ភ្នំពេញ ៖ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នារសៀលថ្ងៃព្រហស្បតិ៍០២រោច ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៣១ ខែឧសភា គ.ស ២០១៨ នៅទីស្តីការក្រសួង បានជួបសំណេះសំណាល និងណែនាំ និងផ្តាំផ្ញើ ដល់ ក្មួយៗនិស្សិតដែលទទួលបានអាហារូបករណ៍ទៅបន្តការសិក្សាថ្នាក់អនុបណ្ឌិតនៅប្រទេសណូវែលហ្សេឡង់ចំនួន០៩ នាក់ (ស្ត្រី០៥)។
មានមតិណែនាំ និងផ្តាំផ្ញើនាឱកាសនេះ លោក រដ្ឋមន្ត្រីបានសម្តែងនូវទឹកចិត្តស្វាគមន៍ និងអបអរសាទរចំពោះក្មួយៗដែលទទួលបានជ័យលាភីដ៏ល្អប្រពៃនេះ។ សូមធ្វើការកោតសរសើរជូនចំពោះមាតាបិតា អាណាព្យាបាល លោកគ្រូ អ្នកគ្រូ សាស្ត្រាចារ្យដែលបានខិតខំយកចិត្តទុកដាក់អស់ពីកម្លាំងកាយ ចិត្តដោយឈរលើស្មារតីទទួលខុសត្រូវខ្ពស់ធ្វើការប្រៀនប្រដៅ អប់រំ ណែនាំដល់ក្មួយៗគ្រប់ៗគ្នារហូតក្លាយខ្លួនជាកូនល្អ សិស្សល្អ និងពលរដ្ឋល្អ ពិសេសរហូតដល់ទទួលបានអាហារូបករណ៍ទៅបន្តការសិក្សានៅក្រៅប្រទេស។
លោករដ្ឋមន្ត្រី បន្ថែមថា នេះជាឱកាសដ៏ប្រសើររបស់ក្មួយៗដើម្បីស្វែងរកចំណេះដឹង និងបទពិសោធន៍បន្ថែមទៀតទាំងជំនាញផ្ទាល់ និងក្រៅពីជំនាញដែលក្មួយមិនទាន់មាន មិនទាន់បានជួប មិនទាន់បានរៀនកន្លងមក ហើយដែលចំណេះដឹងនិងបទពិសោធន៍ទាំងអស់នោះនឹងជួយបង្កើនសមត្ថភាពរបស់ក្មួយៗកាន់តែល្អប្រសើរថែមទៀតនាពេលអនាគត។ ក្រោយពេលបញ្ចប់ការសិក្សារបស់ក្មួយៗនឹងនាំមកនូវចំណេះដឹង បទពិសោធន៍មកជួយកសាង និងអភិវឌ្ឍប្រទេសជាតិ ដែលបាននិងកំពុងត្រូវការជាចាំបាច់នូវធនធានមនុស្សមានសក្តានុពលទាំងកម្លាំងកាយ កម្លាំងចិត្ត និងប្រាជ្ញាដូចក្មួយៗគ្រប់ៗរូប ពិសេសសមស្របទៅតាមគោលនយោបាយអភិវឌ្ឍធនធានមនុស្សគ្រប់វិស័យរបស់រាជរដ្ឋាភិបាល និងចូលរួមអភិវឌ្ឍប្រទេសជាតិទាំងអស់គ្នាដើម្បីប្រែក្លាយប្រទេសយើងឲ្យទៅជាប្រទេសមានចំណូលមធ្យមកម្រិតខ្ពស់នាឆ្នាំ២០៣០។
ឆ្លៀតយកឱកាសនេះ លោក រដ្ឋមន្ត្រីបានផ្តល់មេរៀន និងបទពិសោធន៍ល្អៗរបស់លោក ក្នុងពេលកំពុងសិក្សា ពេលបំពេញការងារ ជាលំដាប់លំដោយរហូតមកទល់ពេលបច្ចុប្បន្ន។ គ្រប់កាលៈទេសៈទាំងអស់នៃជិវិតក្នុងការសិក្សា ការបំពេញការងារនិងភារកិច្ចរបស់លោក រដ្ឋមន្ត្រីត្រូវបានឆ្លងកាត់ឧបសគ្គជាច្រើនដែលមិនអាចគណនាបាន ហើយសូមឲ្យក្មួយៗត្រងត្រាប់យកនូវបទពិសោធន៍ដ៏មានតម្លៃទាំងអស់នេះទៅធ្វើការកែច្នៃដើម្បីយកទៅអនុវត្ត ឬប្រើប្រាស់ឲ្យបានសមស្រប ទុកជាសម្បត្តិ ឬគុណប្រយោជន៍សម្រាប់ជាបទពិសោធន៍នៃជីវិតនាពេលអនាគត។
ជាថ្មីម្តងទៀតសូមសម្តែងនូវទឹកចិត្តអបអរសាទរ និងស្វាគមន៍ដល់ក្មួយៗគ្រប់ៗរូបដែលទទួលបានអាហារូបករណ៍ពីរដ្ឋាភិបាលណូវែលហ្សេឡង់នាពេលនេះ សូមក្មួយៗយកឱកាសដ៏មានតម្លៃនេះទៅអភិវឌ្ឍខ្លួនឲ្យបានល្អប្រសើរ និងត្រូវនាំយកមកវិញនូវចំណេះដឹង មេរៀន និងបទពិសោធន៍ល្អៗដែលបានក្រេបជញ្ជក់ពីមហាវិទ្យាល័យ មកជួយអភិវឌ្ឍប្រទេសជាតិ ពិសេស ក្មួយៗដែលនឹងទៅបន្តការសិក្សាផ្នែកកសិកម្ម មកជួយអភិវឌ្ឍវិស័យនេះតាមគ្រប់វិធីសាស្ត្រ និងមធ្យោបាយធ្វើយ៉ាងណាឲ្យមានការរីកចម្រើនថែមទៀត ក្នុងខណៈដែលវិស័យនេះកំពុងត្រូវការធនធានមនុស្សមានសមត្ថភាពជាចាំបាច់មកអនុវត្ត ឬប្រើប្រាស់ បច្ចេកវិទ្យាទំនើបៗក្នុងគោលបំណងបង្កើនបរិមាណ និងគុណភាព និងជំនួសឲ្យកម្លាំងពលកម្មក្នុងវិស័យនេះដែលមានការធ្លាក់ចុះជាបន្តបន្ទាប់។ ចុងក្រោយនៃជំនួបនេះ លោកបានជូនពរឲ្យក្មួយៗទទួលបាននូវសុខភាពល្អបវរប្រសើរ ជោគជ័យក្នុងការសិក្សារៀនសូត្រ និងទទួលបានជ័យលាភីល្អប្រសើរ៕
Source: Kampuchea Thmey Daily
0 Comments