ការធ្វើអត្តឃាតរបស់ក្មេងជំទង់ម្នាក់នៅក្នុងប្រទេសចិន បន្ទាប់ពីករណីបៀតបៀនផ្លូវភេទរបស់នាងត្រូវបានច្រានចោលនោះ គឺបានបង្កឲ្យមានសំនួរជាច្រើនទាក់ទងនឹងរឿងរ៉ាវរបស់នាងនិងកំហឹងចំពោះអ្នកឈរមើលដែលបានជំរុញឲ្យនាងលោតចុះពីអគារមួយ។
ប៉ូលិសនិយាយថា នាង Li Yiyi អាយុ១៩ឆ្នាំបានស្លាប់កាលពីសប្តាហ៍មុន បន្ទាប់ពីនាងបានលោតចុះពីជាន់ទី៨នៃផ្សារទំនើបមួយក្នុងទីក្រុង Qingyang ដែលស្ថិតនៅខេត្ត Gansu ភាគពាយព្យ។
កំហឹងជាសាធារណៈបានផ្ទុះឡើង បន្ទាប់ពីវីដេអូនៃហេតុការណ៍នេះត្រូវបានចែកចាយនៅលើអ៊ីនធឺណិត ហើយមានសេចក្តីរាយការណ៍ថា អ្នកឈរមើលមួយចំនួនបានចំអកនាងហើយបានជំរុញឲ្យយុវនារីរូបនេះលោតឲ្យលឿន ខណៈក្រុមពន្លត់អគ្គិភ័យព្យាយាមជួយសង្គ្រោះនាង។
ប៉ូលិសបាននិយាយកាលពីថ្ងៃចន្ទថា ពួកគេបានឃាត់ខ្លួនមនុស្សពីរនាក់ដែលបានសើចចំអកហើយបានចាប់ផ្តើមការស៊ើបអង្កេតលើមនុស្សចំនួន៦នាក់ទៀតដោយសារការសរសេរពាក្យប្រមាថអំពីនាង Li ហើយបង្ហោះក្នុងអនឡាញ។
ក្មេងជំទង់ម្នាក់នេះមានការខកចិត្តដោយសារតែរដ្ឋអាជ្ញាបានប្រកាសថាគ្មានទោសចំពោះគ្រូបង្រៀនវិទ្យាល័យម្នាក់ដែលនាងចោទប្រកាន់ថាបានថើបនាងទាំងបង្ខំនិងព្យាយាមដោះសំលៀកបំពាក់របស់នាងចេញនៅខែកញ្ញាឆ្នាំ២០១៦។
នាង Li និងឪពុករបស់នាងបានស្វែងរកការចោទប្រកាន់ម្តងហើយម្តងទៀតប្រឆាំងនឹងគ្រូបង្រៀនរូបនោះប៉ុន្តែរដ្ឋអាជ្ញាមូលដ្ឋានបានសម្រេចចិត្តមិនចោទប្រកាន់គាត់ដោយប្រកាសថា អាកប្បកិរិយារបស់គាត់គឺជាបទល្មើស “បន្តិចបន្តួច” ដែលមិនបង្កទៅជាឧក្រិដ្ឋកម្មទេ។ រួចមកនាងបានអំពាវនាវដល់រដ្ឋអាជ្ញាជាន់ខ្ពស់ម្នាក់ដែលក៏បានបដិសេធរឿងក្តីរបស់នាងផងដែរ។
គ្រូបង្រៀនរូបនោះត្រូវបានគេឃុំឃាំងរយៈពេលខ្លីប៉ុន្ដែបានរក្សាការងាររបស់គាត់។
ករណីបៀតបៀនផ្លូវភេទបានធ្វើឲ្យរញ្ជួយនៅតាមសាកលវិទ្យាល័យនានាក្នុងប្រទេសចិនក្នុងរយៈពេលប៉ុន្មានខែចុងក្រោយនេះដែលជាហេតុជំរុញឲ្យមានចលនា #MeToo ប៉ុន្តែមានកម្រិតទាបជាងប្រទេសដទៃទៀតដោយសារមានការត្រួតពិនិត្យពីសំណាក់អាជ្ញាធរ។
លោកស្រី Guo Jianmei មេធាវីសិទិ្ធនារីនៅទីក្រុងប៉េកាំងបាននិយាយថា មានករណីរំលោភបំពានផ្លូវភេទតិចតួចប៉ុណ្ណោះដែលត្រូវបានកាត់ទោសដោយសារតែខ្វះភស្តុតាងហើយកង្វះនៃការគោរពចំពោះស្ត្រីបានរួមចំណែកក្នុងករណីបែបនេះដែលមិនត្រូវបានគេយកចិត្តទុកដាក់ខ្លាំងក្លាទេនៅក្នុងប្រទេសចិន។
ប៉ូលិសបាននិយាយកាលពីថ្ងៃចន្ទថា នាង Li បានព្យាយាមសម្លាប់ខ្លួនបួនដងមកហើយមុនពេលស្លាប់៕ AFP
Source: Kampuchea Thmey Daily
0 Comments