កំពង់ចាម ៖ លោក វេងសាខុន ប្រធានក្រុមការងារថ្នាក់ជាតិចុះមូលដ្ឋានស្រុកកំពង់សៀម និងស្រុកតំបែរ និងសហការីកាលពី រសៀលថ្ងៃអាទិត្យ ១២កើត ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៤ ខែមិថុនា គ.ស ២០១៨បានបន្តចុះជួបសំណេះសំណាល ជាមួយប្រជាជន ចំនួន ២៥០០នាក់ អញ្ជើញមកពីឃុំហាន់ជ័យ និងឃុំរំចេក ស្ថិតក្នុងបរិវេណវត្តមាន់ហើរ ភូមិមាន់ហើរ ឃុំហាន់ជ័យ ស្រុកកំពង់សៀម ខេត្តកំពង់ចាម។
ក្រសួងបានបញ្ជាក់ថា មានមតិសំណេះសំណាលទៅកាន់ បងប្អូនប្រជាពលរដ្ឋ នៅក្នុងឱកាសនោះ លោក វេងសាខុន ប្រធានក្រុមការងារថ្នាក់ជាតិចុះមូលដ្ឋានស្រុកកំពង់សៀម និងស្រុកតំបែរ បានជម្រាបជូន ទី១. ពីដំណើរវិវត្តនៃការេរីកចម្រើនហេដ្ឋារចនាសម្ព័ន្ធរូបវ័ន្ត និងសេដ្ឋកិច្ចសង្គមកម្ពុជា ដែលសម្រេចបានក្រោយការដាក់ចេញនយោបាយឈ្នះឈ្នះរបស់សម្តេចតេជោ ហ៊ុន សែន នាឆ្នាំ១៩៩៨។ ទី២. ស្ថានភាពនៃការប្រែប្រួលដំណើរការរីកលូតលាស់នៃសេដ្ឋកិច្ចកម្ពុជា ក្នុងវិស័យកសិកម្ម ឧស្សាហកម្ម សេវាកម្ម និងទេសចរ។ ទី៣. ជំហ៊ានថ្មីនៃផែនការពង្រីកវិស័យ ឧស្សាហកម្ម ការរកទីផ្សារកសិកម្ម ការគិតគូរពីការគាំពារសន្តិសុខសង្គម និងការកាត់បន្ថយចំណាយលើសេវាកម្ម និងពន្ធដារមួយចំនួន ដែលជាបន្ទុករបស់ប្រជាជនកន្លងមក។ ទី៤. ការពង្រឹងលទ្ធិប្រជាធិបតេយ្យ សេរីពហុបក្ស និងការអនុវត្តច្បាប់ ហើយនិងវិធានការនានាដើម្បីទប់ស្កាត់ការធ្វើបដិវត្តពណ៌ និងឧបាយកលនានាចង់ផ្តួលរំលំរដ្ឋាភិបាលស្របច្បាប់។ ទី៥. អំពាវនាវសុំឲ្យប្រជាពលរដ្ឋទាំងអស់អញ្ជើញទៅបោះឆ្នោតទាំងអស់គ្នា ហើយបោះឆ្នោតជូនគណ បក្សប្រជាជនកម្ពុជា នៅថ្ងៃទី២៩ ខែកក្កដាខាងមុខ ដែលមានលេខរៀងទី២០ នៅក្នុងសន្លឹកឆ្នោតជ្រើសតាំងតំណាងរាស្ត្រនីតិកាលទី៦នៃរដ្ឋសភា ដើម្បីផ្តល់ជូនសម្តេចតេជោ បន្តដឹកនាំប្រទេសឆ្ពោះទៅរកការវិវឌ្ឍរីកចម្រើនថ្មីៗបន្ថែមទៀត។
ក្នុងឱកាសនោះ ដោយយោងតាមសំណើចាំបាច់របស់ព្រះសង្ឃ ប្រជាជន រដ្ឋអំណាចមូលដ្ឋាន និងលោកគ្រូអ្នកគ្រូ លោកបានពិនិត្យ ដោះស្រាយ និងផ្តល់ជូនតាមសំណូមពរ ដូចជា ប្រេងឥន្ធនៈ សំលៀកបំពាក់ប្រជាការពារ ជួសជុលផ្លូវលំ ម៉ាស៊ីនកុំព្យូទ័រ។ល៕
Source: Kampuchea Thmey Daily
0 Comments