង​ពីបទ​មនុស្សឃាត​ពាក់ព័ន្ធ​ការ​ផ្ទុះ​ភ្នំភ្លើង

កាលពី​ថ្ងៃ​ពុធ តំណាងរាស្ត្រ​ហ្គា​តេ​ម៉ា​ឡា​ បាន​ដាក់​ពាក្យ​បណ្ដឹង​មនុស្សឃាត​ប្រឆាំង​នឹង​ប្រធាន​ទីភ្នាក់ងារ​ការពារ​ស៊ីវិល​របស់​ប្រទេស​នេះ ​ដោយសារតែ​ការ​បរាជ័យ​របស់​ខ្លួន​ក្នុង​ការ​ព្រមាន​ប្រជាជន​អំពី​ការ​ផ្ទុះ​ភ្នំភ្លើង Fuego ដែល​បាន​បណ្ដាល​ឲ្យ​មនុស្ស​យ៉ាងតិច​១១២​នាក់​ស្លាប់។

​លោក Erwin Alvarez នៃ​គណបក្សប្រឆាំង Parliamentary Front for Transparency បានដាក់​ពាក្យបណ្តឹង​ប្រឆាំង​លោក Sergio Cabanas ដែលជា​ប្រធាន​ទីភ្នាក់ងារ​គ្រប់គ្រង​គ្រោះមហន្តរាយ CONRED ពីបទ​មនុស្សឃាត​និង​ការរំលោភ​កាតព្វកិច្ច។

លោក​បាន​ប្រាប់​អ្នកយកព័ត៌មាន​ថា លោក Cabanas និង​អ្នកដទៃ​ទៀត​បាន​បរាជ័យ​ក្នុងការ​បញ្ជា​ឲ្យ​មានការ​ជម្លៀសចេញ​ពីស​ហគ​មន៍​ដែល​នៅ​ជុំវិញ​នោះ​កាលពី​ថ្ងៃទី​៣​ខែមិថុនា​នៅពេលដែល​ភ្នំភ្លើង​បាន​ផ្ទុះឡើង​។​
​
លោក​បាន​និយាយថា អាជ្ញាធរ​ការពារ​ស៊ីវិល​មិនបាន​គិតគូរ​ទាន់ពេលវេលា​ទេ​។​
​ក្រុមមន្ត្រី​បានបញ្ជាក់​ពី​ការស្លាប់​របស់​មនុស្ស​ចំនួន​១១២​នាក់​ប៉ុន្តែ​មនុស្ស​ជាច្រើន​នាក់​ទៀត​នៅតែ​កំពុង​បាត់​ខ្លួន​។​
​
អាជ្ញាធរ​បាន​និយាយថា មនុស្ស​ជាង​១.៧​លាន​នាក់​បាន​រង​ផលប៉ះពាល់​ដោយ​គ្រោះមហន្តរាយ​នេះ​ដោយ​រាប់បញ្ចូល​ទាំង​អ្នក​ជម្លៀស​ជាង​៣,០០០​នាក់​ផងដែរ​។​
​
ការិយាល័យ​របស់​រដ្ឋ​អាជ្ញា​កំពុងធ្វើការ​រួចទៅហើយ​ដើម្បី​ស៊ើបអង្កេត​ដាច់ដោយឡែក​លើ​ការធ្វេសប្រហែស​។​
​
លោក David de Leon អ្នកនាំពាក្យ CONRED បាន​និយាយថា ទីភ្នាក់ងារ​នេះ​កំពុង​សហការ​ជាមួយ​ការស៊ើបអង្កេត​៕ AFP
​
​

Source: Kampuchea Thmey Daily