ភ្នំពេញ ៖ ដើម្បីធ្វើកិច្ចសហប្រតិបត្តិការបន្ថែម លើការអភិវឌ្ឍន៍សុខភាពនិងសុខុមាលភាពរវាងប្រទេសកម្ពុជានិងប្រទេសជប៉ុននោះ មន្ទីរពេទ្យកាល់ម៉ែតបានសហការជាមួយមូលនិធិ ACT នៃប្រទេសជប៉ុន (សមាគមសម្រាប់ការទំនាក់ទំនងនៃការសិក្សាផ្លាស់ប្តូរវប្បធម៌) និងបានចុះអនុស្សរណៈយោគយល់គ្នាកាលពីព្រឹកថ្ងៃទី១ ខែមិថុនា ឆ្នាំ២០១៨នេះ នៅមន្ទីរពេទ្យកាល់ម៉ែត។
លោកសាស្ត្រាចារ្យ វេជ្ជបណ្ឌិត ឈាង រ៉ា អគ្គនាយកមន្ទីរពេទ្យកាល់ម៉ែតបានមានប្រសាសន៍ថា មន្ទីរពេទ្យកាល់ម៉ែតបានសហការជាមួយមូលនិធិ ACT នៃប្រទេសជប៉ុន(សមាគមសម្រាប់ការទំនាក់ទំនងនៃការសិក្សាផ្លាស់ប្តូរវប្បធម៌) និងបានចុះអនុស្សរណៈយោគយល់គ្នាដើម្បីធ្វើកិច្ចសហប្រតិបត្តិការបន្ថែមលើការអភិវឌ្ឍន៍សុខភាពនិងសុខុមាលភាពរវាងប្រទេសកម្ពុជានិងប្រទេសជប៉ុន នៅឆ្នាំ២០១៦ ហើយប្រតិភូមន្ទីរពេទ្យកាល់ម៉ែតបានធ្វើទស្សនកិច្ចនិងស្វែងយល់បន្ថែមអំពីសេវាសង្គ្រោះបន្ទាន់និងការអភិវឌ្ឍន៍ស្ថាប័នវេជ្ជសាស្ត្រនៅប្រទេសជប៉ុន។
លោកសាស្រាចារ្យ អគ្គនាយកមន្ទីរពេទ្យកាល់ម៉ែតបានបន្តថា នៅថ្ងៃនេះមូលនិធិACTបានចំណាយពេលវេលារៀបចំសិក្ខាសាលាផ្លាស់ប្តូរ យោបល់និងបទពិសោធន៍លើការអភិវឌ្ឍន៍ សុខភាពនិងសុខមាលភាពរវាងប្រទេសកម្ពុជានិងប្រទេសជប៉ុនក្នុងនោះមានថ្នាក់ដឹកនាំជប៉ុននិងថ្នាក់ដឹកនាំកម្ពុជាចូលរួមដើម្បីផ្លាស់ប្តូរបទពិសោធន៍ពីគ្នាទៅវិញទៅមកផងដែរ។
លោកអគ្គនាយកមន្ទីរពេទ្យកាល់ម៉ែតបានបញ្ជាក់ថា យើងពិភាក្សាគ្នាជាដំបូងនេះដើម្បីនិងបើកជើងមេឃនៃការពនិត្យទៅលើលទ្ធភាពនៃការសហប្រតិបត្តិការស៊ីជម្រៅទៅអនាគតនោះ យើងត្រូវលើកឡើងចំណុចសំខាន់ៗមានបីគឺ -ទី១ ដោយសារនៅកម្ពុជាយើងមានអាទិភាពនៃបញ្ហាទៅលើផ្នែកគ្រោះថ្នាក់ចរាចរណ៍ក៏ដូចជាគ្រោះថ្នាក់ផ្សេងៗដែលទាមទារការយកចិត្តទុកដាក់ក្នុងការថែរទាំដោយមុនមកផ្នែកសង្គ្រោះបន្ទាន់នៅមន្ទីរពេទ្យ និងការសង្គ្រោះបន្ទាន់ក្នុងមន្ទីរពេទ្យ កិច្ចការពីរនេះធំដែលជាអាទិភាព។ -ទី២ គឺការដែលយើងត្រូវការស្វែងយល់អំពីបច្ចេកវិទ្យាដែលកាន់តែជឿនលឿនហើយវាទាមទារឲ្យយើងត្រូវតែសម្របសម្រួលយកមកប្រើប្រាស់នៅក្នុងព្រះរាជាណាចក្រកម្ពុជាឲ្យទាន់ការអភិវឌ្ឍន៍ពិភពលោក។ -ទី៣ ការបណ្តុះបណ្តាលធនធានមនុស្សដែលទាមទារឲ្យមានការដកពិសោធន៍ជាក់ស្តែងជាមួយមិត្តជប៉ុនហើយនិងធ្វើការផ្លាស់ប្តូរយោបល់និងទៅសិក្សាផ្តល់នៅប្រទេសជប៉ុនតែម្តង ដើម្បីលើកកម្ពស់កិច្ចសហប្រតិបត្តិការលើការអភិវឌ្ឍន៍ សុខភាពនិងសុខុមាលភាពរវាងប្រទេសទាំងពីរផងដែរ៕
Source: Kampuchea Thmey Daily
0 Comments