ព្រៃវែង ៖ គ្រោះថ្នាក់ចរាចរណ៍មួយ បានកើតឡើងរវាងម៉ូតូហុងដាឌ្រីមសង់បុកជាមួយហុងដាវ៉េវក្នុងទិសដៅបញ្ច្រាសគ្នាពេញទំហឹងបណ្ដាលឲ្យរងរបួសយ៉ាងធ្ងន់ធ្ងរទាំងសងខាង។
ហេតុការណ៍គ្រោះថ្នាក់ចរាចរណ៍ខាងលើ បានកើតឡើងកាលពីព្រលប់ថ្ងៃទី១ ខែមិថុនា ឆ្នាំ២០១៨វេលាម៉ោង១៩និង០០នាទី នៅលើកំណាត់ផ្លូវជាតិលេខ១ ស្ថិតក្នុងភូមិព្រៃខ្លា ឃុំកំពង់សឹង ស្រុកព្រះស្តេច ខេត្តព្រៃវែង។
សមត្ថកិច្ចប៉ុស្តិ៍កំពង់សឹងបានឲ្យដឹងថា គ្រោះថ្នាក់ខាងលើបង្កឡើងដោយម៉ូតូពីរគ្រឿងបុកគ្នាដោយម៉ូតូ១គ្រឿងម៉ាកហុងដាឌ្រីមសង់C១២៥ពណ៌ខ្មៅ ស៊េរីឆ្នាំ២០១៦ ពាក់ស្លាកលេខភ្នំពេញ១FK,៧០៣៨ បើកបរដោយជនរងគ្រោះឈ្មោះសួស លាន ភេទប្រុស អាយុ២៣ឆ្នាំ រស់នៅភូមិព្រំខ្សាច់ ឃុំល្វា ស្រុកព្រះស្តេច ខេត្តព្រៃវែង បើកបរក្នុងទិសដៅពីលិចទៅកើត ហើយពេលដែលមកដល់ចំណុចកើតហេតុខាងលើ បានបុកជាមួយម៉ូតូ១គ្រឿងទៀតម៉ាកហុងដាវ៉េវ ពណ៌ខ្មៅគ្មានស្លាកលេខ បើកបរដោយឈ្មោះម៉ែត ចាន់នី ភេទប្រុស អាយុ៣០ឆ្នាំ រស់នៅភូមិសំបួ ឃុំបឹងដោលស្រុកព្រះស្តេច ខេត្តព្រៃវែង ដែលបើកបរក្នុងទិសដៅបញ្ច្រាសគ្នាយ៉ាងពេញទំហឹងបណ្តាលឲ្យរងរបួសយ៉ាងធ្ងន់ធ្ងរដង្ហើមចង្រិតទាំងសងខាង។
ក្រោយពេលកើតហេតុ សមត្ថកិច្ចបានចុះដល់ចំណុចកើតហេតុ និងបានហៅរថយន្តសង្គ្រោះដឹកជនរងគ្រោះទាំង២ទៅសង្គ្រោះនៅឯមន្ទីរពេទ្យស្រុកព្រះស្តេច។ ចំណែកឯម៉ូតូ ក្រោយពីសមត្ថកិច្ចធ្វើការវាស់វែងរួចបានយកទៅរក្សាទុកនៅប៉ុស្តិ៍រដ្ឋបាល ឃុំកំពង់សឹងរង់ចាំដោះស្រាយតាមច្បាប់៕
Source: Kampuchea Thmey Daily
0 Comments