ភ្នំពេញ ៖ ការចតរថយន្តបញ្ច្រាសទិសមិនដាក់សញ្ញាសម្គាល់ចរាចរអោយបានត្រឹមត្រូវ ពិតជាបង្កគ្រោះថ្នាក់បំផុត ដោយកន្លងមកនេះមានមនុស្សមិនតិចនាក់ទេ ដែលបានរងរបួសនិងស្លាប់ ផ្តើមចេញពីអ្នកចតយានយន្តមិនដឹងឬមិនគោរពច្បាប់នេះ។
ជាក់ស្តែងបុរសម្នាក់ ជិះម៉ូតូ Scoopy បានបើកទៅបុករថយន្តកុងតឺន័រ ហុង ឡេងហួរ ដែលចតបញ្ច្រាសទិសទុកចោលលើផ្លូវ ដោយមិនដាក់សញ្ញាសម្គាល់ត្រឹមត្រូវ បណ្ដាលឲ្យរងរបួសដៃធ្ងន់ និងសន្លប់ស្ដូកស្ដឹង។
គ្រោះថ្នាក់ចរាចរណ៍នេះ កើតឡើងនៅវេលាម៉ោង១១និង៣០នាទីយប់ ថ្ងៃសុក្រ ៣រោច ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១ ខែមិថុនា ឆ្នាំ២០១៨នេះ តាមមហាវិថីកម្ពុជាក្រោម ស្ថិតក្នុងសង្កាត់ទឹកល្អក់១ ខណ្ឌទួលគោក រាជធានីភ្នំពេញ។
សាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញរថយន្តកុងតឺន័រមួយគ្រឿង ពាក់ស្លាកលេខ ភ្នំពេញ 3B-4879 ជារបស់ក្រុមហ៊ុន ហុង ឡេងហួរ បានមកឈប់ចតចោលដោយបញ្ច្រាសផ្លូវកម្ពុជាក្រោម ដោយមិនបានសុំផ្លូវ ឬដាក់សញ្ញាត្រឹមត្រូវឡើយ។ លុះនៅវេលាកើតហេតុខាងលើ ស្រាប់តែមានបុរសម្នាក់ ជិះម៉ូតូមួយគ្រឿងម៉ាក ហុងដា ស្កូពី ពណ៌ផ្កាឈូកលាយស ពាក់ស្លាកលេខ ភ្នំពេញ 1BV-1372 ទៅបុករថយន្តកុងតឺន័រនោះ ចំពីមុខពេញទំហឹង បណ្ដាលឲ្យរងរបួសដៃធ្ងន់ធ្ងរសន្លប់ស្ដូកស្ដឹងងតែម្ដង។ ឃើញដូច្នេះ តៃកុងរថយន្តក៏បានឡើងលើរថយន្ត រួចចុចភ្លើងសុំផ្លូវវិញ។
ក្រោយពេលកើតហេតុ ដោយមិនឃើញមានសមត្ថកិច្ចចុះទៅកន្លែងកើតហេតុនោះ ទើបបុរសរងគ្រោះសុំឲ្យភាគីខាងរថយន្តជួយចេញថ្លៃមើលរបួស និងសងថ្លៃខូចខាតម៉ូតូ។ តែតៃកុងរថយន្តប្រាប់ថា រង់ចាំខាងក្រុមហ៊ុនធានារ៉ាប់រង មកជួយសងតាមសភាពខូចខាត និងរបួសជាក់ស្ដែង៕
Source: Kampuchea Thmey Daily
0 Comments