លោក ហ៊ុន ម៉ាណែត ៖ បើចង់ក្លាយជាកម្លាំងស្នូល និងជាធនធានមនុស្សដ៏សំខាន់ យុវជនត្រូវមានលក្ខណៈសម្បត្តិ៣យ៉ាង

ត្បូងឃ្មុំ ៖ លោក ហ៊ុន ម៉ាណែត លើកឡើងបែបនេះ នៅក្នុងពិធីបិទវគ្គបណ្តុះបណ្តាល "កម្មវិធីអភិវឌ្ឍន៍ភាពជាអ្នកដឹកនាំនយោបាយ" វគ្គ២ដល់យុវជនខេត្តត្បូងឃ្មុំ កាលពីថ្ងៃទី០១ ខែមិថុនា ឆ្នាំ២០១៨។

ថ្លែងនៅក្នុងពិធីនោះ លោក ហ៊ុន ម៉ាណែត បានលើកឡើងថា ប្រទេសរបស់យើងមកដល់ម៉ោងនេះ គឺពឹងផ្អែកលើយុវជន ដែលជាសសរទ្រូងរបស់ប្រទេសជាតិ ជាកម្លាំងស្នូល ព្រោះថាយុវជននៅជំនាន់នេះ នឹងក្លាយជាអ្នកដឹកនាំនៅរយៈពេលពេល២០ឆ្នាំក្រោយ នឹងក្លាយជាអ្នកដឹកនាំគ្រប់ស្ថាប័ន ក្លាយជាមេគ្រួសារ ដូច្នេះទាមទារនូវការទទួលខុសត្រូវ សមត្ថភាព និងកត្តាធ្វើឱ្យយើងជោគជ័យជាច្រើនទៀត។ យុវជន នឹងហើយ ជាកម្លាំងប្រមូលផ្តុំ និងជាកម្លាំងបន្តវេននៅក្នុងចូលរួមដឹកនាំប្រទេសឱ្យមានភាពរីកចម្រើន។ ជាក់ស្តែងមកដល់ពេលនេះ ប្រទេសយើងទទួលបានចំណាត់ថ្នាក់លេខ៧ នៅលើពិភពលោក ជាប្រទេស ដែលមានសេដ្ឋកិច្ចរត់លឿនជាងគេ និងជាប្រទេសមានចំណូលមធ្យមកម្រិតទាប។ លោកបន្តថា មកដល់ពេលនេះ ក្រោមការដឹកនាំរបស់រាជរដ្ឋាភិបាលកម្ពុជា ដឹកនាំដោយបក្សតែមួយមែន ប៉ុន្តែឈាមនៅខាងក្នុងយើងបានធ្វើឱ្យមាននិរន្តភាព និងការផ្លាស់ប្តូររីកចម្រើនគ្រប់ជំនាន់ និងបង្កលទ្ធភាពឱ្យយុវជនជំនាន់ក្រោយចូលរួមដឹកនាំនៅគ្រប់ស្ថាប័ន។ យុវជនជំនាន់មុនបាន រំដោះប្រទេសជាតិ បញ្ចប់សង្គ្រាមដឹកនាំប្រទេស កសាងផែនការ នយោបាយ ដឹកនាំអនុវត្តគោលនយោបាយ ក្រោមការដឹកនាំរបស់យុវជនជំនាន់ឪពុកម្តាយយើង ហើយបានបង្កលទ្ធភាពដល់យុវជនជំនាន់ក្រោយឱ្យចូលរួមដឹកនាំ ក្នុងការជំរុញប្រទេសជាតិឱ្យទៅមុខទៀត។ អញ្ចឹងហើយ ធនធានមនុស្សរបស់យើងមានសារសំខាន់ណាស់។ ដូច្នេះយើងនិយាយពីអនាគតយើងត្រូវតែមានយុវជនចូលរួមដឹកនាំអភិវឌ្ឍប្រទេស ជាមួយយុវជនជំនាន់ឪពុកម្តាយយើង ជំនាន់បងៗយើង ដើម្បីដឹកនាំបន្តទៀត ប៉ុន្តែអ្វីដែលសំខាន់នោះ ត្រូវអភិវឌ្ឍធនធានមនុស្សជំនាន់យើង ជំនាន់ប្អូនយើង ជំនាន់កូនចៅយើងឱ្យកាន់តែខ្លាំង ព្រោះថា ដរាបណាពលរដ្ឋកាន់តែខ្លាំង ធនធានមនុស្សយើងកាន់តែខ្លាំងនោះ ហើយដែលធ្វើឱ្យខ្មែរយើងកាន់តែខ្លាំង។

តាមលោក ហ៊ុន ម៉ាណែត “បើចង់ក្លាយជាកម្លាំងស្នូលរបស់ប្រទេស ជាធនធានមនុស្សដ៏សំខាន់ដើម្បីចូលរួមអភិវឌ្ឍប្រទេសជាតិ យុវជនត្រូវមានលក្ខណៈសម្បត្តិសំខាន់០៣យ៉ាងក្នុងចំណោមលក្ខណៈសម្បត្តិផ្សេងទៀត គឺសមត្ថភាព សីលធម៌ គុណធម៌ និងការទទួលខុសត្រូវ។ ប្រទេសយើងត្រូវការធនធានមនុស្សដែលមានជំនាញ សមត្ថភាពពិតប្រាកដក្នុងការចូលរួមអភិវឌ្ឍគ្រប់វិស័យ។ យុវជនមានជម្រើសច្រើន អាចសិក្សាជំនាញជាច្រើនព្រោះថា សមត្ថភាពមិនចាំបាច់រៀនដល់មហាវិទ្យាល័យនោះទេ ឱ្យតែមានជំនាញ ចំណេះដឹង ពិតប្រាកដ។ យុវជនមានជំនាញ មានសមត្ថភាពហើយមិនទាន់គ្រប់គ្រាន់នោះទេ គឺត្រូវមានសីលធម៌ គុណធម៌ ព្រោះថា ការដឹកនាំប្រទេស ឬការចូលរួមក្នុងសកម្មភាពអ្វីមួយមានសមត្ថភាពហើយ ប៉ុន្តែមិនធ្វើទៅតាមក្រិតក្រមសីលធម៌ គុណធម៌ នោះទេ នឹងធ្វើឱ្យបាត់បង់ផលប្រយោជន៍ជាតិ និងមានការលំបាកនៅក្នុងការដឹកនាំប្រទេស និងនៅក្នុងការរស់នៅ។ មួយទៀតគឺការទទួលខុសត្រូវ បើគ្មានការទទួលខុសត្រូវនឹងមានភាពរញ៉េរញ៉ៃ និងគ្មានភាពជាអ្នកដឹកនាំ។ លក្ខណៈសម្បត្តិទាំង០៣នេះ គឺទាក់ទងគ្រប់ទិដ្ឋភាពទាំងអស់ទាំងការរស់នៅ ទាំងការធ្វើការងារ និងទាំងការធ្វើនយោបាយ។

លោក ហ៊ុន ម៉ាណែត លើកជាសំណួរថា អ្វីទៅជាភាពអ្នកដឹកនាំនយោបាយ ? គឺសមត្ថភាពក្នុងការចូលរួមធ្វើនយោបាយ ដែលមានគោលដៅច្បាស់លាស់ គឺការវិភាគ ការកំណត់ និងការទទួលខុសត្រូវ។ ទី២ គឺសីលធម៌ គុណធម៌នយោបាយ ទាំងក្នុងការនិយាយស្តី ទាំងក្នុងសកម្មភាព ផ្អែកទៅលើសច្ចភាពនិងសាមគ្គីភាព បញ្ចៀសផុតអ្វីដែលជាអសីលធម៌ដែលធ្វើឱ្យប៉ះពាល់ដល់សង្គមជាតិ ប៉ះពាល់ដល់ប្រជាជនដូចរបបប៉ុលពត ឬធ្វើឱ្យខ្មែរញុះញង់គ្នា បែកបាក់គ្នា។ បើយើងមានព្រំដែន មានសមត្ថភាពនយោបាយ មានការវិភាគច្បាស់លាស់ ការបញ្ចេញមតិមានហេតុផលត្រឹមត្រូវ នោះយើងនឹងទទួលបានជោគជ័យ ព្រោះថាប្រជាពលរដ្ឋខ្មែរមិនចូលចិត្តឈ្លោះនោះទេ គឺត្រូវការវិភាគហេតុផល។ ក្នុងនាមជាអ្នកនយោបាយ ការទទួលខុសត្រូវ សីលធម៌ គុណធម៌ នេះហើយគឺជាតម្លៃ គឺជាភាពជឿជាក់ពីអ្នកដទៃ និងជាការធានាបាននិរន្តភាពនៃការធ្វើនយោបាយ។

លោក ហ៊ុន ម៉ាណែត លើកឡើងទៀតថា ការប្រកួតប្រជែង និងការចូលរួមសំខាន់ណាស់សម្រាប់យុវជនរបស់យើង ព្រោះថាយើងកសាងប្រទេសរីកចម្រើនបានប៉ុណ្ណេះហើយ យើងត្រូវការអភិវឌ្ឍទៅមុខទៀត។ អ្វីដែលសំខាន់នោះគឺសមត្ថភាព សីលធម៌ គុណធម៌ និងមហិច្ឆតា ដែលធ្វើឱ្យខ្លួនយើងវិវឌ្ឍ ព្រោះខ្លួនយើងវិវឌ្ឍ ធ្វើឱ្យគ្រួសារវិវឌ្ឍ ស្ថាប័ននិងប្រទេសជាតិយើងវិវឌ្ឍ។ បើយើងធ្វើបាន យើងជួយបាន០២ គឺយើងជួយទាំងបច្ចុប្បន្ន និងជួយទាំងអនាគត។ ជួយបច្ចុប្បន្ន គឺជួយខ្លួនយើងឱ្យបានជោគជ័យដោយមិនប៉ះពាល់ដល់អ្នកដទៃ និងសង្គមនាពេលបច្ចុប្បន្ន។ ជួយអនាគតគឺយើងជួយបង្កើតប្រព័ន្ធសង្គមមួយសម្រាប់កូនចៅយើងដែលផ្អែកទៅលើសមត្ថភាព សីលធម៌ គុណធម៌ និងការវិវឌ្ឍទៅមុខទៀត។ ការធ្វើឱ្យប្រព័ន្ធមួយនេះល្អ នឹងក្លាយជាទម្លាប់ ហើយទម្លាប់នឹងក្លាយជាផ្នត់គំនិតសម្រាប់យុវជនជំនាន់ក្រោយ។

លោក ហ៊ុន ម៉ាណែត លើកឡើងទៀតថា រាជរដ្ឋាភិបាលបច្ចុប្បន្ន ដែលដឹកនាំដោយគណបក្សប្រជាជនកម្ពុជា បានបង្កើតគោលនយោបាយនិងឱកាសច្រើនណាស់សម្រាប់យុវជន ជាគណបក្សដែលមានស្នាដៃច្រើនជាងគេនៅក្នុងអតីតកាល មានសមត្ថភាពដឹកនាំប្រទេសនាពេលបច្ចុប្បន្ន និងជាគណបក្សតែមួយគត់មានសមត្ថភាពធានានិរន្តភាពក្នុងការដឹកនាំនៅពេលអនាគត។ អនាគតសំខាន់ណាស់ ព្រោះអាស្រ័យលើលំនឹងនិងស្ថិរភាពនៃការដឹកនាំ។ ជាមួយគ្នានោះ លោកអរគុណយុវជនដែលបានជឿជាក់ គាំទ្រសម្តេចតេជោ ហ៊ុន សែន ក្នុងការដឹកនាំប្រទេសនាពេលកន្លងមក និងសូមឱ្យយុវជនបន្តគាំទ្រសម្តេចតេជោ ហ៊ុន សែន ឱ្យមានលទ្ធភាពដឹកនាំប្រទេស ដើម្បីបន្តនិរន្តភាព លំនឹងសុខសន្តិភាព និងអភិវឌ្ឍប្រទេសឱ្យរីករាយទៅមុខទៀត៕