អ្នកម្នាង អ៊ុក ផល្លា យាងសោយទិវង្គត ក្រោយជួបគ្រោះថ្នាក់ចរាចរណ៍ ជាមួយសម្ដេចក្រុមព្រះ នរោត្តម រណឫទ្ធិ

ព្រះសីហនុ ៖ សម្ដេចក្រុមព្រះ នរោត្តម រណឫទ្ធិ ត្រូវបានបញ្ជូនទៅសង្គ្រោះភ្លាមៗនៅគ្លីនិកសេតេក្រុងព្រះសីហនុ ចំណែកអ្នកម្នាង អ៊ុក ផល្លា បានយាងសោយទិវង្គតនៅមន្ទីរពេទ្យ ក្រោយពេលជួបគ្រោះថ្នាក់ចរាចរណ៍កាលពីព្រឹកមិញ នៅលើកំណាត់ ផ្លូវជាតិលេខ០៤ ចន្លោះគីឡូម៉ែត្រលេខ ២០០-២០១ ត្រង់ចំណុចផ្លូវចូលទីលានចាក់សំរាម ភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។ ក្នុងហេតុការណ៍នេះ ក៏បណ្ដាលឲ្យមនុស្សចំនួន០៥នាក់ផ្សេងទៀត រងរបួសធ្ងន់ស្រាលផងដែរ។

ពាក់ព័ន្ធទៅនឹងហេតុការណ៍នេះ បើតាមសាក្សីរស់នៅតំបន់កើតហេតុ បានឲ្យដឹងថា នៅមុនពេលកើតហេតុ គេឃើញរថយន្តតាក់ស៊ីមួយគ្រឿងម៉ាកHIGHLANDER បានបើក ក្នុងល្បឿនលឿន លុះមកដល់ចំណុចកើតហេតុ មិនដឹងជាមានមូលហេតុអ្វី ក៏ស្រាប់តែរេចង្កូត សំដៅទៅរករថយន្តមួយគ្រឿងទៀត ម៉ាក BMWជារថយន្តរបស់ សម្តេចក្រុមព្រះ ដែលបើកបរក្នុងគោលដៅបញ្ច្រាសទិសគ្នា ហើយក៏បានបុកយ៉ាងទំហឹង បណ្ដាលឲ្យជួបហេតុការណ៍ អាក្រក់បែបនេះ តែម្តងទៅ។ ក្រោយពេលកើតហេតុ ភ្លាមៗសម្ដេចក្រុមព្រះ និងអ្នកម្នាងអ៊ុក ផល្លា រួមនឹងជនរងគ្រោះផ្សេងទៀត ត្រូវបានរថយន្ត ដឹកបញ្ជូនទៅមន្ទីរពេទ្យ ដើម្បីជួយសង្គ្រោះ ផងដែរ ដោយជនរងគ្រោះ ខ្លះបានបញ្ជូនទៅមន្ទីរពេទ្យឯកជនវាលរេញ និងខ្លះបញ្ជូនមកមន្ទីរពេទ្យក្រុងព្រះសីហនុ។ ក្នុងចំណោមជនរងគ្រោះទាំងនោះ គឺអ្នកម្នាងអ៊ុក ផល្លា បានយាងសោយទិវង្គត នៅវេលាម៉ោងជាង១២ ថ្ងៃទី១៧ ខែមិថុនា ដោយសាររបួសធ្ងន់ធ្ងរពេក។

សមត្ថកិច្ច ប៉ូលិស ឲ្យដឹងថា រថយន្ត០១គ្រឿងម៉ាក HIGHLANDER ពណ៌ទឹកប្រាក់ ពាក់ស្លាកលេខ ភ្នំពេញ 2L-9667 បើកបរដោយឈ្មោះ វ៉ុល សារ៉េត ភេទប្រុស អាយុ៣៤ឆ្នាំ មុខរបររត់តាក់ស៊ី មានទីលំនៅ ភូមិ២ សង្កាត់១ ក្រុង-ខេត្តព្រះសីហនុ ដឹកភ្ញៀវចំនួន០៤នាក់ ស្រី០១នាក់ មានទិសដៅពីខេត្តព្រះសីហនុ ទៅភ្នំពេញ រថយន្តរងការខូចខាតស្ទើរទាំងស្រុង។ ចំណែកឯរថយន្តម៉ាក BMW X3 ពណ៌ទឹកប្រាក់ ពាក់ស្លាកលេខ រដ្ឋសភា5 2.090 ជិះគ្នាចំនួន ០៣នាក់ ស្រី ០១នាក់ ជារថយន្តរបស់សម្តេច ក្រុមព្រះ ដែលធ្វើដំណើរទៅជួបសួរសុខទុក្ខប្រជាពលរដ្ឋនៅខេត្តព្រះសីហនុ។ ករណីនេះ បណ្ដាលឲ្យ រងរបួសមនុស្សចំនួន០៧នាក់ ស្រី០២នាក់ ទី១-អ្នកម្នាង អ៊ុក ផល្លា រងរបួសធ្ងន់ សម្រាកព្យាបាលមន្ទីរពេទ្យបង្អែកខេត្តព្រះសីហនុ ហើយក្រោយមកក៏យាងសោយទិវង្គត .ទី២-សម្តេចក្រុមព្រះ រងរបួស ធ្ងន់ សម្រាក ព្យាបាលនៅ គ្លីនិកសេតេ។ ចំណែកអ្នករបួសផ្សេងៗទៀត កំពុងសម្រាកព្យាបាល នៅគ្លីនិកឯកជនផ្សេងៗគ្នា។

ចំពោះអ្នកបើកបររថយន្ត តាក់ស៊ីកំពុងឃាត់ខ្លួនបណ្ដោះអាសន្ននៅការិយាល័យ នគរបាល ចរាចរណ៍ផ្លូវគោក។

បច្ចុប្បន្នវត្ថុតាងរថយន្ត សមត្ថកិច្ច នគរបាលចរាចរណ៍ កំពុងយកចេញពីកន្លែងកើតហេតុ ទៅរក្សា ទុកនៅការិយាល័យនគរបាលចរាចរណ៍ផ្លូវគោក៕