២ជម្រើស ដែលរដ្ឋបាលរាជធានីភ្នំពេញ ដាក់ចេញដើម្បីអោយរាជធានីក្លាយជាទីក្រុងលំហបៃតងកាត់បន្ថយហានិភ័យ

ភ្នំពេញ ៖ ខណៈដែលសេដ្ឋកិច្ចរបស់ប្រជាពលរដ្ឋនៅក្នុងរាជធានីភ្នំពេញ មានការរីកចម្រើនខ្ពស់ មានសំណង់អាគារតូចធំ អគាខ្ពស់ៗ ក៏ដូចជាបុរីសំណង់ផ្សេងៗ រីកដុះដាលមិនឈប់ឈរនោះរដ្ឋបាលរាជធានីភ្នំពេញ បានដាក់ចេញជាជម្រើស២ ដើម្បីអោយរាជធានីក្លាយជាទីក្រុងលំហបៃតងកាត់បន្ថយហានិភ័យនៅគឺការថែទាំដើមឈើការកាត់លះដើមឈើដែរចាស់ទ្រុឌទ្រោម និងការបង្កើនការដាំដើមឈើបន្ថែម។

នេះបើតាមការបញ្ជាក់អោយដឹងក្នុងកិច្ចប្រជុំពាក់ព័ន្ធជាមួយនឹងបញ្ហាលំហបៃតងកាលពីរសៀលថ្ងៃទី២០ ខែមិថុនា ឆ្នាំ២០១៨នៅសាលារាជធានីភ្នំពេញ ក្រោមអធិបតីភាពលោក ឃួង ស្រេង អភិបាលរាជធានី ដោយមានវត្តមានអភិបាលខណ្ឌទាំង១២ មន្ត្រីជំនាញ និងមន្ទីរអង្គភាពផ្សេងៗ ចំណុះអោយរាជធានីមួយចំនួនទៀត។

លោកម៉េត មាសភ្តី អ្នកនាំពាក្យរដ្ឋបាលរាជធានីភ្នំពេញបានបញ្ជាក់អោយដឹង ក្រោយកិច្ចប្រជុំនេះថា កិច្ចប្រជុំនេះ បានពិភាក្សាអំពីកិច្ចការមួយចំនួន ពាក់ព័ន្ធជាមួយនឹងបញ្ហាលំហបៃតងក៏ដូចជាបញ្ហាដើមឈើ ដែលយើងត្រូវយកចិត្តទុកដាក់គិតគូរ ពិសេសផ្តោតទៅលើបញ្ហាសុវត្ថិភាព ព្រោះយើងមើលឃើញថា រដូវវស្សាចាប់ផ្តើមសម្រាប់ឆ្នាំ២០១៨នេះ។ លោកថា កន្លងមកថ្មីៗនេះ យើងបានមើលឃើញ ពីការកើតមាននូវឧបត្តិហេតុមួយចំនួន នៃការដួលរលំដើមឈើ។ នៅក្នុងនោះដែរក្រុមការងារដែលផ្តួចផ្តើមដោយ លោកអភិបាលបានពិភាក្សាយ៉ាងល្អិតល្អន់ ពាក់ព័ន្ធជាមួយមូលហេតុ ដែលមានការងាប់ និងដួលរលំនៃដើមឈើ បន្ទាប់ពីកិច្ចប្រជុំពិភាក្សា ពីមូលហេតុចម្បងមួយចំនួន មើលឃើញថា ភាគច្រើននៃការបាក់រលំគឺ កើតចេញពីអាយុកាល ឬក៏ភាពសឹករេចរឹលចាស់ទ្រុឌទ្រោមរបស់ដើមឈើនីមួយៗ ដែលស្របទៅនឹងការទទួលរងកម្លាំងខ្យល់ភ្លៀងកន្ត្រាក់ផ្សេងៗនោះ ដែលធ្វើឲ្យទីតាំងដើមឈើមួយចំនួនដួលរលំ។

លោកម៉េត មាសភ្តីបន្តទៀតថា ជុំវិញបញ្ហាដើមឈើបាក់រលំ រយៈពេលប៉ុន្មានសប្តាហ៍ចុងក្រោយនេះ លោកអភិបាលបានសរុប នឹងធ្វើការដាក់ចេញនូវទិសដៅមួយចំនួន គឺ ទី ១ពាក់ព័ន្ធជាមួយមន្ទីរទាំងពីរដែលជាសេនាធិការផ្ទាល់របស់រដ្ឋបាលរាជធានីភ្នំពេញគឺមន្ទីរសាធារណការ ដែលមានអង្គភាពសួនច្បារដើមឈើជាសេនាធិការ មន្ទីរកសិកម្ម ដែលមានរដ្ឋបាលព្រៃឈើជាចំណុះ ត្រូវរួមគ្នាបង្កើតក្រុមការងារមួយសម្រាប់ចុះពិនិត្យវាយតម្លៃអំពីគុណភាព ស្ថានភាព នៃដើមឈើដែលយើងមាននៅក្នុងរាជធានីភ្នំពេញ ហើយនឹងលើកជាគម្រោងដើម្បីជាការៀបចំកែលម្អឡើងវិញ ពោលគឺ ប្រសិនបើដើមឈើណាមានសភាពទ្រុឌទ្រោមខ្លាំង យើងត្រូវដកចេញ កាប់ចេញមុនវាបាក់រលំដួល បង្កទៅជាគ្រោះថ្នាក់ដោយយថាហេតុហេតុផ្សេងៗ ទៅលើទ្រព្យសម្បត្តិ ឫក៏អាយុជីវិតមនុស្ស។ ចំពោះទីតាំងខ្លះទៀត ដែលទាមទារអោយយើងមានការថែបំប៉ន ឬក៏រៀបចំគិតគូរដាក់ជីបំប៉នសុខភាពដើមឈើឲ្យមានភាពប្រសើរ ឬក៏យើងគ្រាន់តែកាប់រះមែកចេញ ដើម្បីឲ្យមែកដែលពុកផុយចាស់ត្រូវបានកាប់ចោលនោះ លាស់មែកជាថ្មីដែលមានសុខភាពល្អមានកម្លាំងរឹងមាំទ្រទ្រង់បានប្រសើរជាងមុន ជាមួយស្ថានភាពខ្យល់ភ្លៀងកន្ត្រាក់ផ្សេងៗនោះ ក៏យើងត្រូវរៀបចំគិតគូរដែរ។

លោកម៉េត មាសភ្តីក៏បានបញ្ជាក់ផងដែរថា ការមើលថែទាំដើមឈើជាកិច្ចការដែលបានជម្រាបជូនខាងលើនេះ ជាកិច្ចការទីមួយដែលអង្គប្រជុំបាន ពិភាក្សា។ ដោយឡែក កិច្ចការទី ២ គិតគូរពង្រីក ឬក៏ដាំបន្ថែមនូវតំបន់បៃតង ឬលំហបៃតង ឲ្យមានច្រើនថែមទៀតនៅក្នុងរាជធានីភ្នំពេញ ស្របតាមផែនការមានស្រាប់ ដែលលោកអភិបាលបានយកចិត្តទុកដាក់ ហើយបានឲ្យអភិបាលរងទទួលបន្ទុក២រូប ធ្វើការប្រជុំពិភាក្សាគិតគូរលើកគម្រោងឡើងវិញបន្ថែមទៀត ទីតាំងណា ផ្លូវណា ដែលយើងគ្រោងនឹងដាំដើមឈើអ្វី ផ្លូវណា ទីតាំងដែលត្រូវបន្ថែមដើមឈើ។

លោកបន្តទៀតថា រុក្ខជាតិបន្ថែម ការដាំដើមឈើលើលំហបៃតងនេះ គឺក្នុងន័យបង្កើនសោភណភាពទីក្រុងភ្នំពេញ ស្របជាមួយនឹងសំណង់អាគារ ដែលធំស្កឹមស្កៃដែលមានស្រាប់ ហើយយើងត្រូវដឹងថាដើមឈើគឺបង្កើតអូកស៊ីសែននៅពេលថ្ងៃ វាជាចំណែកមួយសម្រាប់ផ្តល់ឲ្យមនុស្ស សត្វដែលមានជីវិតទាំងអស់ ហើយវាស្រូបទៅវិញនូវឧស្ម័នជាតិពុលផ្សេងៗ ដែលកើតចេញពីផ្សែងឧស្សាហកម្ម និងម៉ូតូរថយន្តផងដែរនៅក្នុងរាជធានីភ្នំពេញ៕