ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានបង្ហាញពីការយកចិត្តទុកដាក់ទៅលើអាហារូបត្ថម្ភកាត់បន្ថយអត្រាស្លាប់របស់មាតា និង ទារក ដោយសម្តេចបានបញ្ជាក់ថា នៅពាក់កណ្តាលឆ្នាំ២០១៩ស្ត្រីក្រីក្រមានផ្ទៃពោះនិងឆ្លងទន្លេនឹងទទួលបានប្រាក់ឧបត្ថម្ភ ពីរាជរដ្ឋាភិបាល។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានថ្លែងបែននេះនៅព្រឹកថ្ងៃទី០៤ ខែមិថុនា ឆ្នាំ២០១៨នេះ ក្នុងឳកាសអញ្ជើញជាអធិបតីប្រារព្ធពិធីអបអរសាទរខួបលើកទី១១ឆ្នាំ នៃទិវាអតីតយុទ្ធជនកម្ពុជា។
សម្តេចតេជោ ហ៊ុន សែន បានមានប្រសាសន៍ថា“ក្នុងដំណើរឆ្ពោះទៅមុខរាជរដ្ឋាភិបាលក្រោមការដឹកនាំរបស់គណបក្សប្រជាជនកម្ពុជាបានកំណត់រួចហើយក្នុងគោលនយោបាយបក្សប្រជាជនកម្ពុជាសម្រាប់កសាងនិងការពារមាតុភូមិកម្ពុជាឆ្នាំ២០១៨-២០២៣ ដោយរួមទាំងអភិវឌ្ឍនិងពង្រឹងប្រព័ន្ធគាំពារសង្គមឲ្យប្រកបដោយប្រសិទ្ធភាពនិងចីរភាពដែលជួយគាំពារប្រជាជនគ្រប់រូបពីហានិភ័យនានាដោយមិនទុកឲ្យប្រជាជនណាម្នាក់ស្ថិតនៅក្រៅប្រព័ន្ធគាំពារសង្គមឡើយគណបក្សប្រជាជនកម្ពុជានៅតែរក្សាជំហររួមសុខរួមទុក្ខជាមួយប្រជាជននៅគ្រប់កាលៈទេសៈ”។
សម្តេចតេជោបន្តថា ចំពោះមុខនេះរាជរដ្ឋាភិបាលក៏បានគិតគូរផ្តល់ប្រាក់ឧបត្ថម្ភជាជំហានៗសម្រាប់គ្រួសារក្រីក្រនៅពេលសម្រាលកូនដោយពួកគេនឹងទទួលបានការឧបត្ថម្ភជា ៣ ដំណាក់កាល។ ដំណាក់កាលទី ១នឹងឧបត្ថម្ភ ៤ ម៉ឺនរៀលក្នុងម្តងសរុប ៤ ដង។ ដំណាក់កាលទី២ក្នុងអំឡុងពេលសម្រាលកូន ឧបត្ថម្ភជាប្រាក់ចំនួន ២០ ម៉ឺនរៀលតែម្តងគត់។ ដំណាក់កាលទី ៣ នឹងឧបត្ថម្ភ៤ ម៉ឺនរៀលក្នុងម្តងសរុប១០ ដង ក្រោយពេលសម្រាលរហូតដល់កុមារមានឤយុ ២ ឆ្នាំ សរុបស្ត្រីឆ្លងទន្លេម្នាក់បានទទួលទឹកប្រាក់សរុប ៧៦ ម៉ឺនរៀល។ ការឧបត្ថម្ភនេះនឹងអនុវត្តចាប់ពីពាក់កណ្តាលឆ្នាំ ២០១៩ខាងមុខនេះតទៅ ។(កម្មវិធីនេះនៅឆ្នាំដំបូងនឹងត្រូវចំណាយថវិកាប្រមាណ៤,៩៥ លានដុល្លារហើយនិងកើនដល់ ៧,៧៥ លានដុល្លារនៅឆ្នាំទី ២ និងបន្តកើនឡើងរហូតដល់ ១០,៤៥ ដុល្លារឤមេរិក នៅឆ្នាំទី ៣) ។
បើយោងតាមសម្តេចតេជោ ចំណាយនេះវាអាចនឹងថយចុះមកវិញ នៅពេលដែលអត្រានៃភាពក្រីក្រត្រូវបានកាត់បន្ថយ។
សម្តេចតេជោនាយករដ្ឋមន្ត្រីបានមានប្រសាសន៍ថា រាជរដ្ឋាភិបាលបានដោះស្រាយរួចមកហើយចំពោះស្ត្រីមានផ្ទៃពោះនិងឆ្លងទន្លេ នៅក្នុងកងកម្លាំងប្រដាប់អាវុធ និង មន្ត្រីរាជការស៊ីវិលចំនួន ៨០ ម៉ឺន រៀល។ ចំណែកកម្មការិនីដែលមានផ្ទៃពោះនិងឆ្លងទន្លេ ទទួលបានកូនមួយ ៤០ ម៉ឺនរៀល កូន២ ចំនួន ៨០ ម៉ឺនរៀល និង កូនបី ចំនួន ១២០ ម៉ឺនរៀល។ ក៏ប៉ុន្តែសម្រាប់ការអនុវត្តចំពោះប្រជាជនទូទៅ គឺទាមទារឲ្យមានការយោគយល់នៅក្នុងសង្គមឲ្យបានច្បាស់ ។ បើយោងតាមសម្តេចមានជំរើសចំនួន ៣ ដែលត្រូវជ្រើសរើស ហើយសម្តេចបានជ្រើសរើសយកជំរើសទី៣ ។ ដើមឡើយសម្តេចចង់គ្របដណ្តប់លើមនុស្សទាំងអស់ប៉ុន្តែ បើធ្វើដូច្នេះអ្នកមានទ្រព្យសម្បត្តិច្រើនក៏ទទួលបាន ដូចអ្នក្រីក្រដែរ ដូចនេះយើងគួររកវិធីសាស្ត្រមួយដែលបែរមុខព្រួញទៅរកស្ត្រីក្រីក្រ។
សម្តេចតេជោបានលើកឡើងមកពន្យល់អំពីវិធីសាស្ត្រនីមួយៗ ដែលក្នុងនោះវិធីសាស្ត្រទី១. តម្រូវឲ្យបើកផ្តល់ជូនស្ត្រីទូទៅតែម្តងគឺម្នាក់ ២០ ម៉ឺនរៀលក្នុងម្នាក់ដែលការប៉ាន់ស្មានមានប្រមាណ ៣០ ម៉ឺននាក់ដែលគិតជាទឹកប្រាក់ប្រមាណ ១៥ លានដុល្លារក្នុង១ឆ្នាំ នឹងកើនឡើងទៀតពេលប្រជាជនមានការកើនឡើង។ ជំរើសទី២.គឺទៅតាមការគ្រោងទុកនៃក្របខ័ណ្ឌគោលនយោបាយជាតិគាំពារសង្គម(២០១៦- ២០២៥ ) បានកំណត់កម្មវិធីផ្តល់សាច់ប្រាក់ជាជំហានៗ ដើម្បីផ្គត់ផ្គង់អាហារូបត្ថម្ភក្នុងពេល ១០០០ ថ្ងៃដំបូងនៃជីវិតកុមារ កម្មវិធីនេះផ្តោតការយកចិត្តទុកដាក់ជាបឋម លើស្ត្រីមានផ្ទៃពោះនៃគ្រួសារក្រីក្រ ដែលប៉ាន់ស្មានថាមានចំនួន ៥៥.០០០ នាក់ក្នុង១ឆ្នាំ ។ ដោយផ្តល់ការឧបត្ថម្ភជាជំហានៗមានពីដំណាក់កាល ,ដំណាក់កាលទី១ការឧបត្ដម្ភ ៤ ម៉ឺនរៀលក្នុងមួយដង មាន៤ ដងក្នុងអំឡុងពេលមានផ្ទៃពោះ និង ដំណាក់កាលទី២. ផ្តល់ការឧបត្ថម្ភ ៤ ម៉ឺនរៀលក្នុងមួយដង មាន ១០ ដងក្រោយពេលសម្រាលកូន រហូតកុមារមានអាយុ ២ឆ្នាំ ។ (កម្មវិធីនេះនៅឆ្នាំដំបូងនឹងត្រូវចំណាយថវិកាប្រមាណ ២,២ លានដុល្លារនៅឆ្នាំដំបូង និង កើនឡើង ៤,៩ លានដុល្លារនៅឆ្នាំទី២ នឹងកើនដល់ ៧,៧ លានដុល្លារនៅឆ្នាំទី ៣) នេះជាជំរើសទី២ ដែលជួបការលំបាកដែលយើងពុំបានជ្រើសរើសទេ ។ ជំរើសទី៣ គឺគួបផ្សំរវាងជំរើសទី១ និង ទី២។
សម្តេចតេជោនាយករដ្ឋមន្ត្រីបានបន្តថា នេះជាកម្មវិធីដែលរាជរដ្ឋាភិបាលបានយកចិត្តទុកដាក់ទៅលើស្ត្រី និង កុមារ។ សម្តេចតេជោបានបន្តថា កម្មវិធីនេះគឺគ្របដណ្តប់លើស្ត្រីក្រីក្រតែប៉ុណ្ណោះ មិនគ្របដណ្តប់លើមនុស្ស ១៦ លាននាក់នោះទេ។ សម្តេចបានបន្តថា កម្មវិធីមួយនេះត្រូវដាក់ឲ្យមានការសិក្សាតាំង ការសម្ពោធដាក់ឲ្យអនុវត្តជាមួយគោលនយោបាយគាំពារសង្គមមកម្ល៉េះ។ សម្តេចតេជោបានបន្តថា ដោយសារបញ្ហានេះជាបញ្ហាថ្មីថ្មោងរបស់យើង ដូច្នេះទើបមានការព្យាករណ៍ទុករហូតដល់ពាក់កណ្តាល ឆ្នាំ ២០១៩ ទើបអាចដំណើរការបាន។
សម្តេចតេជោនាយករដ្ឋមន្ត្រីបានបន្តថា យើងបានយកចិត្តទុលដាក់ទៅលើអាហារូបត្ថម្ភ កាត់បន្ថយអត្រាស្លាប់របស់មាតា និង ទារក ដែលនេះគឺជាគោលដៅនៃនយោបាយថ្មីលើវិស័យសង្គមរបស់យើង ហើយសង្ឃឹមថាការប្រកាសថ្ងៃនេះគឺជាសមិទ្ធផលថ្មីមួយទៀតនៃគោលនយោបាយរបស់រាជរដ្ឋាភិបាលកម្ពុជាក្រោមការដឹកនាំដោយគណបក្សប្រជាជនកម្ពុជា៕
Source: Kampuchea Thmey Daily
0 Comments