ពានរង្វាន់លីគកំពូលប្រទេសម៉ាឡេស៊ី (Malaysia Super League) រដូវកាលឆ្នាំ២០១៨ បានបញ្ចប់កម្មវិធីប្រកួតសប្ដាហ៍ទី១៣ របស់ខ្លួននៅចុងសប្ដាហ៍ថ្មីៗនេះ ស្របពេលក្រុមដែលកីឡាកររបស់កម្ពុជា ១រូបកំពុងប្រកបអាជីពនៅទីនោះ Teregganu FA របស់ ធារី ចន្ថាប៊ីន បានរបូត៣ពិន្ទុ ហើយឈរនៅតំបន់ពាក់កណ្ដាលតារាងរួម។
សរុបលទ្ធផលប្រចាំសប្ដាហ៍ទី១៣ មាននៅថ្ងៃសុក្រ ទី១ ខែមិថុនា ក្រុម Kedah ចាញ់ក្រុម Melaka United ២ទល់០ ខណៈក្រុម Selangor ឈ្នះក្រុម Kelantan ៤ទល់០។ នៅថ្ងៃសៅរ៍ ទី២ខែមិថុនាវិញ ក្រុម Johor ឈ្នះក្រុម Perak ២ទល់០ ខណៈក្រុម Kuala Lumpur ឈ្នះក្រុម Teranggananu របស់ ធារី ចន្ថាប៊ីន ៣ទល់០ និងក្រុម PKNP ចាញ់ក្រុម Pahang FA២ទល់១។ នៅថ្ងៃអាទិត្យ ទី៣ ខែមិថុនា ក្រុម Negeri Sambilan ឈ្នះក្រុម PKNS ៣ទល់១។
លីគកំពូលម៉ាឡេស៊ី ឆ្លងកាត់១៣ប្រកួតមកនេះក្រុមTerengganu របស់ ធារី ចន្ថាប៊ីន នៅតែត្រូវការពិន្ទុបន្ថែមដើម្បីប្រជែងកំពូលតារាងជាមួយក្រុមខ្លាំងJorhor និងក្រុម Pahang FA ជាក្រុមចាស់របស់ ចាន់ វឌ្ឍនាកា ក្រុម Perak និងក្រុម PKNS ជាដើម។ ចំណែកក្រុម Negeri Sembilan អតីតក្រុមរបស់ ប្រាក់ មុន្នីឧត្តម ក៏ត្រូវការពិន្ទុដែរដើម្បីគេឲ្យផុតពីតំបន់ដែលត្រូវកាត់ចេញឲ្យទៅលេងពានរង្វាន់លីគលំដាប់ទី២ របស់ម៉ាឡេស៊ី។
ពានរង្វាន់លីគកំពូលម៉ាឡេស៊ី មានក្រុមសរុបចំនួន១២ក្រុម ដោយតម្រូវឲ្យក្រុមទាំងអស់ប៉ះគ្នាចំនួន២លើក (២ជុំ) ហើយក្រុមដែលមានពិន្ទុច្រើនជាងគេនៅចប់រដូវកាលនឹងឈ្នះជើងឯកនឹងទទួលកៅអីឡើងទៅលេងក្នុងពានរង្វាន់ AFC Champion League 2019 ផងដែរ។ តាមគ្រោងការប្រកួតនឹងបញ្ចប់នៅអំឡុងខែកញ្ញា ឆ្នាំ២០១៨ ខាងមុខ មុនក្រុមជម្រើសជាតិរបស់ប្រទេសនេះត្រៀមប្រកួតក្នុងពានរង្វាន់ AFF Suzuki Cup 2018។
សូមបញ្ជាក់ថា កម្ពុជា មានកីឡាករឆ្នើមៗចំនួន៤រូបចេញទៅប្រកបអាជីពនៅពានរង្វាន់លីគកំពូលប្រទេសម៉ាឡេស៊ី នៅដើមរដូវកាលឆ្នាំ២០១៨ នេះដោយក្នុងនោះមានកែវ សុខផេង លេងនៅក្លិប PKNP FC កីឡាករ ចាន់ វឌ្ឍនាកា Panhag FA និងកីឡាករ ធារី ចន្ថាប៊ីន ទៅកាន់ក្លិបTerengganu FC និងកីឡាករ ប្រាក់ មុន្នីឧត្តម លេងនៅក្លិបNegeri Sembilan។ ក្នុងចំណោមអ្នកទាំង៤មានតែកីឡាករ កែវ សុខផេង ប៉ុណ្ណោះ ដែលរកគ្រាប់បាល់ឲ្យក្រុមបានមុនគេ។ ប៉ុន្តែពេលនេះ កែវ សុខផេង ប្រាក់ មុន្នីឧត្តម និង ចាន់ វឌ្ឍនាកា ត្រូវបានក្លិបដកចេញពីបញ្ជីក្នុងក្រុម ដោយនៅសល់តែ ធារី ចន្ថាប៊ីន ម្នាក់ប៉ុណ្ណោះ។ លក្ខណៈពិសេសរបស់កីឡាករទាំង៤នេះគឺទទួលបានប្រាក់បៀវត្សខ្ទង់ពាន់រហូតដល់ខ្ទង់ម៉ឺនដុល្លារអាមេរិក ព្រមទាំងមានផ្ទះស្នាក់នៅមួយ ឡានជិះ១គ្រឿង និងមានប្រាក់រង្វាន់ផ្សេងៗទៀតផងដដែរ៕
Source: Kampuchea Thmey Daily
0 Comments