ក្រុម​បឹងកេត បន្ត​កិច្ចសន្យា​ជាមួយ​កីឡាករ​យុវជន​៤​នាក់​រហូតដល់​ឆ្នាំ​២០២០ ខាងមុខ​

ក្រុម​បឹងកេត សមាជិក​ក្នុង​ពានរង្វាន់​លី​គ​កំពូល​កម្ពុជា Metfone Cambodian League 2018 បានសម្រេច​បន្ត​កិច្ចសន្យា​ជាមួយ​កីឡាករ​យុវជន​ថ្នាល​របស់​ក្លិប​ចំនួន​៤​នាក់​ រហូតដល់​ឆ្នាំ​២០២០ ខាងមុខ ខណៈ​កីឡាករ​ទាំងនោះ ​បាន​ចូលរួម​ជាមួយ​ក្លិប​តាំងពី​២​ឆ្នាំមុន​ម្ល៉េះ។



​យោង​តាម​សេចក្តី​ជូនដំណឹង​របស់​ក្លិប ​កាល​ពី​ពេល​ថ្មីៗ​បាន​បញ្ជាក់​ថា «​ក្លិប​រីក​រីករាយ​នឹង​ធ្វើ​ការប្រកាស​ជូន​អំពី​ការ​បន្ដ​កិច្ចសន្យា​ជាមួយ​កីឡាករ​យុវជន​របស់​យើង​ចំនួន​៤​រូប ​ដែលកិច្ចព្រមព្រៀង​នេះ​ មាន​សុពលភាព​រហូតដល់​បំណាច់​ឆ្នាំ​២០២០​។ យុវជន​ទាំង​៤​រូប​រួមមាន ជា វេ​ស្លី​, ឃុន សេង​ថៃ​, ឱ ភា​រុន និង អ៊ុយ វុត្ថា សុទ្ធតែជា​កីឡាករ​យុវជន​ថ្នាល​របស់​ក្លិប​ដែល​បាន​ចូលរួម​ហ្វឹកហាត់​ជាមួយ​ក្លិប​អស់​រយៈពេល​ច្រើន​ឆ្នាំ​កន្លង​មក​ហើយ​ ពួកគេ​ត្រូវ​បាន​ដំឡើង​មកកាន់​ឈុត​ធំ​ចាប់តាំងពី​ឆ្នាំ​២០១៦​មក​ម្ល៉េះ»។



គិត​ត្រឹម​ពេលនេះ​មិត្ត​រួម​ជំនាន់​របស់​កីឡាករ​ទាំង​៤​នាក់​ខាងលើ មាន ម៉ាត់ យ៉ា​ម៉ី​ន​, សួន សុភ​ត្រា​, សេត រ៉​ស៊ី​ប សុទ្ធតែ​ត្រូវបាន​លោក ហៅ សុជាតិ គ្រូបង្វឹក​ប្រចាំ​ក្រុម​ដាក់​ឲ្យ​ចូលលេង​ក្នុង​ជម្រើស​១១​នាក់​ដំបូង​បណ្តើៗ​ទាំង​ក្នុង​ប្រកួត​លី​គ​កំពូល​កម្ពុជា ឬ ពានរង្វាន់ AFC Cup នាពេល​កន្លងទៅ​ខណៈ​កីឡាករ​ភាគច្រើន​ប្រចាំ​ក្រុមយុវជន​ថ្នាល​របស់​ក្លិប​ធ្លាប់បាន​ចូល​លេង​ក្នុង​ពានរង្វាន់​សម្តេច​តេ​ជោ ហ៊ុន សែន កាលពី​ឆ្នាំ​២០១៦ ជាមួយគ្នា មុន​ទទួលបាន​បទពិសោធ​ន៍​នៅ​ក្រុម​ធំ​ពេលនេះ​។



បឹងកេត ត្រូវការ​ពង្រឹងសមត្ថភាព​កីឡាករ​ក្នុងស្រុក​បន្ថែម ចំ​ពេល​ដែល​កីឡាករ​ឆ្នើមៗ​មួយចំនួន​ដូចជា ឃួន ឡា​បូ​រ៉ាវី​, ចាន់ វឌ្ឍនាកា​, សុខ សុវណ្ណ ចាកចេញ​នា​ពេល​កន្លងទៅ ខណៈ​ក្រុម​ក៏ត្រូវ​ការពារ​តំណែង​ជើងឯក​ក្នុង​ពានរង្វាន់​លី​គ​កំពូល​កម្ពុជា ព្រមទាំង​ត្រៀម​ប្រកួត​ក្នុង​ពានរង្វាន់​សម្តេច​តេ​ជោ ហ៊ុន សែន នៅ​ខែក្រោយ​។



​ក្លិប​បឹងកេត ឡើង​មកលេង​ពានរង្វាន់​លី​គ​កំពូល​កម្ពុជា នៅ​ឆ្នាំ​២០១២ ហើយ​ធ្លាប់​ឈ្នះ​ជើងឯក​ចំនួន​៣​លើក​គឺ​នៅ​ឆ្នាំ​២០១២,២០១៦ និង​២០១៧ ខណៈ​នៅ​ឆ្នាំ​២០១៣ និង​២០១៤ ត្រឹម​ឈរជើង​ឯក​រង​។ នៅ​ឆ្នាំ​២០១៧ ក្រុម​នេះ​ឈ្នះ​ពានរង្វាន់ CNCC Cup 2017 ផងដែរ​។ ចំណែក​ពានរង្វាន់​នៅក្រៅ​ស្រុក​វិញ​ក្រុម​ដែល​មាន​ប្រភព​មកពី​ខេត្តកំពង់ចាម មួយ​នេះ​ធ្លាប់​ចេញទៅ​ប្រកួត​វគ្គ​ជម្រុះ​តាម​ពូ​ល​ពានរង្វាន់ AFC President's Cup នៅ​ឆ្នាំ​២០១៣ ធ្លាប់​ឡើង​ដល់​វគ្គ​ផ្ដាច់ព្រ័ត្រ​ពានរង្វាន់ Toyota Mekong Club Championship 2015 តែ​ចាញ់​ក្រុម Buriram United របស់​ថៃ និង​ប្រកួត​ក្នុង​ពានរង្វាន់​នៅ​ឆ្នាំ​២០១៦ និង​២០១៧ ផង​ដែរ​។ នៅ​ឆ្នាំ​២០១៨ ក្រុម​នេះ​មានឈ្មោះ​ចេញទៅ​លេង​ពានរង្វាន់លំដាប់​ទី២ ប្រចាំ​អាស៊ី​ AF Cup ផងដែរ តែធ្លាក់ត្រឹម​វគ្គ​ជម្រុះ​តាម​ពូល​ដូចគ្នា៕

    

Source: Kampuchea Thmey Daily