ប្រធានាធិបតីរុស្ស៊ីលោក Vladimir Putin បានយល់ព្រមចំពោះកិច្ចប្រជុំកំពូលមួយជាមួយលោក Donald Trump នៅក្នុងប្រទេសទី៣។ លោកបានយល់ព្រមបែបនេះ ក្នុងអំឡុងកិច្ចពិភាក្សាមួយកាលពីថ្ងៃពុធ ជាមួយទីប្រឹក្សាសន្តិសុខជាតិរបស់មេដឹកនាំអាមេរិក ដែលបានបង្ហាញពីក្តីសង្ឃឹមសម្រាប់ការកាត់បន្ថយភាពតានតឹង។
បេសកជនអាមេរិកលោក John Bolton ត្រូវបានទទួលស្វាគមន៍នៅទីក្រុងមូស្គូដោយកិត្តិយសបំផុត។ លោកបានទទួលទានអាហារថ្ងៃត្រង់ដែលរៀបចំដោយរដ្ឋមន្ត្រីការបរទេសរុស្ស៊ីលោក Sergei Lavrov ហើយបន្ទាប់មកមានជំនួបដ៏ស្និទ្ធស្នាលជាមួយលោក Putin នៅវិមានក្រឹមឡាំង។
ទំនាក់ទំនងរវាងអាមេរិកនិងរុស្ស៊ីត្រូវបានប៉ះពាល់ដោយការខ្វែងគំនិតគ្នាជុំវិញជម្លោះនៅស៊ីរី ការកាត់យកឧបទ្វីប Crimea ដោយរុស្ស៊ី ការចូលរួមរបស់ខ្លួននៅអ៊ុយក្រែនខាងកើតនិងការចោទប្រកាន់ពីការជ្រៀតជ្រែកផ្នែកនយោបាយ។
ជំនួយការគោលនយោបាយការបរទេសជាន់ខ្ពស់របស់វិមានក្រឹមឡាំងបាននិយាយថា លោក Putin និងលោក Bolton បានយល់ស្របថា ប្រធានាធិបតីនៃប្រទេសទាំងពីរនឹងជួបគ្នានៅកន្លែងនិងពេលវេលាដែលនឹងត្រូវប្រកាសក្នុងពេលឆាប់ៗខាងមុខនេះ។
លោក Putin បាននិយាយប្រាប់លោក Bolton នៅវិមានក្រឹមឡាំងថា “ដំណើរទស្សនកិច្ចរបស់អ្នកមកកាន់ទីក្រុងមូស្គូបានផ្តល់ឲ្យយើងនូវក្តីសង្ឃឹមថា យ៉ាងហោចណាស់យើងអាចឈានទៅដល់ជំហានដំបូងដើម្បីធ្វើឲ្យមានទំនាក់ទំនងល្អឡើងវិញរវាងរដ្ឋរបស់យើងទាំងពីរ”។
លោក Bolton ដែលត្រូវបានគេស្គាល់ពីមុនមកដោយសារតែជំហររឹងមាំរបស់គាត់ទៅលើទីក្រុងមូស្គូបាននិយាយថា វាសំខាន់ណាស់ក្នុងការបន្តពិភាក្សានិងកោតសរសើរដល់លោក Putin អំពីការគ្រប់គ្រងការប្រកួតកីឡាបាល់ទាត់ពិភពលោកដែលបច្ចុប្បន្នកំពុងប្រព្រឹត្តធ្វើឡើងនៅប្រទេសរុស្ស៊ី។ លោកបន្តថា “សូម្បីតែនៅថ្ងៃដំបូងនៅពេលដែលប្រទេសរបស់យើងមានភាពខ្វែងគំនិតគ្នា មេដឹកនាំរបស់យើងនិងទីប្រឹក្សារបស់ពួកគេបានជួបគ្នាហើយខ្ញុំគិតថាវាល្អសម្រាប់ប្រទេសទាំងពីរ”។
គួរបញ្ជាក់ថា ថ្មីៗនេះទំនាក់ទំនងត្រូវបានប៉ះពាល់ដោយការស៊ើបអង្កេតលើការជ្រៀតជ្រែករបស់រុស្ស៊ីនៅក្នុងការបោះឆ្នោតប្រធានាធិបតីអាមេរិកឆ្នាំ២០១៦និងការសង្ស័យអំពីការឃុបឃិតជាមួយយុទ្ធនាការរបស់លោក Trump ក៏ដូចជាការបំពុលចារបុរសរុស្ស៊ីនៅចក្រភពអង់គ្លេសផងដែរ។
ចំណែកឯនៅទីក្រុងវ៉ាស៊ីនតោនឯណោះវិញ លោក Trump បាននិយាយថា លោកមិនទាន់បានឮសេចក្តីរាយការណ៍ពេញលេញពីលោក Bolton អំពីផែនការសម្រាប់កិច្ចប្រជុំកំពូលជាមួយលោក Putin ទេប៉ុន្តែលោកនិយាយថា “វាហាក់ដូចជាយើងនឹងជួបប្រជុំគ្នានៅពេលអនាគតមិនយូរប៉ុន្មាន”៕ AFP
Source: Kampuchea Thmey Daily
0 Comments