ភ្នំពេញ ៖ យុវជន២នាក់ ត្រូវបានកម្លាំងនគរបាលខណ្ឌជ្រោយចង្វារសហការជាមួយប៉ុស្តិ៍ព្រែកលៀប ឃាត់ខ្លួន ខណៈឆែកឆេរកឃើញថ្នាំញៀន២កញ្ចប់ កាលពីវេលាម៉ោង២២និង២០នាទីថ្ងៃទី១៩ ខែមិថុនា ឆ្នាំ២០១៨ ស្ថិតនៅចំណុចភូមិព្រែកលៀប សង្កាត់ព្រែកលៀប ខណ្ឌជ្រោយចង្វាររាជធានីភ្នំពេញ។
ជនសង្ស័យទី១ឈ្មោះ សុខហេងអាយុ៣៨ឆ្នាំ ភេទប្រុស មុខរបរជាងផ្សារដែក ទី២ឈ្មោះ ថាត ចេងរដ្ឋ ភេទប្រុស អាយុ២៤ឆ្នាំ មុខរបរជាងផ្សារដែក ទាំង២នាក់រស់នៅភូមិត្រពាំលើ ឃុំតាអែក ស្រុកខ្សាច់កណ្តាល ខេត្តកណ្តាល។
សមត្ថកិច្ចឱ្យដឹងថា មុនពេលកើតហេតុ កម្លាំងនគរបាលខណ្ឌជ្រោយសហការជាមួយប៉ុស្តិ៍ព្រែកលៀប កំពុងដើរល្បាតក្នុងភូមិសាស្ត្រទប់ស្កាត់បទល្មើសផ្សេងៗដើម្បីការពារសុវត្ថិភាពជូនប្រជាពលរដ្ឋ ក្នុងមូលដ្ឋាន ស្រាប់តែប្រទះឃើញជនសង្ស័យចំនួន២នាក់ជិះម៉ូតូ២គ្រឿង ដោយមានការសង្ស័យបានហៅឲ្យឈប់ត្រួតពិនិត្យ ក៏រកឃើញថ្នាំញៀន២កញ្ចប់ ដែលជនសង្ស័យលាក់ទុកបម្រុងយកទៅចែកចាយ ទើបឃាត់ខ្លួនភ្លាមៗតែម្ដង។
បច្ចុប្បន្ន ជនសង្ស័យរួមទាំងវត្ថុតាង ត្រូវបញ្ជូនមកអធិការដ្ឋានខណ្ឌជ្រោយចង្វារ ដើម្បីកសាងសំណុំរឿងបញ្ជូនបន្តទៅសាលាដំបូងរាជធានីភ្នំពេញចាត់ការតាមច្បាប់៕
Source: Kampuchea Thmey Daily
0 Comments