កណ្តាល ៖ បុរសជាសន្តិសុខក្រុមហ៊ុនម្នាក់ត្រូវកម្លាំងនគរបាលក្រុងតាខ្មៅធ្វើការឃាត់ខ្លួនពីបទប្រព្រឹត្តអំពើហិង្សាទៅលើប្រពន្ធដែលផ្តើមចេញការបង្ខំសុំរួមភេទដែលខ្លួនឯងស្រវឹង ខណៈប្រពន្ធមិនស្រួលខ្លួនមានរដូវ។
ហេតុការណ៍នេះ បានកើតឡើងនៅថ្ងៃទី០៣ ខែមិថុនា ឆ្នាំ២០១៨ វេលាម៉ោង២២ និង៣០នាទីយប់ នៅចំណុចផ្ទះជួលភូមិដើមគរ សង្កាត់ដើមមៀន ក្រុងតាខ្មៅខេត្តកណ្តាល។
លោកវរសេនីយ៍ ស កែវពិសិដ្ឋ អធិការនគរបាលក្រុងតាខ្មៅបានអោយដឹងថា ជនរងគ្រោះឈ្មោះសុខ ចាន់ អាយុ៣៦ឆ្នាំ មានទីលំនៅស្នាក់នៅភូមិដើមគរ សង្កាត់ដើមមៀន ក្រុងតាខ្មៅ ខេត្តកណ្តាល មុខរបរគ្រូទាយ។ ចំណែកឯជនល្មើសឈ្មោះស៊ីថា ពេជ្រ អាយុ៣២ឆ្នាំ មានទីលំនៅស្នាក់នៅភូមិដើមគរ សង្កាត់ដើមមៀន ក្រុងតាខ្មៅ ខេត្តកណ្តាល។ មុខរបរសន្តិសុខក្រុមហ៊ុនមិត្តហ្វូន(ឃាត់ខ្លួន)។
លោកអធិការបានបន្តទៀតថា នៅវេលាកើតហេតុខាងលើ ពេលជនរងគ្រោះជាប្រពន្ធកំពុងតែដេកនៅក្នុងបន្ទប់ជាមួយកូនតូច ពេលនោះស្រាប់តែជនល្មើសជាប្តីបានដើរចូលមកក្នុងសភាពស្រវឹងស្រា ហើយបានសុំប្រពន្ធរួមភេទជាមួយតែប្រពន្ធមិនព្រម ព្រោះមិនស្រួលខ្លួនអស់កម្លាំងធ្វើឲ្យជនល្មើសខឹងបានយកវែកឆាវាយត្រូវចំចិញ្ចើមខាងឆ្វេង បណ្តាលឲ្យរយះហូរឈាម។ ក្រោយមកជនល្មើសក៏បានរករឿងជាមួយជនរងគ្រោះម្តង ដោយមានការប្រតាយប្រតប់គ្នា ពេលនោះជនល្មើសក៏បានទាញកាំបិតប៉័ងតោកាប់បណ្តាលឲ្យត្រូវចំបាតដៃខាងឆ្វេងរបស់ជនរងគ្រោះរងរបួសរយះហូរឈាម ទើបសមត្ថកិច្ចចុះអន្តរាគមន៍ឃាត់ខ្លួនជនល្មើស រួមទាំងវត្ថុតាងបញ្ជូនមកកាន់អធិការដ្ឋាននគរបាលក្រុងតាខ្មៅដើម្បីចាត់ការតាមនីតិវិធី៕
Source: Kampuchea Thmey Daily
0 Comments