តាកែវ ៖ ក្មេងស្រីសិស្សសាលាម្នាក់ បានស្លាប់ភ្លាមៗនៅនឹងកន្លែងកើតហេតុគួរឲ្យសង្វេគ ខណៈដែលក្មេងរងគ្រោះជិះម៉ូតូចេញមកពីរៀនវិញត្រូវឡានដឹកដីបើកស្របទិសគ្នាជ្រុលចង្កូតបុកពីក្រោយពេញទំហឹង។
ហេតុការណ៍នេះបានកើតឡើងកាលពីថ្ងៃទី១១ ខែមិថុនា ឆ្នាំ២០១៨ វេលាម៉ោង១០និង២០នាទីនៅចំណុចផ្លូវលំ ក្នុងភូមិក្បាលដំរី ឃុំគោកព្រេច ស្រុកគីរីវង់ខេត្តតាកែវ។ ករណីនេះដែរ លោកវរសេនីយ៍ឯក យ៉ុគ សារ៉ាត់ អធិការនគរបាលស្រុកគីរីវង់បានឲ្យដឹងថា រថយន្តបង្កម៉ាកហ៊ីយ៉ាន់ដាយ ពណ៌សរ ពាក់ស្លាកលេខព្រះសីហនុ 3A-0792 អ្នកបើកបរចុះរត់គេចខ្លួនបាត់ក្រោយបង្កហេតុ។
ចំណែកក្មេងស្រីរងគ្រោះមានឈ្មោះ ឈុយ លីងដា ភេទស្រី អាយុ១៦ ឆ្នាំ រស់នៅភូមិព្រៃជើង ឃុំគោកព្រេច ស្រុកគីរីវង់ មុខរបរជាសិស្សរៀននៅថ្នាក់ទី១១ នៃវិទ្យាល័យសុប៉ិន បានស្លាប់ភ្លាមៗនៅនឹងកន្លែង។ ចំណែកអ្នកនៅក្បែរកន្លែងកើតហេតុបានឲ្យដឹងដែរថា មុនពេលកើតហេតុក្មេងស្រីរងគ្រោះបានជិះម៉ូតូម៉ាកគុបជ្រុង ពណ៌ស្លែពាក់ស្លាកលេខ ភ្នំពេញ1CV-2334 ដោយធ្វើដំណើរពីត្បូងទៅជើង។ ខណៈកំពុងតែធ្វើដំណើរស្រាប់តែរថយន្តដឹកដីបើកមកពីក្រោយបុកម៉ូតូពេញទំហឹងបណ្តាលឲ្យម៉ូតូដួល និងធ្វើឲ្យក្មេងស្រីរងគ្រោះស្លាប់ភ្លាមៗតែម្តងនៅកន្លែងកើតហេតុ។
ក្រោយពេលកើតហេតុប៉ូលិសជំនាញស្រុកបានចុះដល់ ធ្វើកំណត់ហេតុនិងបានប្រគល់សពក្មេងស្រីរងគ្រោះឲ្យក្រុមគ្រួសារយកទៅធ្វើបុណ្យតាមប្រពៃណី ចំណែករថយន្តបង្ក និងម៉ូតូរបស់ក្មេងរងគ្រោះ ត្រូវបានយកមករក្សាទុកនៅអធិការដ្ឋាននគរបាលស្រុកគីរីវង់ រង់ចាំដោះស្រាយគ្នានៅពេលក្រោយ៕
Source: Kampuchea Thmey Daily
0 Comments