កំពង់ចាម ៖ លោក គួច ចំរើន អភិបាល នៃគណៈអភិបាលខេត្តកំពង់ចាម និងលោក ខ្លូត ផន ប្រធានក្រុមប្រឹក្សាខេត្តកំពង់ចាម កាលពីព្រឹកថ្ងៃសុក្រទី ០១ មិថុនា ២០១៨នេះ បានអញ្ជើញជួបសំណេះសំណាលជាមួយ អ្នកបើកបររថយន្តដឹកកម្មករ ដើម្បីផ្សព្វផ្សាយអោយអ្នកបើកបរ ប្រុងប្រយ័ត្នខ្ពស់នៅពេលដឹកកម្មករ មកជួបសំណេះសំណាលជាមួយសម្តេចតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជានាថ្ងៃទី ៦ មិថុនា ខាងមុខនេះ។
មន្ត្រីរដ្ឋបាលខេត្តកំពង់ចាមបានអោយដឹងថា អ្នកបើកបររថយន្តដឹកកម្មករ ទាំងអស់មានចំនួន២២២នាក់ មកពីរោងចក្រចំនួនបី គឺរោងចក្រខាលីងតុន រោងចក្រប្រាយម៏ស៊ូ និងរោងចក្រស្កាយណាយ នឹងបានជួបសំណេះសំណាលជាមួយ សម្តេចតេជោហ៊ុន សែន។ ដោយហេតុនេះហើយ ទើបលោកអភិបាលនិងប្រធានក្រុមប្រឹក្សាខេត្តកំពង់ចាម ចុះមកជួបអ្នកបើកបររថយន្តដឹកកម្មករទាំងនេះ ក្នុងគោលដៅផ្សព្វផ្សាយធានារក្សា សណ្ដាប់ធ្នាប់ និង របៀបរៀបរយក្នុងការចតរថយន្ត រួមទាំង ធានានូវសុវត្ថិភាពកម្មករ-កម្មការិនី ក្នុងការដឹកជញ្ជូន សម្រាប់ត្រៀមកម្មវិធីទទួលជួបសំណេះសំណាលជាមួយ កម្មករ-កម្មការិនី នាស្រុកជើងព្រៃ ខេត្តកំពង់ចាម ក្រោមអធិបតីភាព ដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃរាជាណាចក្រកម្ពុជានាថ្ងៃទី ៦ មិថុនា ខាងមុខនេះ៕
Source: Kampuchea Thmey Daily
0 Comments