កំពង់ឆ្នាំង ៖ បុរសម្នាក់ បានធ្វើអត្តឃាត ដោយចងកសម្លាប់ខ្លួននៅក្នុងបន្ទប់ទឹក ដោយសារជំពាក់លុយគេច្រើនគ្មានអ្វីសងគេ។
ហេតុការណ៍នេះ បានកើតឡើងនៅចន្លោះពីម៉ោង៨ទៅម៉ោង១១យប់ ថ្ងៃទី១១ ខែមិថុនា ឆ្នាំ២០១៨ នៅក្នុងភូមិស្នោរ ឃុំខុនរ៉ង ស្រុកបរិបូណ៌ ខេត្តកំពង់ឆ្នាំង។
សមត្ថកិច្ចនគរបាលមូលដ្ឋានបានអោយដឹងថា ៖ បុរសរងគ្រោះមានឈ្មោះសៀន ចាន់សិទ្ធ អាយុ២៣ឆ្នាំ មានប្រពន្ធឈ្មោះយ៉ាន សុខមន អាយុ២៤ឆ្នាំ មានទម្ងន់ និងមានមុខរបរជាកសិករទាំង២នាក់ប្តីប្រពន្ធ មានទីលំនៅក្នុងភូមិឃុំកើតហេតុខាងលើ។
តាមការស្រាវជ្រាវរបស់សមត្ថកិច្ច ពីក្រុមគ្រួសារជនធ្វើអត្តឃាត បានអោយដឹងថា ៖ បុរសរងគ្រោះខាងលើមានវិបត្តិផ្លូវចិត្ត ដោយបានជំពាក់លុយគេច្រើន មិនអាចរកលុយសងគេ ក៏មានគំនិតគិតខ្លីបានសម្រេចចិត្តចងកខ្លួនឯងនឹងធ្នឹមបន្ទប់ទឹកក្បែរផ្ទះ សម្លាប់ខ្លួនឯងតែម្តង។
ករណីនេះ សមត្ថកិច្ចបានធ្វើកោសល្យវិច័យសពតាមបច្ចេកទេស ហើយបានបញ្ជាក់ថា ៖ បុរសរូបនេះពិតជាស្លាប់ដោយការចងកសម្លាប់ខ្លួនឯងពិតប្រាកដមែន ហើយសមត្ថកិច្ចក៏បានប្រគល់សពខាងលើអោយក្រុមគ្រួសារយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments