ឈឿន ឆៃដែន អ្នកប្រដាល់ក្លិបនិរោធមានជ័យ និង កីឡាការិនី វី ស្រីខួច អ្នកប្រដាល់ក្លិបនាគមានជ័យ នឹងត្រូវជួបប្រកួតជាមួយអ្នកប្រដាល់ថៃ នៅលើសង្វៀនបាយ័នស្ទឹងមានជ័យ នាយប់ថ្ងៃអាទិត្យ ទី០៣ ខែមិថុនា ឆ្នាំ២០១៨នេះ។
ឈឿន ឆៃដែន គេនឹងត្រូវជួបប្រកួតជាមួយអ្នកប្រដាល់ថៃចំណូលថ្មីRithiara Klamu engpetch ។ ពួកគេទាំងពីរ នឹងជួបប្រកួតគ្នាក្នុងប្រភេទទម្ងន់៦០គីឡូក្រាម ។
Rithiara គេជាអ្នកប្រដាល់ថៃចំណូលថ្មី មិនធ្លាប់មកប្រកួតនៅកម្ពុជានោះទេ ។អ្នក ប្រដាល់ថៃរូបនេះ ខ្លាំងគួរសមដែរ ។ នេះបើតាមអ្នកដឹកនាំកីឡាករថៃមកប្រកួតអោយដឹង ។ ទោះជាយ៉ាងណា Rithiaraជួបជាមួយឈឿន ឆៃដែន លើកនេះ ក៏មិនជាធានាប៉ុន្មានដែរ ព្រោះឆៃដែន គេបានត្រៀមខ្លួនយ៉ាងល្អ សម្រាប់ការប្រកួតនេះ ។ យ៉ាងណា ឆៃដែនលើកនេះ អាចថាគេមានការប្រុងប្រយ័ត្នជាងមុន ដែលធ្វើអោយ Rithiaraពិបាកសង្ឃឹមឈ្នះណាស់។
Rithiaraមានកំនត់ត្រាប្រកួតចំនួន ៦៧លើក ឈ្នះ៥៤លើក ចាញ់១២លើកស្មើ០១លើក ។ តែបើធៀបជាមួយប្រវត្តិប្រកួតរបស់ឆៃដែន គឺតិចជាងច្រើនគួរសមដែរ ។ Rithiara គូរបស់ឈឿន ឆៃដែននេះ គេជាជើងខ្លាំងនៅស្រុកថៃក្នុងប្រភេទទម្ងន់៦០គីឡូក្រាម ។នេះបើតាមការអោយដឹងពីអ្នកដឹកនាំកីឡាករថៃមកប្រកួត ។ ប៉ុន្តែយ៉ាងណា Rithiaraប្រហែលជាពុំអាចជាអ្នកខ្លាំងនៅស្រុកខ្មែរនោះឡើយ សម្រាប់ការជួបប្រកួតជាមួយឈឿន ឆៃដែននោះ ព្រោះឆៃដែន គេដឹងនិងស្គាល់ពីសមត្ថភាពនិងកលល្បិចរបស់អ្នកប្រដាល់ថៃច្រើននាក់មកហើយ ក្នុងការជួបប្រកួតកន្លងមក។
ឆៃដែន មានប្រវត្តិប្រកួតប្រមាណ១០៤លើក គេវាយឈ្នះ៧៣លើក ចាញ់២៦លើក និងស្មើ០៥លើក ហើយធ្លាប់ផ្តួលដៃគូអោយសន្លប់ចំនួន៣០លើក។នេះជាលើកទី៣៦ របស់ឈឿន ឆៃដែនហើយ ដែលជួបប្រកួតជាមួយថៃនោះ ដែល៣៥លើកកន្លងមក គេវាយឈ្នះបាន២៣លើក ចាញ់១១លើក និងស្មើ១លើក។ ឆៃដែន គេជាអតីតម្ចាស់ខ្សែក្រវាត់ជើងឯក របស់អាជ្ញាធរជាតិប្រយុទ្ធប្រឆាំងគ្រឿងញៀន។ គេមានកណ្តាប់ដៃខ្លាំងនិងទម្ងន់ជើងទាត់ធ្ងន់ ។ ប៉ុន្តែយ៉ាងណា ឈឿន ឆៃដែន ឡើងប្រកួតលើកនេះ ប្រហែលជាមិនដូចជួបអ្នកប្រដាល់ថៃមកមុននោះទេ ព្រោះអ្នកប្រដាល់ Rithiaraដែលមកលើកនេះ គេខ្លាំងគួរសមដែរ។
ឈឿន ឆៃដែន ប្រកួតចុងក្រោយនេះ បានចាញ់អ្នកប្រដាល់ថៃ Peithang Sor.. ក្នុងទឹកទី៣ កាលពីថ្ងៃទី១២ឧសភា២០១៨។ ចាំមើល រវាងឈឿន ឆៃដែន និង Rithiara តើនរណាជាអ្នកឈ្នះក្នុងការជួបគ្នាលើកដំបូងនេះ ?។
សម្រាប់ការប្រកួតគូអន្តរជាតិនារីវិញ វី ស្រីខួច កីឡាការិនីប្រដាល់ក្លិបនាគរាជមានជ័យ នឹងទទួលស្វាគមន៍កីឡាការិនីថៃ Phlayfar Sor.Nithya ។ កីឡាការិនីថៃ Phlayfar មិន ធ្លាប់មកប្រកួតនៅស្រុកខ្មែរទេកន្លងមក។ ដូច្នេះ មិនដឹងថាអ្នកប្រដាល់ស្រីថៃម្នាក់នេះ ខ្លាំ ងឬអន់ខ្សោយ នោះទេ? ។
តាមពិត វី ស្រីខួច ត្រូវបានគេកត់សម្គាល់ថា រឹងមាំនិងខ្លាំង និងធ្លាប់ផ្តួលកីឡាការិនីថៃច្រើននាក់មកហើយ។ ស្រខួច មានកម្លាំងស៊ុហ្វរឹងមាំ គួបផ្សំនឹងមានបទពិសោធន៍ច្រើនក្នុងការប្រកួតផងនោះ វី ស្រីខួចប្រហែលជាអាចយកឈ្នះកីឡាការិនីថៃ Phlayfar បាន។ តែយ៉ាងណា ចាំមើលជាក់ស្តែង តើវី ស្រីខួច អាចយកឈ្នះកីឡាការិនីថៃ Phlayfar បានឬអត់ ?។
ចំពោះការប្រកួតគូពិសេសខ្មែរនិងខ្មែរវិញ ស៊ូ វណ្ណះ អ្នកប្រដាល់ក្លិបនាគរាជមានជ័យ ត្រូវគេផ្គូឲ្យជួបជាមួយសុខ សុវណ្ណ អ្នកប្រដាល់ក្លិបកងពលធំអន្តរាគមន៍លេខ២ ។ ពួកគេទាំងពីរ ប្រកួតគ្នាក្នុងទម្ងន់៦៣,៥០០ គីឡូក្រាម។ ចំណែកស៊ុន ចន្នី អ្នកប្រដាល់ក្លិបពន្លឺវិបុលមានរិទ្ធ ត្រូវជួបប្រកួតជាមួយ បាង កានិត អ្នកប្រដាល់ក្លិបអាណាចក្រគុនខ្មែរ ក្នុងប្រភេទទម្ងន់៥៧គីឡូក្រាម៕
Source: Kampuchea Thmey Daily
0 Comments