ពេជ្រ សីហា អ្នកប្រដាល់ជើងចាស់នៃក្លិបប្រកួតគុនខ្មែរ បានប្រកួតចាញ់ថៃក្នុងទឹកទី២ ខណៈដែល ចាន់ សាន់ អ្នកប្រដាល់ស្រករក្រោយនៃក្លិបនិរោធមានជ័យ បានផ្តួលថៃអោយសន្លប់ទឹកទី៣ នៅក្នុងការជួបប្រកួតគ្នា លើសង្វៀនបាយ័នស្ទឹងមានជ័យ កាលពីយប់ថ្ងៃសុក្រទី០១ ខែមិថុនា ឆ្នាំ២០១៨។
ពេជ្រ សីហា ត្រូវសន្លប់ក្រោមទម្ងន់ជើងទាត់របស់Khamlaipetch Phakthungchai ដែលគេទាត់មួយជើងឆ្វេងត្រូវចំក្បាលរបស់សីហា បណ្តាលឲ្យសីហាដួលដេកលើរេញលែងក្រោក ទោះអាជ្ញាកណ្ដាលរាប់ដល់ដប់ក៏ដោយ ។ ពួកគេទាំងពីរ បានជួបប្រកួតគ្នាក្នុងប្រភេទទម្ងន់៧០គីឡូក្រាម។
Khamlaipetch អ្នកប្រដាល់ថៃរូបនេះ មកប្រកួតនៅស្រុកខ្មែរ កម្រមានអ្នកយកឈ្នះបានណាស់ ។ គេធ្លាប់វាយឈ្នះរឿង សោភ័ណ្ឌពីរលើក ឈ្នះឡុង សុភីមួយលើក ឈ្នះឡុង សុវណ្ណឌឿនមួយលើក ឈ្នះផុន ផាន់ណាមួយលើកនិងមកលើមុនគេបានយកឈ្នះវង្ស ណយ ដោយពិន្ទុទៀត។ តែគេក៏ធ្លាប់ចាញ់មឿន សុខហ៊ុចមួយលើក ចាញ់ព្រំ សំណាង ពីរលើកផងដែរ។
ដូច្នេះហើយទើបមុនប្រកួត គេថា ពេជ្រ សីហាពិបាកសង្ឃឹមឈ្នះ Khamlaipetch ណាស់ ។ យ៉ាងណា ពេជ្រ សីហា ចាញ់ Khamlaipetch មែន ហើយចាញ់សន្លប់ថែមទៀត ។ សីហា គេចាញ់ពីរប្រកួតជាប់ៗគ្នា ដែលមុននេះគេវាយចាញ់អ្នកប្រដាល់ថៃ Watcharalek ក្នុងទឹកទី២ ដែរ។
ចំពោះអ្នកប្រដាល់ជើងខ្លាំងស្រករក្រោយ ចាន់ សាន់ ក្លិបនិរោធមានជ័យ គេវាយបានយ៉ាងល្អ ដោយអាចផ្តួល អ្នកប្រដាល់ថៃPetchshunthorn Singhamarsnussak អោយសន្លប់ក្នុងទឹកទី៣ ។ ពីរនាក់នេះ ប្រកួតគ្នាក្នុងទម្ងន់៥៤គីឡូក្រាម។
Petchshunthorn គេចិត្តតូចដែរទេ ព្រោះពីរទឹកដំបូងគេមានប្រៀបឈ្នះលើចាន់ សាន់ទៅហើយ ដោយសារគេខ្ពស់ទាត់ និងអុកជង្គង់ត្រូវចាន់សាន់ច្រើនគួរសមដែរ ។ប៉ុន្តែចាន់ សាន់ ដែលមានចិត្តប្រដាល់ធំ ហើយព្យាយាមវាយសន្ធាប់ដោយកណ្តាប់ដៃ កែង និងជង្គង់ត្រូវច្រើនពេកនោះ ធ្វើឲ្យគេ(Petchshunthorn)គាំង ដែលជាឪកាសហុចអោយចាន់ សាន់ រឹតតែសម្រុកចូលអោយវាយកែង និងជង្គង់ ចូលពោះទឹក រហូតទាល់តែដួលស្រុតលើរេញ លែងក្រោកតែម្តង។
ចាន់ សាន់ គេចាញ់កម្ពស់ Petchshunthorn ចង់ជិតមួយតឹកឯណោះ គឺ១,៦៣ម៉ែត្រ ទល់នឹង១,៧០ម៉ែត្រ តែដោយសារគេមានចិត្តធំមិនព្រមចុះចាញ់ ផ្ទុយទៅវិញគេរឹតតែដើរចូលវាយសម្រុករហូតទាល់តែ Petchshunthorn ដួលសន្លប់។
ចាន់ សាន់ គេមានកំនត់ត្រាប្រកួតចំនួន៦៦លើក ឈ្នះ៤៦លើក ចាញ់តែ ១៨ លើក និងស្មើ០២លើក។ចំណែក Petchshunthorn វិញ គេមានកំនត់ត្រាប្រកួតចំនួន៦៧លើក ឈ្នះ៦១ លើក ចាញ់តែ០៤លើក និងស្មើ០២លើក។
ចំពោះការប្រកួតរវាងអ្នកប្រដាល់រួមជាតិវិញ ហូ សុភា អ្នកប្រដាល់ក្លិបឃ្លាំងមឿងកីឡាខេត្តពោធិសាត់ បានប្រកួតឈ្នះ អេ សារ័ត្ន អ្នកប្រដាល់ក្លិបអេភូថងកីឡាដោយពិន្ទុ បន្ទាប់ពីប្រកួតគ្នា៥ទឹកពេញនោះ ។
ហូ សុភា គេមានស្នៀតប្រដាល់ល្អ ដោយវាយអេ សារ័ត្ន អោយបែកឈាមលើភ្នែកខាងស្តាំក្នុងទឹកទី៣ ។ពួកគេទាំងពីរ ប្រកួតគ្នាក្នុងទម្ងន់៥៤ គីឡូក្រាម ។
អ្នកប្រដាល់ ឡេង ម៉ៅ ក្លិបម៉ៃទីក្រាំងយ៉ូវ ប្រកួតចាញ់អ្នកប្រដាល់សំ ភក្តី ក្លិបរ៉ាហាប់ស្វាយប៉ាក ដោយពិន្ទុ បន្ទាប់ពីវាយគ្នាប្រាំទឹកពេញនោះ ។ពួកគេទាំងពីរ ប្រកួតគ្នាក្នុងទម្ងន់៦៣,៥០០គីឡូក្រាម៕
Source: Kampuchea Thmey Daily
0 Comments