ឃាតកម្ម សម្លាប់បុរសម្នាក់ ដោយអារ.ក យកទៅចងក ដើម្បីបំភ័ន្តដានមហាជន

ប៉ៃលិន ៖ ហេតុការណ៍ភ្ញាក់ផ្អើលមួយ បានកើតឡើងនៅក្នុងយានដ្ឋានជួសជុលរថយន្តមួយកន្លែង ដែលមានឈ្មោះ កែវ សុខជឿន ហៅជាងយ៉ាវ ដោយសារតែបុរសម្នាក់ បានស្លាប់ក្នុងសភាពចងកសម្លាប់ខ្លួន កាលពីវេលាម៉ោង៧យប់ថ្ងៃទី២៧ ខែមិថុនា ឆ្នាំ២០១៨ ស្ថិតក្នុងភូមិសួនអំពៅលិច សង្កាត់ប៉ៃលិន ក្រុងប៉ៃលិន ខេត្តប៉ៃលិន ប៉ុន្តែដោយស្ថានភាពយប់មិនអាចឲ្យសមត្ថកិច្ចធ្វើកោសល្យវិច័យបាន ដូច្នោះសមត្ថកិច្ចជំនាញ សម្រេចបិទទីតាំង ព្រមទាំងចាត់គ្នាយាម រង់ចំការធ្វើកោសល្យវិច័យ នៅពេលព្រឹកវិញ។ លុះនៅព្រឹកថ្ងៃទី២៨ ខែមិថុនា ឆ្នាំ២០១៨ នេះសមត្ថកិច្ចនៃស្នងការនគរបាលខេត្តប៉ៃលិន ដឹកនាំដោយលោកឧត្តមសេនីយ៍ត្រី អ៊ីវ គឹមស៊ាន ស្នងការរងទទួលបន្ទុកបទល្មើសព្រហ្មទណ្ឌ នៃស្នងការនគរបាលខេត្តប៉ៃលិន មានការចូលរួមពីនាយការិយាល័យព្រហ្មទណ្ឌកម្រិតធ្ងន់ អធិការក្រុង មេប៉ុស្តិ៍ និងសមត្ថកិច្ចជំនាញជាច្រើនរូប។

លោកវរសេនីយ៍ត្រី យ៉ែម សារិទ្ធ អធិការនគរបាលក្រុងប៉ៃលិន បានឲ្យដឹងថា ៖ នៅវេលាកើតហេតុខាងលើ ពិតជាមានករណីមនុស្សចងកសម្លាប់ខ្លួន ប៉ុន្តែយើងមិនទាន់ធ្វើកោសល្យវិច័យ រកមូលហេតុបាននៅឡើយទេ ដោយសារតែកន្លែងកើតហេតុយប់ ដូច្នោះរង់ចាំសមត្ថកិច្ចជំនាញ នៃស្នងការនគរបាល ចុះមកធ្វើនៅព្រឹកថ្ងៃទី២៨ ខែមិថុនានេះ ព្រោះសាកសព ដែលចងក មានឈាមហូរស្រោចខ្លួន។

លោកអធិការបន្តថា ៖ ជនរងគ្រោះឈ្មោះ ម៉ៅ ទិត ភេទប្រុស អាយុ៣៣ឆ្នាំ មានទីកន្លែងកំណើតនៅភូមិស្តុកឃ្លោក ឃុំអូរតាប៉ោង ស្រុកបាកាន ខេត្តពោធិ៍សាត់ និងមានទីលំនៅបច្ចុប្បន្នមិនពិតប្រាកដ ដោយជនរងគ្រោះបានយករថយន្តរបស់ខ្លួន មកធ្វើនៅទីតាំងកើតហេតុខាងលើ ព្រមទាំងសម្រាកបានចំនួនពីរយប់ផងដែរ។

បើតាមលោកវរសេនីយ៍ទោ ជា រ៉ាវុធ នាយការិយាល័យបច្ចេកទេស និងកោសល្យវិច័យ នៃស្នងការនគរបាលខេត្តប៉ៃលិន បានឲ្យដឹងដែរថា ៖ ករណីខាងលើ ជាអំពើឃាតកម្ម ព្រោះសភាពសពជនរងគ្រោះ មានស្លាកស្នាមអារ.ក រហូតដល់ដាច់បំពង់ខ្យល់ ហើយយកសពទៅចងក ដើម្បីបំភ័ន្តដានសមត្ថកិច្ច។ លោកបានបន្តថា ៖ នៅកន្លែងកើតហេតុ មានការដក់ឈាមជាច្រើនកន្លែង ,មានឡាម ផងដែរ។

បច្ចុប្បន្ន សមត្ថកិច្ចជំនាញ កំពុងស្រាវជ្រាវយ៉ាងយកចិត្តទុកដាក់ ដើម្បីចាប់ជនដៃដល់ មកផ្ដន្ទាទោសតាមច្បាប់ផងដែរ៕