ត្បូងឃ្មុំ ៖ នៅវេលាម៉ោង៨និង១៥នាទីព្រឹក ថ្ងៃទី០២ ខែមិថុនា ឆ្នាំ២០១៨នេះ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានអញ្ជើញសម្ពោធដាក់ឲ្យដំណើរការជាផ្លូវការអគារទីស្នាក់ការគណបក្សប្រជាជនកម្ពុជានៅក្នុងស្រុកត្បូងឃ្មុំ ខេត្តត្បូងឃ្មុំ។
អគារទីស្នាក់ការគណបក្សប្រជាជនកម្ពុជាស្រុកត្បូងឃ្មុំនេះ ជាអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដឹកនាំកសាងដោយ លោក ជា សុផារ៉ា សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាអនុប្រធានទី១ ចុះជួយខេត្តត្បូងឃ្មុំ និងជាប្រធានក្រុមការងារចុះជួយស្រុកត្បូងឃ្មុំ។
អគារទីស្នាក់ការគណបក្សប្រជាជនកម្ពុជាស្រុកត្បូងឃ្មុំនេះ មានបណ្តោយ ៨០ម៉ែត្រ គុណនឹង ៥៤ម៉ែត្រ មានកម្ពស់២ជាន់។ សំណង់ធ្វើពីបេតុង ដែក ឥដ្ឋ និងដំបូលប្រក់ក្បឿងស្រកាលេញ និងស័ង្កសី ស្ថិតនៅលើផ្ទៃដីសរុប ១៥,២០២ម៉ែត្រការ៉េ។
អគារទីស្នាក់ការគណបក្សប្រជាជនមួយនេះ ជាទីស្នាក់ការធំជាងគេ ដែលមានសាលប្រជុំអាចដាក់មនុស្សបានជាង ២៥០០នាក់។ មានរចនាប័ទ្មស្ថាបត្យកម្មខ្មែរល្អសមស្រប និងមានការតុបតែងលម្អផ្នែកខាងក្នុង និងខាងក្រៅប្រកបដោយសោភ័ណភាព និងគុណភាពល្អប្រណិត ដើម្បីលើកស្ទួយអត្តសញ្ញាណជាតិ។
គម្រោងសាងសង់អគារនេះ បានគោរពតាមបទដ្ឋានបច្ចេកទេសសំណង់កម្រិតខ្ពស់ ទាំងគុណភាព សុវត្ថិភាព ដោយរៀបចំប្រព័ន្ធពន្លត់អគ្គិភ័យ។ នៅក្នុងបរិវេណផ្នែកខាងមុខអគារមានសួនច្បារបង្ហាញពីក្តីស្រឡាញ់ចំពោះកម្ពុជា (I lOVE CAMBODIA) សម្រាប់លម្អអគារ។ បរិវេណខាងមុខនេះ អាចចតរថយន្តបានជាង ១៥០គ្រឿង, របង និង ក្លោងទ្វារធំទូលាយ សសរក្លោងពីរ កម្ពស់៩ម៉ែត្រ លម្អដោយម្កុដទេវតា និងមានក្បាច់រចនាបែបស្ថាបត្យកម្មខ្មែរល្អប្រណិត៕
Source: Kampuchea Thmey Daily
0 Comments