កំពង់ឆ្នាំង ៖ ដើម្បីអោយទទួលបានទិន្នផលខ្ពស់នៅក្នុងរដូវធ្វើស្រែវស្សាឆ្នាំនេះ អ្នកស្រុកភូមិទំនប់ ឃុំត្រងិល ស្រុកកំពង់លែង នៅព្រឹកថ្ងៃទី០១ ខែមិថុនា ឆ្នាំ២០១៨ បាននាំគ្នារៀបចំដង្វាយសែនជូនព្រះធរណី ព្រះគង្គា ព្រះភិរុណ ព្រះពាយ ព្រះអាទិត្យ ដើម្បីសុំសេចក្តីសុខក្នុងពេលធ្វើស្រែចំការ។
លោក សុខ រិន ប្រធានការិយាល័យស្រុកកំពង់លែង បាននិយាយអោយដឹងថា ៖ ការសែនព្រេនខាងលើនេះ គឺជាទំនៀមទម្លាប់ប្រពៃណីរបស់ដូនតាខ្មែរតាំងពីបុរាណកាលមក ដែលកសិករខ្មែរយើងមួយចំនួនបានបន្តរក្សាប្រពៃណីនេះរហូតមកដល់ពេលនេះ។
ដោយឡែក ការរៀបចំសែនដង្វាយខាងលើនេះ គឺដើម្បីដឹងគុណដល់ព្រះធរណី ដែលបានផ្តល់ដីដែលមានជីជាតិសម្រាប់ធ្វើស្រែចម្ការចិញ្ចឹមជីវិតមនុស្សសត្វ ដឹងគុណព្រះភិរុណ ព្រះគង្គា ដែលបានផ្តល់ទឹកដល់មនុស្សសត្វ ដឹងគុណដល់ព្រះពាយធ្វើអោយជីវិតមនុស្សរស់នៅដោយសុខសាន្ត និងដឹងគុណដល់អាទិត្យដែលបានរះបំភ្លឺភពផែនដី អោយមានជីវិតមនុស្សសត្វមានជីវិតរស់នៅដោយសុខសប្បាយ។
លោក សុខ រិន បានអោយដឹងទៀតថា ៖ ពិធីសែនខាងលើនេះភាគច្រើន គឺគេនិយមធ្វើនៅក្នុងពិធីបុណ្យដាលាន ដែលខ្លះគេហៅថាបុណ្យភូមិ។ ប៉ុន្តែអ្នកស្រុកតាមភូមិមួយចំនួនគេនិយមសែនព្រេននៅតាមផ្ទះ ឬតាមវាលស្រែក្នុងភូមិដូចខាងលើនេះ។ ដែលទង្វើនេះគឺជាការអភិរក្ស និងថែរក្សានូវទំនៀមទម្លាប់ប្រពៃណីខ្មែរយើងកុំអោយយបាត់បង់៕
Source: Kampuchea Thmey Daily
0 Comments