បាត់ដំបង ៖ បុរសវ័យចំណាស់ៗចំនួនពីរនាក់ បានស្លាប់ម្នាក់នៅនឹងកន្លែងកើតហេតុ និងម្នាក់ទៀត ក៏បានស្លាប់ដែរ ក្រោយពេលបញ្ជូនតាមផ្លូវឆ្ពោះទៅកាន់មន្ទីរពេទ្យ បន្ទាប់ពីពួកគាត់ទាំងពីរនាក់ បានបើកបរម៉ូតូក្នុងល្បឿនយ៉ាងលឿន ដោយគ្មានការយោគយល់គ្នា ក៏បានបាត់បង់ម្ចាស់ការ ដោយភាគីម្ខាងបានរេចង្កូតទៅបុកលើភាគីម៉ូតូឌុប បណ្តាលអោយស្លាប់ខ្លួនឯងមុន។
ករណីគ្រោះថ្នាក់ចរាចរណ៍នេះ បានកើតឡើងនៅវេលាម៉ោង៦ល្ងាច ថ្ងៃទី១៩ ខែមិថុនា ឆ្នាំ២០១៨ ត្រង់ចំណុចភូមិសំរោង ឃុំធិបតី ស្រុកគាស់ក្រឡ ខេត្តបាត់ដំបង រវាងម៉ូតូនិងម៉ូតូ ក្នុងទិសដៅច្រាសទិសគ្នា ដែលបង្កអោយស្លាប់ភាគីទាំងសងខាង បន្ទាប់ពីបានបញ្ជូនទៅកាន់មន្ទីរពេទ្យ។
តាមរបាយការណ៍របស់សមត្ថកិច្ចជំនាញ ដែលអះអាងដោយលោកវរសេនីយ៍ឯក ឆាង វណ្ណឆៃ អធិការ នគរបាលស្រុកគាស់ក្រឡ គឺបានបញ្ជាក់ថា នៅពេលកើតហេតុនោះ គេសង្កេតឃើញមានម៉ូតូចំនួន២គ្រឿង ដែលទី ១-ម៉ូតូសេ១២៥ ស៊េរី២០១៨ ពណ៌ ខ្មៅ ពាក់ស្លាកលេខ បាត់ដំបង 1AC3532 បើកបរដោយ ឈ្មោះ លឹម ដារិទ្ធិ ភេទប្រុសអាយុ៤៩ឆ្នាំ រស់នៅភូមិកាប់គោថ្មី សង្កាត់អូរចារ ក្រុងបាត់ដំបង មានមុខរបរ ជាអ្នករត់ម៉ូតូឌុប (របួសធ្ងន់) បានបញ្ជូនទៅមន្ទីពេទ្យបង្អែកស្រុកមោងឬស្សី ប៉ុន្តែត្រូវបានស្លាប់នៅពាក់កណ្តាលផ្លូវ ត្រង់ចំណុចអូរសណ្តាស ពេលបញ្ជូនបន្តទៅកាន់មន្ទីរពេទ្យខេត្ត។ ទី២-ម៉ូតូសេ១២៥ ស៊េរី២០១៤ ពណ៌ខ្មៅ ពាក់ស្លាកលេខ បាត់ដំបង 1R3661 អ្នកបើកបរមានឈ្មោះ សុខ ថូ ភេទប្រុស អាយុ៥៨ឆ្នាំ រស់នៅភូមិស្វាយជាតិ ឃុំរាំងកេសី ស្រុកសង្កែ បានស្លាប់ភ្លាមៗនៅនឹងកន្លែង។
លោកអធិការបានបន្តថា បើតាមការពិនិត្យគឺភាគីម៉ូតូដែលបានស្លាប់ភ្លាមៗ គឺជាភាគីបង្កដោយសារតែគេបានបើកបរលឿន ហើយបានឆ្លងចូលទៅក្នុងគន្លងខាងឆ្វេង បណ្តាលអោយបុកទៅលើម៉ូតូដែលមកពីមុខតែម្តង។ ក្រោយពេលកើតហេតុ សមត្ថកិច្ចក៏បានប្រគល់សពទៅអោយក្រុមគ្រួសារ នាំយកទៅធ្វើបុណ្យតាមប្រពៃណីហើយ ដោយឡែកម៉ូតូក៏ត្រូវបានយកទៅរក្សាទុកនៅអធិការដ្ឋាន រង់ចាំធ្វើការដោះស្រាយជាក្រោយ៕
Source: Kampuchea Thmey Daily
0 Comments