ត្បូងឃ្មុំ ៖ លោក វេង សាខុន រដ្ឋមន្ត្រីកសិកម្ម រុក្ខាប្រមាញ់ និងនេសាទ ជាប្រធានក្រុម ការងារថ្នាក់កណ្តាលចុះជួយស្រុកតំបែរ និងស្រុកកំពង់សៀម នារសៀលថ្ងៃសុក្រ ០៣រោច ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០១ ខែមិថុនា គ.ស ២០១៨ បានអញ្ជើញចូលរួម សំណេះសំណាលជាមួយ មន្ត្រីរាជការ មន្ត្រីចូលនិវត្តន៍ នៃមន្ទីរកសិកម្ម រុក្ខាប្រមាញ់ និងនេសាទ ភ្នាក់ងារសុខភាពសត្វភូមិ សមាជិកសហគមន៍កសិកម្ម និងសហគមន៍ នេសាទទូទាំងខេត្តត្បូងឃុំប្រមាណ ៥០០នាក់ នៅសាលប្រជុំរដ្ឋបាលសាលាខេត្តត្បូងឃ្មុំ។
លោកហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និង នេសាទ បាន រាយការណ៍ ពីស្ថានភាពជារួមនៃការងារបង្កបង្កើនផល សកម្មភាព សំខាន់ៗរបស់សហគមន៍កសិកម្ម សហគមន៍នេសាទ ស្ថានភាព ជីវភាពរបស់បងប្អូននិវត្តន៍ជន ពិសេសភ្នាក់ងារ សុខភាពសត្វភូមិមានចំនួន ៣១៨នាក់ ដែលបាន និងកំពុងបំពេញការងារជាភ្នាក់ងារព្យាបាលសត្វ ការពារជំងឺឆ្លងសត្វ និងជាអ្នកផ្សព្វផ្សាយកសិកម្មដល់ប្រជាកសិករ។ ទោះជាយ៉ាងនេះក្តី សមត្ថភាព របស់ពួកគាត់នៅមានកម្រិត រួមទាំងខ្វះខាត មធ្យោបាយ សម្ភារៈ និងថវិកាក្នុងការផ្តល់សេវា សុខភាពសត្វជូនដល់កសិករឲ្យមានប្រសិទ្ធភាពនិងទាន់ពេលវេលា។ ដូច្នេះ ទាមទារធ្វើការ បណ្តុះបណ្តាល បច្ចេកទេសថ្មីៗបន្ថែមទៀតដើម្បីឆ្លើយតបទៅនិងតម្រូវការដ៏ចាំបាច់របស់កសិករ។
ទាក់ទងសុខភាពសត្វភូមិ លោកសេន សុវណ្ណ អគ្គនាយកនៃអគ្គនាយកដ្ឋានផលិតកម្មសត្វនិងសុខភាពសត្វបានជម្រាបជូនអង្គពិធីថា យោងលើការចាំបាច់ក្រសួងកសិកម្ម រុក្ខាប្រមាញ់និង នេសាទ បានទទួលការអនុញ្ញាតពីរាជរដ្ឋាភិបាលជ្រើសរើសកសិករគំរូដែលមានបទពិសោធន៍ក្នុង ការព្យាបាល និងការពារជំងឺសត្វឲ្យទទួលបានជាភ្នាក់ងារសុខភាពសត្វភូមិនៅឆ្នាំ២០០១។ គោលបំណងដ៏សំខាន់នៃការបង្កើតភ្នាក់ងារនេះ គឺដើម្បីជួយព្យាបាលសត្វ ការពារជំងឺ សត្វ អប់រំ ណែនាំបច្ចេកទេសបឋមពីការចិញ្ចឹម ព្យាបាល និងការពារជំងឺឆ្លងសត្វ។ នាពេលអនាគត អង្គការសុខភាពសត្វពិភពលោកសន្យាថា នឹងជួយបណ្តុះបណ្តាលភ្នាក់ងារសុខភាពភូមិនេះឲ្យក្លាយជាភ្នាក់ងារត្រួតពិនិត្យអនាម័យសត្វ និងគុណភាពសាច់ ដើម្បីបង្កើនជំនឿទុកចិត្តដល់អ្នក បរិភោគ ធានាបាននូវសុខភាពសាធារណៈ និងធ្វើការប្រកួតប្រជែងទីផ្សារ។
លោកប៉ែន កុសល អភិបាលរងខេត្តបានអបអរសាទរជូន ចំពោះមន្ត្រី និងភ្នាក់ងារសុខភាព សុខភាពសត្វភូមិដែលជាជនបង្គោល និងនៅជួរមុខក្នុងការផ្សព្វផ្សាយបច្ចេកទេសកសិកម្ម ដែលវិស័យនេះទាមទារការអភិវឌ្ឍឲ្យមានការ រីកចម្រើនថែមទៀត ដើម្បីធានាបាននូវសន្តិសុខ ស្បៀង បង្កើនប្រាក់ចំណូល និងកែលម្អកម្រិតជីវភាពជាបណ្តើរៗ ស្របតាមនិន្នាការនៃការរីកចម្រើនលើវិស័យសេដ្ឋកិច្ចជាតិ។ ដូច្នេះ លោកសំណូមពរឲ្យក្រសួងជួយសហការ ធ្វើការបណ្តុះបណ្តាលបច្ចេកវិទ្យាថ្មីបន្ថែមទៀត ដើម្បីជាប្រយោជន៍ដល់ខ្លួនគាត់ផង និងដល់សង្គមជាតិផង។
មានប្រសាសន៍សំណេះសំណាលក្នុងពេលនេះ លោក រដ្ឋមន្ត្រីបានកោតសរសើរ និងវាយតម្លៃខ្ពស់ជូនដល់ភ្នាក់ងារ សុខភាពសត្វភូមិ សហគមន៍កសិកម្ម សហគមន៍នេសាទ មន្ត្រីរាជការ និងនិវត្តន៍ជន ដែលកន្លងមកបានលះបង់គ្រប់បែបយ៉ាង ក្នុងការចូលរួមអភិវឌ្ឍវិស័យកសិកម្មឲ្យមានការ រីក ចម្រើនគួរជាទីមោទនៈ។ ជាការពិតវិស័យកសិកម្ម បាននិងកំពុងប្រឈមបញ្ហាជាច្រើនដែលទាមទារ ឲ្យយើងគ្រប់គ្នាខិតខំទ្វេឡើងថែមទៀតដើម្បីសិក្សាស្រាវជ្រាវ រិះរកមធ្យោបាយ និងដំណោះស្រាយសមស្របទៅតាម និន្នាការនៃការរីកចម្រើនផ្នែកបច្ចេកវិទ្យាកសិកម្ម សេដ្ឋកិច្ចជាតិ ទីផ្សារកសិផលទាំងក្នុងនិងក្រៅប្រទេស និងជាពិសេសការធ្លាក់ចុះកម្លាំងពលកម្ម។
នេះជាពេលវេលាសមស្របសម្រាប់ពង្រីករកទីផ្សារកសិផល របស់ប្រជាកសិករ ដែលក្នុងនេះត្រូវជំរុញនិងលើកទឹកចិត្តដល់អ្នកវិនិយោគ ទាំងក្នុងនិងក្រៅប្រទេស ក្នុងការកែច្នៃ និងនាំចេញទៅតាមស្តង់ដារ គុណភាព និងសុវត្ថិភាពម្ហូបអាហារ ទៅតាមតម្រូវការទីផ្សារក្នុងតំបន់ និងអន្តរជាតិ ក្នុងនោះក៏មានផលិតផលសត្វផងដែរ។ ស្ថិតក្នុងបរិការណ៍នេះ រាជរដ្ឋាភិបាលបាននិងកំពុងខិតខំកសាងហេដ្ឋារចនាសម្ព័ន្ធសំខាន់ៗដូចជាផ្លូវ ស្ពាន ព្រលានយន្តហោះ និងកំពង់ផែទឹកជ្រៅ។ល។ ដើម្បីជាការទាក់ទាញដល់វិនិយោគិន និងបង្កលក្ខណៈ ងាយស្រួលក្នុងការនាំចេញ ផលិតផលកសិកម្មនាពេលអនាគត។ លោកសូមឲ្យអគ្គនាយកដ្ឋានផលិតកម្មសត្វ និងសុខភាពសត្វជួយជំរុញ និងគាំទ្រផ្តល់ចំណេះដឹងបន្ថែម ពន្លឿនការផ្តល់ព័ត៌មាន និងសេវាកម្មឲ្យបានទាន់ពេលវេលា និងមាន ប្រសិទ្ធភាពដល់ភ្នាក់ងារសុខភាពភូមិ ដោយត្រូវខិតខំយកចិត្តទុកដាក់បន្ថែមទៀតនូវរាល់បញ្ហាសុខភាពសត្វ របស់កសិករឲ្យបានល្អ ព្រោះសត្វគឺជាប្រភពចំណូលមិនចេះរីងស្ងួតរបស់ពួកគាត់។ ក្រៅពីការងារបច្ចេកទេស លោករដ្ឋមន្ត្រីសុំឲ្យអគ្គនាយកដ្ឋានជួយធ្វើការផ្សព្វផ្សាយអំពីច្បាប់ស្តីពីផលិតកម្មសត្វ និងសុខភាពសត្វដល់ភ្នាក់ងារ សុខភាពសត្វភូមិឲ្យបានទូលំទូលាយ ដើម្បីជាប្រយោជន៍ក្នុងការបង្កើនការគ្រប់គ្រងចលនា សត្វ ជំងឺឆ្លងសត្វ ការនាំចូលសត្វខុសច្បាប់ ការគ្រប់គ្រងគុណភាពសាច់ឆ្លើយតបតាមតម្រូវការរបស់ អ្នកបរិភោគ។
ក្នុងឱកាសនេះ លោកបានជួយឧបត្ថម្ភដល់សមជិកសមាជិកា ដែលបានអញ្ជើញមកពី សហគមន៍កសិកម្ម សហគមន៍នេសាទ ភ្នាក់ងារសុខភាពសត្វភូមិ និងមន្ត្រីរាជការចូលនិវត្តន៍ ម្នាក់ៗ៤ម៉ឺនរៀល និងដោយឡែកសម្រាប់ភ្នាក់ងារសត្វភូមិ ម្នាក់ៗទទួលបានសម្ភារៈបសុពេទ្យ១ កញ្ចប់ថែមទៀត៕
Source: Kampuchea Thmey Daily
0 Comments