រថយន្តហាយលែនឌ័រ មួយគ្រឿង ត្រូវភ្លើងឆេះខ្ទេច ប៊ិះឆេះទាំងការ៉ាស់សាំងទៀត កុំតែបានរថយន្តពន្លត់អគ្គិភ័យបាញ់ពន្លត់ទាន់

បន្ទាយមានជ័យ ៖ រថយន្តហាយលែនឌ័រ មួយគ្រឿង ត្រូវភ្លើងឆេះខ្ទេចមកពីឆ្លងចរន្តភ្លើង កុំតែរថយន្តពន្លត់អគ្គិភ័យរបស់ស្នងការជួយបាញ់ពន្លត់ទាន់ កុំអីការ៉ាស់សាំង ក៏ត្រូវឆេះខ្ទេចអស់ដែរ។

ហេតុការណ៍នេះ កើតឡើងនៅព្រឹកថ្ងៃទី១៧ ខែមិថុនា ឆ្នាំ២០១៨ ក្នុងបរិវេណការ៉ាស់សាំងនិងហ្គាស៍ក្បែរកំណាត់ផ្លូវជាតិលេខ៥ស្ថិតក្នុងភូមិថ្មី ឃុំសំរោង ស្រុកអូរជ្រៅ ខេត្តបន្ទាយមានជ័យ។

លោក សេស វិបុល អធិការនគរបាលស្រុកអូរជ្រៅបានប្រាប់អ្នកយកព័ត៌មានឲ្យដឹងថា នៅពេលកំពុងកើតហេតុនោះ បើតាមម្ចាស់រថយន្តមានឈ្មោះ បឿយ បៀ ភេទប្រុស អាយុ៣០ឆ្នាំ រស់នៅភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ បានប្រាប់សមត្ថកិច្ចឲ្យដឹងថាខ្លួននិងក្រុមគ្រួសារ បានបើករថយន្តហាយលែនឌ័រ ពណ៌ខ្មៅ ពាក់ស្លាកលេខ2AK-6805ជិះជាលក្ខណៈគ្រួសារ។ រថយន្តនេះ បំពាក់ប្រព័ន្ធហ្គាស៍ គាត់និងក្រុមគ្រួសារមានបំណងទៅលេងក្រុងប៉ោយប៉ែត លុះជិះមកដល់ពាក់កណ្តាលផ្លូវ ក៏ឃើញការ៉ាស់សាំង និងហ្គាស៍ ក៏បត់ចូលក្នុងបំណងបញ្ចូលហ្គាស៍ ពេលបត់ចូលជិតដល់ហើយ ស្រាប់តែមានអណ្តាតភ្លើងឆាបឆេះឡើងចេញពីកាប៉ូមុខធ្វើពួកគាត់បើកទ្វារចុះចេញទាំងគ្រួសារយ៉ាងប្រញាប់ព្រោះខ្លាចផ្ទុះ។ ក្រោយពីភ្លើងឆេះរថយន្តពេញបន្ទុក រថយន្តរបស់ស្នងការដ្ឋាននគរបាលខេត្តចំនួនពីរគ្រឿង បានមកដល់ហើយបានជួយបាញ់ពន្លត់យ៉ាងសស្រាក់សស្រាំ មួយសន្ទុះក្រោយមកភ្លើង ត្រូវបានរលត់។

លោក សេស វិបុល បានបញ្ជាក់ឲ្យដឹងទៀតថា សំណាងរថយន្តបាញ់ពន្លត់ទាន់ពេលវេលា បើពុំមានរថយន្តបាញ់ទឹកបាញ់អន្តរាគមន៍នោះទេ ការ៉ាស់ក៏ឆេះអស់ដែរ ហើយសំណាងណាស់ដែរ ដែល មិនមាននរណាម្នាក់រងរបួស។

សមត្ថកិច្ចបានអះអាងថា រថយន្តឆេះនេះអាចបណ្ដាលមកពីការរត់ប្រព័ន្ធហ្គាស៍មិនមានស្តង់ដារត្រឹមត្រូវ ទើបបង្កឲ្យមានហានិភ័យដ៏ធំយ៉ាងនេះ ដូច្នេះសូមអ្នកប្រើប្រាស់រថយន្តបំពាក់ប្រព័ន្ធហ្គាស៍ត្រូវបង្កើនការប្រុងប្រយ័ត្ន និងឧស្សាហ៍ឆែកមើលទើបជៀសវាងការឆាបឆេះរថយន្ត៕