កំពង់ឆ្នាំង ៖ គម្រោងកសាងផ្លូវតាមមាត់ទន្លេប្រវែង១៧០០ម៉ែត្រ នៅក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ត្រូវបានអាជ្ញាធរខេត្តផ្អាកជាបណ្ដោះអាសន្ន ព្រោះតែការកសាងផ្លូវនេះជាន់ជាមួយគម្រោងរបស់ADB ដែលADB បានចុះមកសិក្សារួចហើយ ដើម្បីជួយកសាងផ្លូវ១ខ្សែនេះ នៅចុងឆ្នាំ២០១៨នេះ។
លោក យិន សាវ៉េន អភិបាលក្រុងកំពង់ឆ្នាំងបានអោយដឹងថា ៖ ផ្លូវ១ខ្សែខាងលើនេះ ចេញពីផ្លូវដាច់កំពង់ផែចាស់នៅចុងកោះ ទៅកាន់កំពង់ផែថ្មីនៅចុងភូមិចុងកោះ នៅតាមមាត់ទន្លេ មានប្រវែង១៧០០ម៉ែត្រ ទទឹង១២ម៉ែត្រ កម្ពស់ ៤ម៉ែត្រ ផុតពីទឹកទន្លេ ត្រូវបានអាជ្ញាធរខេត្ត ជួលក្រុមហ៊ុន ឈន សារាណេ ជាអ្នកកសាង ដោយបានដំណើរការកសាងចាប់ពីពាក់កណ្តាលខែមេសារហូតមក តែត្រូវបានផ្អាកការកសាងវិញ កាលពីថ្ងៃទី១៥ ខែឧសភាកន្លងទៅនេះ ដោយសារតែគម្រោងនេះជាន់លើគម្រោង ADB បានសិក្សា ថាជួយកសាង។
ទាក់ទងនឹងរឿងនេះ លោក ស៊ុន សុវណ្ណរិទ្ធ អភិបាលរងខេត្តកំពង់ឆ្នាំង បានអោយដឹងថា ៖ គម្រោងផ្លូវខាងលើនេះជាគម្រោង ADB ដែលកំពុងសិក្សាជួយកសាង តែមិនទាន់អនុមតិជាផ្លូវការ ទើបកន្លងមកអាជ្ញាធរខេត្តបានលើកគម្រោងនេះកសាងជាបណ្តើរៗ ក្នុងបំណងធ្វើអោយហើយ ដើម្បីខេត្តទទួលធ្វើបុណ្យទន្លេនៅក្នុងខែមីនា ឆ្នាំ២០១៩ខាងមុខនេះ។ ប៉ុន្តែក្រោយមកមន្ត្រី ADB បានចុះមកសិក្សាផ្លូវនេះបន្តក៏បានសាកសួរមកអាជ្ញាធរខេត្តថា ៖ បើអាជ្ញាធរខេត្តកសាងផ្លូវនេះ ADB នឹងដកគម្រោងនេះវិញ។ ហេតុនេះហើយទើបអាជ្ញាធរខេត្តផ្អាកគម្រោងនេះ ប្រគល់អោយ ADB ជាអ្នកកសាងវិញ ព្រោះថា ADB នឹងមានគម្រោងមួយចំនួនទៀតដែលកំពុងធ្វើការសិក្សាជួយខេត្តកំពង់ឆ្នាំង។
លោក ស៊ុន សុវណ្ណរិទ្ធ បានបញ្ជាក់អោយដឹងថា ៖ តាមគម្រោង ADB នឹងប្រជុំអនុមតិគំរោងកសាងផ្លូវនេះ នៅក្នុងខែតុលា ឆ្នាំ២០១៨ខាងមុខនេះ ហើយនៅក្នុងខែវិច្ឆិកា ឆ្នាំ២០១៨ ADB នឹងដាក់អោយក្រុមហ៊ុនដេញថ្លៃកសាងតែម្តង។
ដោយឡែក ផ្ទះប្រជាពលរដ្ឋមួយចំនួនតូចដែលរស់នៅតាមមាត់ទន្លេ ដែលរងការប៉ះពាល់ក្នុងការកសាងផ្លូវខាងលើនេះ គឺ ADB សំណូមពរអោយពួកគាត់រស់នៅជាបណ្ដោះអាសន្នសិន នៅពេល ADB អនុមតិថវិការួច ADB នឹងយកប្រាក់គោលនយោបាយមកបើកជូនពួកគាត់ ហើយក្រោយពីទទួលបានប្រាក់គោលនយោបាយហើយ ពួកគាត់នឹងរុះរើផ្ទះទៅកាន់ទីតាំងថ្មីដែលអាជ្ញាធរខេត្តបានចែកដីអោយពួកគាត់រួចហើយ នៅជិតផ្សារកំពង់ឆ្នាំងថ្មី ដើម្បីទុកអោយ ADB អនុវត្តគម្រោងកសាងផ្លូវខាងលើនេះដោយជោគជ័យ៕
Source: Kampuchea Thmey Daily
0 Comments